Baada ya mvua kubwa kunyesha kaskazini mwa Italia mnamo Novemba 2016, vijiji kadhaa vilivyo kusini ya jiji la Moncalieri vilikumbwa na mafuriko. Katika maeneo fulani maji yalifikia kina cha nusu mita hivi. Gazeti moja liliripoti hivi: “Maji hayo yalienea kwa kila mtu na kila kitu kiliathiriwa.” Wakazi 1,500 hivi wa eneo hilo walihamishwa mara moja na wenye mamlaka, na hakuna aliyekufa kutokana na janga hilo kwa kuwa waokoa-uhai walitenda haraka. Hata hivyo, familia nyingi zilipoteza mali zao.

Vikundi vya Mashahidi wenyeji vilianza kazi mara moja. Walisaidia familia zilizoathiriwa kwa kuondoa udongo na vifusi kutoka katika nyumba zao na kwa kukusanya bidhaa za nyumbani ambazo zingeweza kuokolewa. Kikundi kimoja kilipofika kwenye barabara fulani iliyokuwa imefungwa, wenye mamlaka waliwaruhusu wapite ili wakasaidie familia iliyokuwa na uhitaji. Wajitoleaji waliwasaidia Mashahidi wenzao pamoja na majirani wao wa dini nyingine.

Kwa mfano, jengo fulani la ghorofa lilikuwa limefurika kabisa katika chumba cha chini ya ardhi. Waokoa-uhai walivuta maji kwa kutumia pampu, kisha kikundi kikubwa cha Mashahidi kikamsaidia Shahidi mwenzao anayeitwa Antonio na familia yake kutoa uchafu uliokuwa umejaa katika chumba hicho. Kisha, wajitoleaji wakawasaidia wakaaji wengine wa jengo hilo. Walipanga mstari na baada ya saa chache tu, vyumba vyote vya chini vilikuwa vimeshughulikiwa. Kila mtu alishukuru sana kwa msaada huo. Viviana, mmoja wa wakaaji wa jengo hilo, alimwendea mke wa Antonio na kumwambia hivi huku akitokwa na machozi ya shukrani: “Tafadhali washukuru ndugu zako kwa niaba yetu​—ninyi ni watu wa pekee sana.”

Katika kijiji kimoja kilichoathiriwa vibaya sana na mafuriko hayo, wakaaji waliwatazama Mashahidi waliokuwa wakiwasaidia walioathiriwa na janga hilo. Wakichochewa na kile walichoona, baadhi ya wakaaji hao walijitolea kusaidia katika kazi hiyo ya kutoa msaada na walikuwa tayari kufuata mwelekezo wa msimamizi wa vikundi hivyo.

Nyumba ya mwanamume fulani iliharibiwa vibaya, na gereji lake lilifunikwa kabisa na udongo. Alishangaa kuona Mashahidi wanane wakifanya kazi mfululizo kwa saa nne ili kuondoa uchafu wote kutoka kwenye gereji lake. Kwa uthamini, aliwakumbatia baadhi ya wafanyakazi na kutuma ujumbe kwenye mtandao wa kijamii akishukuru kwa “msaada wao wenye thamani sana.”

Shahidi mmoja anaeleza hivi: “Tuliwasaidia baadhi wa majirani ambao si Mashahidi, wengi wao wakiwa na zaidi ya umri wa miaka 80. Baadhi yao walitokwa na machozi walipokuwa wakishukuru kwa mambo tuliyowafanyia.” Jirani mmoja ambaye ni Mkatoliki mwenye bidii katika kanisa la eneo hilo aliwaambia Mashahidi jinsi alivyothamini sana msaada wao, naye akaongezea hivi: “Ilipendeza kuona kwamba tulisaidiana ingawa tuna imani tofauti za kidini.” Mwanamume mwingine alisema hivi: “Ninasikitika sana kwamba watu wanawajua tu kwa kuwatembelea Jumapili asubuhi na hawajui kuhusu msaada mnaotoa.”