MAONI YA BIBLIA

Pombe Pombe

Je, ni vibaya kunywa pombe?

‘Divai ya kutuchangamusha, mafuta ya zeituni ya kutufurahisha, na mukate wa kutupa nguvu.’​—Zaburi 104:15, Biblia Habari Njema.

MAMBO AMBAYO WATU WANASEMA Katika familia nyingi, pombe ni kinywaji cha kawaida, ambacho kinatumiwa pamoja na chakula. Katika familia zingine, pombe inakatazwa kabisa. Sababu gani watu wana maoni hayo tofauti juu ya pombe? Watu wanachochewa na mambo mbalimbali, kama vile desturi, mahangaiko ya afya, na dini.

MAMBO AMBAYO BIBLIA INASEMA Biblia inakataza ulevi na kunywa kupita kiasi lakini haikataze kunywa pombe kwa kiasi. (1 Wakorintho 6:9, 10) Kwa kweli, tangu nyakati za zamani, wanaume na wanawake ambao walikuwa watumishi wa Mungu walikunywa divai, kinywaji ambacho kinatajwa mara zaidi ya mia mbili katika Biblia. (Mwanzo 27:25) Andiko la Mhubiri 9:7 linasema hivi: ‘Kula chakula chako kwa kushangilia na kunywa divai yako kwa moyo muchangamufu.’ Kwa sababu divai inachangamusha moyo wa mutu, ilikuwa inatumiwa zaidi wakati wa karamu, kama vile karamu za ndoa. Yesu Kristo alifanya muujiza wake wa kwanza, ni kusema, kugeuza maji kuwa “divai nzuri” kwenye karamu kama hiyo. (Yohana 2:1-11) Divai ilitumiwa pia kama dawa.​—Luka 10:34; 1 Timotheo 5:23.

 Je, Biblia inasema kuhusu kiasi cha pombe ambacho mutu anapaswa kunywa?

“[Musiwe] watumwa wa divai nyingi sana.”​—Tito 2:3.

SABABU GANI NI LAZIMA UJUE JAMBO HILO? Kila mwaka, familia nyingi zinateseka kwa sababu muzazi mumoja ao wazazi wote wawili wanakunywa pombe kupita kiasi. Kunywa pombe kupita kiasi kunachangia pia kufanya makosa mengi na aksidenti nyingi, kutia ndani aksidenti za barabarani. Na baada ya muda, kunywa pombe kupita kiasi kunaweza kuharibu ubongo, moyo, maini, na matumbo.

MAMBO AMBAYO BIBLIA INASEMA Mungu anatuomba tukule na kunywa kwa kiasi. (Methali 23:20; 1 Timotheo 3:2, 3, 8) Tunaweza kukataliwa na Mungu ikiwa tunakosa sifa ya kujizuia katika mambo hayo. Biblia inasema hivi: ‘Divai ni muzihaki, kileo kinasababisha musukosuko, na kila mutu anayepotezwa nacho hana hekima.’​—Methali 20:1.

Njia moja ambayo kupitia hiyo pombe inaweza kupoteza mutu asiye na hekima ni kuharibu tabia zake nzuri. Andiko la Hoshea 4:11 linasema hivi: “Divai na divai tamu ndivyo vinavyoondoa kusudi jema.” Mwanaume anayeitwa John alijifunza jambo hilo baada ya kupata matokeo mabaya. * Kisha kubishana na bibi yake, alienda kwenye hoteli, akakunywa pombe sana na kisha akafanya uzinifu; matendo ambayo yalimuhuzunisha sana kisha hapo na akaamua kwamba hawezi tena kuyarudilia. Kunywa pombe kupita kiasi kunaweza kutuletea matokeo mabaya ya kimwili, kuharibu mwenendo wetu na hali yetu ya kiroho, na Biblia inasema kwamba walevi hawatapata uzima wa milele.​—1 Wakorintho 6:9, 10.

Ni wakati gani si vizuri kunywa pombe?

“Mutu mwenye akili anaona uovu na kujificha, lakini wajinga wanaendelea mbele na wanaumia.”​—Methali 22:3, La Sainte Bible en swahili de la R.D. Congo.

SABABU GANI NI LAZIMA UJUE JAMBO HILO? Kitabu kimoja (World Book Encyclopedia) kinasema kwamba “pombe ni dawa ya kulewesha yenye nguvu sana.” Kwa hiyo, kunaweza kuwa hali fulani ao wakati ambao si jambo la hekima kunywa pombe hata kwa kiasi.

MAMBO AMBAYO BIBLIA INASEMA Mara nyingi watu “wanaendelea mbele [katika uovu]” kwa sababu wanakunywa pombe wakati usiofaa. Biblia inasema kwamba “kuna wakati uliowekwa wa kila kitu,” na hata wakati wa kujizuia kunywa pombe. (Mhubiri 3:1) Kwa mufano, katika inchi fulani mutu anaweza kuwa kijana sana hivi kwamba sheria ya inchi haimuruhusu kunywa pombe, anaweza kuwa ni mutu ambaye alizoea pombe sana na sasa anajikaza kuacha pombe, ao anaweza kuwa mwenye kutumia dawa ambayo haipatane na pombe. Na kwa watu wengi, “wakati uliowekwa” wa kujizuia kunywa pombe ni mbele ya kuenda kwenye kazi na wakati wa kazi, zaidi sana ikiwa wanatumia mashini ambazo zinaweza kutokeza hatari. Kwa hakika, watu wenye hekima wanaona uzima na afya kuwa zawadi za maana sana kutoka kwa Mungu. (Zaburi 36:9) Tunaonyesha kwamba tunaheshimu zawadi hizo wakati tunaacha kanuni za Biblia ziongoze maoni yetu juu ya pombe.

[Maelezo ya chini]

[Picha katika ukurasa wa 14]