Kabla ya kuagiza Biblia ya maandishi ya vipofu kutoka kwa Mashahidi wa Yehova, hakikisha kwamba una mahali pa kutosha pa kuiweka. Biblia nzima ya Tafsiri ya Ulimwengu Mpya yenye maandishi ya vipofu, ambayo inapatikana katika Kiingereza, Kihispania, na Kiitaliano, ina jumla ya mabuku kati 20 na 28 ambayo yanahitaji nafasi ya angalau mita mbili (futi 6 na inchi 5) kwenye rafu!

Biblia nyinginezo hazihitaji nafasi kubwa kama Biblia za maandishi ya vipofu. Mashine ya kupiga chapa maandishi ya vipofu huwawezesha vipofu kuandika na pia kusoma habari zilizohifadhiwa kielektroni kupitia kifaa cha mkononi chenye pini zinazoinuka na kushuka na kutokeza maandishi ya vipofu. Pia, vipofu wanaweza kupata na kusikiliza machapisho kwa kutumia programu zinazoweza kusoma maandishi kwenye skrini, ambazo hubadili maandishi kuwa sauti.

Zaidi ya hayo, Mashahidi wamebuni programu ya kompyuta inayoweza kubadili maandishi ya kawaida yawe maandishi ya vipofu katika lugha nyingi. Baada ya kutayarisha jedwali lenye herufi za lugha fulani na pia herufi za maandishi ya vipofu katika lugha hiyo, programu hiyo inaweza kubadili maandishi ya kawaida yawe maandishi ya vipofu. Pia hutumia mpangilio ambao hufanya iwe rahisi kwa vipofu kusoma maandishi hayo. Programu hiyo itafanya iwezekane kutayarisha machapisho ya vipofu, kutia ndani Biblia, katika lugha yoyote ile yenye herufi za maandishi ya vipofu, hata zile zisizotumia herufi za Kiroma.

Kwa zaidi ya miaka 100, Mashahidi wamekuwa wakichapisha machapisho yanayozungumzia Biblia kwa ajili ya vipofu, nayo machapisho hayo sasa yanapatikana katika lugha 19. Ingawa vipofu wanaopenda kujifunza Biblia wanaweza kupata machapisho hayo bila malipo, wengi wao hutoa mchango wa hiari.

Awali, chapisho jipya lilipotolewa kwenye kusanyiko la Mashahidi, wahudhuriaji walijulishwa kwamba wanaweza kuagiza baadaye machapisho ya maandishi ya vipofu. Mwaka uliopita, ofisi ya tawi ya Marekani ilifanya uchunguzi katika makutaniko ili kujua vipofu walio wengi wanapanga kuhudhuria wapi kusanyiko la wilaya, na chapa wanayopendelea (karatasi, kifaa cha kupiga chapa maandishi ya vipofu, na programu ya kusoma maandishi kwenye skrini).

Nakala zenye maandishi hayo zilisafirishwa hadi mahali pa makusanyiko ambayo vipofu walihudhuria, jambo lililofanya iwezekane kwao kupata machapisho mapya wakati uleule wengine walipoyapata. Nakala za kielektroni zilitumwa kupita barua-pepe kwa kila mmoja wao juma moja baada ya kusanyiko.

Shahidi kipofu alisema hivi: “Nilifurahi sana kupokea machapisho pamoja na wengine wote. Zaburi 37:4 inasema kwamba Yehova atatupa maombi ya moyo wetu. Amefanya hivyo mwisho juma huu!” Mwingine alianza kulia na kusema: “Walikuwa wakinifikiria. Tunamshukuru sana Yehova kwa kutujali sana.”