Graham Browne, Shahidi wa Yehova mwenye umri wa miaka 80, alifaulu kumshawishi mtu aliyekuwa na tatizo la akili asijirushe kutoka kwa mnara uitwao Sky Tower wenye urefu wa mita 328 (futi 1,076) huko Auckland, New Zealand. Graham alisema hivi: “Mwanamume huyo alipoomba kuongea na Shahidi wa Yehova, polisi waliniomba ikiwa ningeweza kusaidia.”

“Wafanyakazi wa Sky Tower walinifunga kwa mishipi ya usalama na kutumia kamba ndefu kuifunga Biblia yangu kwa uangalifu. Halafu polisi wakanipeleka hadi sehemu ambayo ningeweza kumwona mtu huyo aliyekuwa na tatizo la akili. Sehemu hiyo ilikuwa mita 192 (futi 630) juu ya ardhi. Upepo mkali ulikuwa ukivuma. Mtu huyo ambaye alitishia kujirusha alikuwa ameketi karibu na mahali nilipokuwa, na miguu yake ilikuwa inaning’inia hewani.

“Nilipaaza sauti na kumweleza kuwa mimi ni Shahidi wa Yehova na kwamba nilitaka kumsaidia. Halafu baada ya kutoa sala kimya-kimya, nilifungua Biblia yangu na kuanza kuzungumza.

“Nilizungumza kuhusu utakatifu wa uhai, ambalo lilikuwa ni somo kuu la hotuba niliyokuwa nimetoa karibuni kwenye Jumba letu la Ufalme.

“Nilimwambia hivi: ‘Mungu anakuona wewe kuwa mwenye thamani sana, na amekupa zawadi nzuri ajabu, yaani uhai. Kwa nini usimwonyeshe kwamba unathamini zawadi hiyo? Tafadhali njoo sehemu hii iliyo salama.’

“Pia nilisoma mistari kadhaa ya Biblia kutia ndani andiko la Yohana 3:​16, linalosema hivi: ‘Kwa maana Mungu aliupenda ulimwengu sana hivi kwamba akamtoa Mwana wake mzaliwa-pekee, ili kila mtu anayemwamini asiangamizwe bali awe na uzima wa milele.’

“Nikamwambia: ‘Hivyo Mungu anakupenda na anataka uendelee kuishi.’

“Mwanzoni, mwanamume huyo alionekana kana kwamba hasikilizi. Kwa hiyo, nikasali moyoni ili Yehova anisaidie nifaulu kumshawishi asijirushe. Hatimaye, pole kwa pole aliinuka na kunisogelea. Alionekana kuwa mwenye wasiwasi sana.

“Mwanamume huyo akasema: ‘Hivi karibuni Mashahidi wa Yehova walinitembelea nyumbani, lakini niliwafukuza, jambo linalonifanya nisikie vibaya sana. Unaweza kunisamehe tafadhali?’

“Nilimtia moyo kwa kumwambia hivi: ‘Usijali, hata baadhi yetu tulifanya hivyo kabla ya kuwa Mashahidi. Uwe na uhakika kwamba Yehova atakusamehe.’

“Akajibu hivi: ‘Asante sana, nahisi nimeondolewa mzigo mkubwa sana.’

“Nikaendelea kumwambia, ‘Unajua, ninahofia sana uhai wako. Mimi nimejifunga mishipi ya usalama, lakini wewe ukiteleza, utapoteza uhai wako wenye thamani. Jambo hilo litamhuzunisha sana Yehova. Kwa hiyo tafadhali njoo sehemu hii iliyo salama.’

“Nilitambua kwamba alibadilika na kuonekana kuwa mtulivu kuliko awali. Akajibu kwa upole, ‘sawa naja.’

“Akaja sehemu niliyokuwa, na upesi polisi wakamwongoza hadi mahali palipo salama. Tulikuwa tukizungumza naye kwa muda wa saa moja hivi.”

Mashahidi wa Yehova wanawajali watu kwelikweli, hasa wale walioshuka moyo. Wao wanatumia Maandiko kuwapa watu tumaini na faraja ulimwenguni pote, wakiwahakikishia kwamba Mungu anawajali sana.