Kulikuwa na wasiwasi mwingi wakati wa mashindano maarufu ya mbio za baiskeli (Tour de France) ya 103, yaliyofanyika Julai 2 hadi 24, 2016. Mwaka uliotangulia, kulikuwa na matukio kadhaa ya ugaidi nchini Ufaransa na zaidi ya watu 100 walikufa. Kisha Julai 14, 2016, wakati wa sikukuu ya kitaifa, gaidi fulani alitumia lori kugonga watu waliokuwa wakitazama fataki katika jiji la Nice. Shambulio hilo lilisababisha vifo vya watu 86 na kuwajeruhi watu wengine wengi.

Katika hali hiyo ya hofu na maombolezo, Mashahidi wa Yehova walikuwa na hamu ya kuwapa watu nchini Ufaransa ujumbe wenye tumaini na faraja. Hivyo, Mashahidi waliweka vigari vya machapisho katika sehemu mbalimbali za mashindano ya Tour de France. Zaidi ya Mashahidi 1,400 walijitolea kushiriki katika kazi hiyo na machapisho zaidi ya 2,000 yanayotegemea Biblia yalitolewa kwa watu waliokuwa wakitafuta majibu ya maswali muhimu maishani.

Mashabiki waliokuwa wakifuata wachezaji kutoka mji mmoja baada ya mwingine, walishangaa kuwaona Mashahidi wa Yehova katika maeneo mengi. Zaidi ya mara moja wasimamizi wa mashindano hayo waliwapongeza Mashahidi wa Yehova kwa mipango mizuri. Walisema hivi: “Ni kana kwamba mpo kila mahali katika hatua zote za mashindano haya.” Mashabiki wengi walikuwa wakishangaa: “Yaani Mashahidi wa Yehova wako hapa pia!” Siku chache baadaye dereva wa basi aliyekuwa katika eneo la mashindano, alikataa kwa upole trakti aliyopewa, na akaeleza kwamba kufikia wakati huo alikuwa amepokea trakti nne tayari!

Kwa sababu ya kushangaa kuwaona Mashahidi kila mahali, baadhi ya watu waliamua kuchukua machapisho kwenye vigari hivyo kwa mara ya kwanza kabisa. Ilikuwa hivyo kwa mfanyakazi mmoja wa kituo cha televisheni cha michezo. Anakumbuka kuwaona Mashahidi katika mashindano ya Tour de France ya mwaka uliotangulia. Mwaka huu akaamua kwenda kwenye kigari cha machapisho na kuchagua kitabu Siri ya Kupata Furaha ya Familia kwa sababu kilizungumzia habari iliyomhusu. Baada ya kusoma sehemu fulani ya kitabu hicho akiwa kwenye gari lake, aliwaeleza wafanyakazi wenzake kuhusu vigari hivyo vya machapisho, na wao pia wakaenda na kuchukua machapisho kuhusu mambo mbalimbali.

Baadhi ya wageni waliokuja kwenye mashindano hayo waliwatafuta Mashahidi wa Yehova na kuwaeleza mambo yao ya kibinafsi. Msichana mmoja aliwaeleza Mashahidi kwamba alikuwa amekata tamaa na hata alikuwa akifikiria kujiua siku hiyo kwa kujitupa mbele ya treni. Lakini baada ya kusikia ujumbe unaotia moyo wa Neno la Mungu kuhusu wakati ujao wenye amani chini ya Ufalme wa Mungu, alifarijika na akaamua kwamba hatajiua. Mwanamke mwingine aliwaambia Mashahidi hivi: “Endeleeni kufanya kazi yenu nzuri!”

Mwanamume moja anayetumia magongo ya kutembelea alisema kwamba sikuzote yeye huwaogopa watu asiowafahamu, lakini alikubali kusaidiwa na mwanamke fulani aliyevalia vizuri baada ya kutambua kwamba alikuwa Shahidi wa Yehova. Alisema hivi: “Asante kwa tabasamu lako na jinsi ulivyovalia kwa heshima. Mwonekano wako unamchochea mtu akuamini.”