Jumamosi, Oktoba 5, 2013, watu 257,294 kutoka nchi 21 walihudhuria mkutano wa 129 wa kila mwaka wa Watch Tower Bible and Tract Society of Pennsylvania. Baadhi ya wasikilizaji hao walikuwepo kibinafsi kwenye jumba lililofanyiwa mkutano huo na wengine walisikiliza kupitia Intaneti. Baadaye katika mwisho juma huohuo, Mashahidi wengine waliona marudio ya tukio hilo. Kwa ujumla watu 1,413,676 kutoka nchi 31 walihudhuria. Kufikia sasa, mkutano wa mwaka huu umevunja rekodi kwa idadi kubwa ya wahudhuriaji tangu Aprili 28, 2013 ambapo watu 1,327,704 walihudhuria programu ya pekee iliyofanyika nchini Mexico na Amerika ya Kati.

Mashahidi wa Yehova walianza kutangaza makusanyiko yao kwa wasikilizaji waliotawanyika sehemu mbalimbali duniani tangu miaka ya 1920. Walifanya hivyo kupitia simu na vituo mbalimbali vya redio. Sasa, teknolojia ya Intaneti imewawezesha wasikilizaji walio maeneo ya mbali sana ya ulimwengu kusikiliza na kujionea matukio kama yanavyotendeka wakati huohuo au kuyaona matukio hayo baadaye. William, ambaye ni Shahidi wa Yehova nchini Marekani, alihudhuria kusanyiko fulani la Mashahidi wa Yehova huko Richmond, Virginia, mwaka wa 1942 na kusikiliza programu hiyo kupitia simu. Akilinganisha tukio hilo na tukio la mwaka huu la mkutano wa kila mwaka, anasema: “Unafaidika zaidi kutokana na programu unapoitazama. Jambo hilo haliwezi kulinganishwa na chochote.”

Washiriki wa ofisi kadhaa za tawi za Mashahidi wa Yehova walitengeneza mfumo wa kuonyesha tukio hilo kupitia Intaneti. Kazi hiyo ilichukua zaidi ya mwaka mmoja huku wajitoleaji hao wakitumia maelfu ya saa ili kuifanikisha. Mwisho-juma wakati wa mkutano huo wa kila mwaka, mafundi wa mitambo walisimamia jinsi mfumo huo ulivyokuwa ukifanya kazi. Walifanya kazi hiyo wakiwa kwenye kituo cha kuongozea huko Brooklyn, New York, na wakahakikisha kwamba nyakati zote angalau kulikuwa na mtu fulani katika kituo hicho ambaye alisimamia utendaji mzima wa mfumo huo kwani tukio hilo lingeonyeshwa katika maeneo mbalimbali 15 duniani yanayotofautiana kwa wakati. Ryan, aliyesaidia kutengeneza na kusimamia utendaji wa mfumo huo, alisema hivi: “Hatukulala vizuri, lakini tulifurahi sana kujua kwamba jitihada zetu hazikuwa za bure kwani watu wengi walifaidika kutokana na programu hiyo.”