Kila mwaka, makumi ya maelfu ya watu hutembelea majengo ya ofisi ya tawi na makao makuu ya ulimwenguni pote ya Mashahidi wa Yehova yaliyoko katika jimbo la New York nchini Marekani. Majengo hayo yanaitwa Betheli, neno la Kiebrania linalomaanisha “Nyumba ya Mungu.” Wageni husafiri kutoka maeneo ya karibu na ya mbali ili waje kujionea jinsi machapisho yanavyochapishwa, jinsi kazi yetu ilivyopangwa, na kuwatembelea marafiki wao wanaofanya kazi huko. Hivi karibuni mgeni fulani aliazimia kufunga safari ili kuja kutembelea Betheli.

Marcellus, Shahidi wa Yehova anayeishi Anchorage, Alaska, nchini Marekani, anaweza tu kuongea maneno machache kwa sababu alipatwa na ugonjwa wa kiharusi miaka michache iliyopita. * Anatumia kiti cha magurudumu na anahitaji mtu wa kumsaidia kila siku. Licha ya matatizo anayokabili, alikuwa na hamu kubwa ya kutembelea Betheli. Hivi karibuni, ndoto yake ilitimia.

Corey, rafiki aliyemsaidia Marcellus kupanga safari hiyo anasema hivi: “Alikuwa ameazimia kabisa. Angenipigia simu mara kwa mara ili kujua mipango ya safari imefikia wapi. Kwa kuwa Marcellus hawezi kutamka maneno mengi mara nyingi yeye hujibu kwa kutumia maneno kama vile ‘Ndiyo’ na ‘Hapana.’ Kwa hiyo aliponipigia simu nilihitaji kumuuliza mfululizo wa maswali.” Kwa kawaida mazungumzo yao yalikuwa hivi:

“Je, ungependa nije?”

“Hapana.”

“Je, ungependa nimwite daktari?”

“Hapana.”

“Unazungumzia kuhusu safari yako ya kutembelea Betheli?”

“Ndiyo.”

Kisha, ningemweleza nimefikia hatua gani kuhusiana na mipango ya safari hiyo. Nilifurahi sana kuona akifikia mradi wake.”

Marcellus alishinda vikwazo kadhaa ili kuifanikisha safari yake. Kwa kuwa mshahara wake ni mdogo, alihitaji kuweka akiba ya pesa kwa miaka miwili ili aweze kugharimia safari ya umbali wa kilometa 5,400 ya kwenda New York. Kwa sababu ya udhaifu wake wa kimwili, alihitaji mtu wa kumsaidia katika safari yake. Mwishowe, alihitaji kupata ruhusa kutoka kwa daktari wake ili asafiri, na alipewa ruhusa siku chache tu kabla ya safari yake kwa ndege kufika.

Marcellus alipofika New York, alitembezwa katika majengo ya Brooklyn, Patterson, na Wallkill. Aliona mashine kubwa za uchapishaji zikichapisha vitabu na Biblia na alijifunza mambo mengi kuhusu jinsi kazi yetu inavyofanywa. Pia aliona maonyesho yenye kichwa “Biblia na Jina la Mungu” na “Watu kwa Ajili ya Jina la Yehova ” Alipokuwa akitembezwa, alipata marafiki wengi wapya. Kwa hakika, ilikuwa safari ambayo haitawahi kusahaulika!

Baada ya kutembelea Betheli watu wengi wanasema kwamba hawawezi kupata maneno mwafaka ya kuelezea hisia zao za shangwe kuhusiana na ziara hiyo. Lakini Marcellus alipoulizwa ikiwa jitihada zake za kutembelea Betheli zilikuwa na manufaa yoyote, alijibu hivi kwa mtindo wa maneno ambayo angeweza kutamka: “Ndiyo. Ndiyo. Ndiyo!”

Kutembelea Betheli kunaweza kukutia moyo wewe na familia yako, kama ilivyokuwa kwa Marcellus. Wageni wanakaribishwa kutembelea ofisi zetu za tawi zilizoko ulimwenguni pote. Kwa nini usitenge nafasi, uje ututembelee?