Inakadiriwa kwamba kuna mabaharia zaidi ya 500,000 ulimwenguni pote. Kwa kuwa kila wakati wanasafiri kutoka bandari moja hadi nyingine, Mashahidi wa Yehova wanaweza kuwafikiaje mabaharia wengi kadiri iwezekanavyo na ujumbe wa Biblia? Meli inapofika bandarini, Mashahidi waliozoezwa huingia ndani ya meli na kuwahubiria maofisa na wafanyakazi wa meli katika lugha yao.

Jitihada hizo zimekuwa na matokeo gani? Stefano, Shahidi anayejitolea katika bandari ya Vancouver, Kanada, anaeleza hivi: “Watu fulani hufikiri kwamba mabaharia wote ni watu wagumu na wasio na ustaarabu. Ingawa baadhi yao wako hivyo, wengi wao ni watu wanyenyekevu walio na hamu ya kujifunza.” Stefano anaongezea hivi: “Wengi wanamwamini Mungu na wanataka baraka zake, kwa hiyo mara nyingi wanatukaribisha.” Kati ya Septemba 2015 na Agosti 2016 Mashahidi wa Yehova walikaribishwa zaidi ya mara 1,600 katika meli katika bandari ya Vancouver peke yake! Mabaharia hao walipokea maelfu ya machapisho katika lugha nyingi, na zaidi ya 1,100 kati yao walianza kujifunza Biblia.

Kwa kuwa Mashahidi wanapatikana katika bandari zote ulimwenguni, mabaharia ambao wangependa kuendelea kuzungumza kuhusu Biblia wanaweza kuomba watembelewe wanapofika kwenye bandari inayofuata. Kwa mfano, mnamo Mei 2016, Mashahidi wa Yehova katika bandari ya Vancouver walikutana na Warlito ambaye ndiye mpishi mkuu katika meli moja ya kubeba mizigo. Walimwonyesha video yenye kichwa Kwa Nini Ujifunze Biblia? na wakaanzisha funzo la Biblia kwa kutumia broshua Habari Njema Kutoka kwa Mungu! Warlito alifurahia mazungumzo hayo na akataka kuendelea kujifunza Biblia, lakini meli yake ilikuwa ikielekea kwenye bandari ya mbali ya Paranaguá nchini Brazili.

Baada ya mwezi mmoja hivi, meli yao ilifika Paranaguá. Warlito hakuamini wakati ambapo Mashahidi wawili Wabrazili walipofika kwenye meli na kumtafuta wakitumia jina lake! Walimwambia kwamba Mashahidi wenzao kule Vancouver walikuwa wametuma ombi kwamba wamtembelee. Warlito alifurahi sana kukutana na Mashahidi hao Wabrazili naye akashukuru sana kwa mipango hiyo muhimu sana iliyokuwa imefanywa. Kwa furaha, alikubali kwamba ataendelea kujifunza Biblia na Mashahidi katika bandari itakayofuata.