Mei 6, 2017, Mashahidi 130 hivi wa Yehova walisaidia kusafisha Msitu wa Bryukhovychi karibu na Lviv, Ukrainia. Wajitoleaji, wenye umri wa kati ya miaka 22 hadi 80, wanaishi na kufanya kazi katika ofisi ya tawi ya Mashahidi wa Yehova ya Ukrainia, iliyoko karibu na msitu huo. Walisafisha eneo lenye ukubwa wa ekari 120 na kukusanya takataka zenye uzito wa kilogramu 600 hivi katika muda wa saa tatu tu.

Kulingana na Mykhailo Splavinskyi, ambaye ni injinia mkuu wa kituo kimoja kinachoshughulikia misitu cha Lviv, “Mashahidi wa Yehova walikuwa wa kwanza kuunga mkono usafishaji wa kila mwaka wa msitu, na wamekuwa wakifanya hivyo kila mwaka tangu 2014.”

Bw. Splavinskyi anaeleza hivi: “Takataka huingia msituni kwa njia mbili. Kwanza, watu fulani huacha takataka wanapoondoka. Pili, vifusi na takataka nyingine za ujenzi huletwa na malori na kutupwa msituni.”

Takataka ni tatizo kubwa katika msitu huo. Bw. Splavinskyi anaeleza hivi: “Takataka huchukua muda mrefu kuoza.” Baada ya hapo, takataka hizo “huchafua maji yaliyo chini ya ardhi, na kusababisha matatizo katika mazingira.” Vioo vilivyotupwa vinaweza kuongeza miale ya jua, na hivyo kutokeza mioto ya msituni. Vioo vilivyovunjika na sindano zilizotupwa ni hatari kwa usalama, hasa kwa watoto wadogo. Anaeleza hivi: “Matatizo hayo yanaweza kuepukwa takataka zinapoondolewa.”

Kusafisha msitu wenye ukubwa wa ekari 8,100 ni changamoto kubwa. Bw. Splavinskyi anaendelea kueleza hivi: “Tuna walinzi watano tu wa msitu, kwa hiyo hatuwezi kusafisha eneo kubwa sana kadiri hiyo. Hivyo, mara moja kwa mwaka tunawaomba watu wote watusaidie katika kusafisha msitu.”

Wajitoleaji Mashahidi wakiwa na glavu, karatasi za plastiki, na reki, walikusanya chupa, magurudumu ya magari, glasi, vyuma, plastiki, na sindano zilizotumiwa. Kwa sababu hiyo, Ihor Fedak, anayefanya kazi ya kutunza misitu ya eneo hilo anasema kwamba “eneo linalotunzwa na Mashahidi wa Yehova ni safi sana.”

Wajitoleaji hutenganisha takataka katika vikundi​—glasi, karatasi, na plastiki​—ingawa hakuna sheria inayosema wafanye hivyo na hilo huwezesha takataka hizo zitumiwe upya. Baada ya kukusanywa hivyo, takataka hizo hushughulikiwa katika kampuni ya takataka iliyo karibu. Tangu 2016, Mashahidi wamejitolea kulipa ili takataka walizokusanya zikatupwe. Bw. Fedak anasema hivi: “Ninawashukuru sana Mashahidi wa Yehova kwa kutusaidia. Wao hutusaidia sana.”

Mashahidi hufurahi kushiriki katika usafi huo wa kila mwaka wa msitu. Wanapenda kuchangia hali njema ya jamii na kuwa na msitu unaopendeza. Volker anasema jambo ambalo Mashahidi wengi wanaamini: “Kufanya usafi hakunishushii heshima. Kuwafanyia wengine jambo ni tendo lenye kuheshimika na huniletea uradhi.”

Anzhelika anaongezea kusema hivi: “Kwangu, jambo kuu si ni nani aliyetupa takataka hizo msituni, bali ni kuziondoa.” Lois ambaye ana umri wa miaka 78, alishiriki pia katika kampeni hiyo. Anasema hivi: “Badala ya kukasirika kuhusu takataka hizo ninapoenda matembezi, ni afadhali kuziokota na kuzitupa.”

Wieslaw anasema hivi: “Kwa kawaida watu hutuona tukiwa tumevalia vizuri tukiwa na tai, tukienda kuwahubiria watu. Lakini tuko tayari pia kufanya kazi ngumu ya kusafisha msitu au kufanya kazi nyingine inayowanufaisha watu.”