Katika miaka ya karibuni, wakimbizi wengi kutoka Afrika, Mashariki ya Kati, na Asia Kusini wamemiminika kuingia Ulaya. Ili kuwasaidia, mashirika ya serikali na wajitoleaji wenyeji wanafanya kazi ili kuwapa chakula, makao, na matibabu.

Wakimbizi wanahitaji mengi zaidi ya msaada wa kimwili. Wengi wao wameathiriwa kihisia kwa sababu ya mambo yaliyowapata, kwa hiyo wanahitaji pia faraja na tumaini. Mashahidi wa Yehova katika Ulaya ya Kati wanajitahidi kutimiza mahitaji hayo kwa kuwasikiliza na kuwaeleza ujumbe wenye kufariji kutoka katika Biblia.

Tangu Agosti 2015, Mashahidi kutoka makutaniko zaidi ya 300 nchini Austria na Ujerumani wamefanya jitihada ya pekee ili kuwafariji wakimbizi. Wametambua kwamba wakimbizi hupenda hasa kuzungumzia majibu ya maswali yafuatayo ya Biblia:

• Kwa nini watu wanateseka sana?

• Ni nini hutukia baada ya kifo?

• Ni habari gani njema kutoka katika Maandiko?

• Je, Mungu ana jina?

• Mashahidi wa Yehova ni nani?

Kati ya miezi ya Agosti na Oktoba 2015, Mashahidi wenyeji waliagiza zaidi ya tani nne za machapisho yanayotegemea Biblia kutoka katika ofisi ya tawi ya Ulaya ya Kati na wakawapa wakimbizi machapisho hayo bila malipo.

Wakimbizi wengi wanazungumza tu lugha yao ya kienyeji. Kwa hiyo, Mashahidi wanatumia tovuti ya jw.org, ambayo ina makala na video katika mamia ya lugha. “Wakati mwingine tunawasiliana kupitia ishara za mwili, picha, au michoro,” anasema Matthias na Petra, wanaojitolea huko Erfurt, Ujerumani. Pia wanatumia programu ya JW Lugha, programu ya kujifunza lugha inayowasaidia Mashahidi kushiriki ujumbe wa Biblia pamoja na wakimbizi katika lugha yao ya mama. Wengine wanatumia programu iliyo na lugha mbalimbali ya JW Library kusoma maandiko na kuonyesha video.

Wenzi wa ndoa Mashahidi kutoka Schweinfurt, Ujerumani wanasema hivi: “Watu wengi walituzunguka, katika muda wa masaa mawili na nusu, wakimbizi walikubali machapisho 360. Baadhi yao hata waliinamisha vichwa vyao kidogo wakitushukuru.” Wolfgang, anayejitolea Diez, Ujerumani anasema hivi: “Wakimbizi hawa wanafurahi kuona kwamba tunapendezwa nao, wakati mwingine wanaomba machapisho ya lugha tano au sita.” Wengi wao huanza kusoma chapisho mara moja, na wengine hurudi ili kuwashukuru Mashahidi. “Wanaume wawili vijana walichukua machapisho kadhaa,” anaeleza Ilonca, Shahidi huko Berlin, Ujerumani. “Baada ya muda wa nusu saa walirudi wakiwa na mkate, ambayo ilikuwa zawadi waliyotuletea. Wakaomba radhi kwa kuwa hawakuwa na kitu kingine ambacho wangetoa ili kuonyesha uthamini wao.”

Wafanyakazi wa jamii, maofisa, na majirani wanathamini jitihada za kujitolea za Mashahidi. “Asanteni!” akasema mfanyakazi mmoja wa jamii ambaye anawatunza wakimbizi 300 hivi. “Asanteni sana kwa kuhangaikia sana hali ya wakaaji wageni!” Mfanyakazi mwingine wa jamii anayefanya kazi katika kambi ya wakimbizi aliwaambia Mashahidi kwamba kuwapa wakimbizi kitu cha maana wasome katika lugha yao wenyewe ni jambo zuri sana, “kwa kuwa maisha yao ni yenye kutamausha sana.”

Marion na mume wake, Stefan, wanaoishi Austria, waliwaeleza maofisa wawili wa polisi waliokuwa wakishika doria kusudi lao la kufanya kazi ya kujitolea. Maofisa hao wakawashukuru na wakaomba vitabu viwili. Marion anasema: “Polisi hutupongeza mara nyingi kwa kazi tunayofanya.”

Mwanamke mmoja kule Austria ambaye hutoa mchango kwa ukawaida kwenye kambi moja aligundua kwamba hata hali ya hewa iweje Mashahidi bado walikuwa tayari kuwasaidia wakimbizi. Siku moja aliwaambia hivi: “Ni kweli kwamba wakimbizi wanahitaji msaada wa kimwili, lakini wanachohitaji zaidi ni tumaini, na hilo ndilo jambo ambalo ninyi mnawapa hasa.”