Ulianza namna gani kufanya uchunguzi wa kisayansi?

Nilipoingia kwenye masomo ya juu, nilichagua kujifunza elimu ya asili ya vitu na mabadiliko yake. Nilivutiwa sana na proteini na asidi nikleiki, ambazo ni molekuli zilizofanywa kwa ufundi wa hali ya juu sana kwenye dunia yetu. Kisha, nikavutiwa sana na namna molekuli fulani zinavyofanya kazi wakati zinapata mwangaza wa jua.

Je, ulikuwa unamuamini Mungu?

Nilikuwa ninamuamini Mungu nilipokuwa kijana mudogo. Lakini baadaye, wakati nilianza kusoma kwenye masomo ya juu ya Wakatoliki ya Leuven, nilifundishwa kwamba viumbe vilivyo na uzima vilitokana na mageuzi. Walimu wa masomo ya juu walifanya fundisho hilo la mageuzi liwe lenye kuvutia na lionekane kuwa la kweli. Walimu hao walikuwa wanasayansi wenye ujuzi mwingi, kwa hiyo niliamini mambo waliyosema. Mwishowe, ilikuwa vigumu kwangu kuamini kwamba kuna Mungu.

Ni jambo gani lilikufanya ufikirie tena namna uzima ulianza?

Katika mwaka wa 1999, nilikutana na rafiki niliyesoma naye ambaye alikuwa sasa Shahidi wa Yehova, na nilihuzuria mukutano wao mumoja. Pia karibu wakati huo, Shahidi mumoja alitutembelea nyumbani kwetu na akaacha kitabu Je, Kuna Muumba Anayekujali? *

Ulifikiri nini juu ya kitabu hicho?

Nilivutiwa sana na uchunguzi wa hali ya juu ambao ulifanywa na waandikaji wa kitabu hicho. Nilianza kujiuliza ikiwa fundisho la mageuzi lilieleza kweli juu ya vitu vinavyotuzunguka.

Ni vitu gani vinavyotuzunguka ambavyo vilikuvutia?

Kazi yangu ya mwanasayansi ilitia ndani kujifunza namna molekuli fulani za viumbe wadogo​-wadogo wanaoishi katika bahari zinavyofanya kazi, viumbe hao wanaoitwa cyanobacteria ni wadudu wadogo  sana ambao wanaonekana tu kupitia darubini na hawategemee viumbe wengine walio na uzima ili kupata chakula. Wachunguzi fulani wanafikiri kwamba wadudu hao wadogo sana walikuwa ndio viumbe wa kwanza walio na uzima kwenye dunia yetu hii. Kwa kutumia mwangaza wa jua, wadudu hao wadogo sana wanatumia mupangilio fulani wa kemikali ulio ndani ya miili yao ambao ni mugumu kueleweka. Wanasayansi hawajaelewa vizuri kabisa mupangilio huo. Kupitia mupangilio huo maji na kaboni dioksidi vinageuzwa kuwa chakula. Nilishangazwa pia na namna wadudu hao wadogo sana wanavyoweza kuvuta mwangaza wa jua kwa ufundi wa hali ya juu sana.

Majani pia yanatumia mwangaza wa jua ili kutengeneza chakula. Basi, ni jambo gani ambalo linashangaza sana kuhusu wadudu hao wadogo sana?

Kadiri unavyoshuka zaidi ndani ya bahari, ndivyo mwangaza unavyokuwa mudogo. Kwa hiyo, wadudu hao wadogo sana ambao wanaishi ndani ya bahari wanavuta kila mwangaza mudogo ambao wanapata, na wanafanya hivyo kupitia antena zao za hali ya juu sana. Nguvu za mwangaza ambazo wadudu hao wadogo sana wanavuta zinawasaidia kugeuza kwa usahihi kabisa maji na kaboni dioksidi kuwa nguvu ao chakula katika miili yao. Ufundi ambao wadudu hao wanatumia ili kuvuta mwangaza wa jua umevutia hata watengenezaji wa vyombo vinavyotumiwa kunasa mwangaza wa jua ili kutokeza umeme. Bila shaka, vyombo hivyo vinavyotengenezwa ili kunasa mwangaza wa jua haviwezi kulinganishwa hata kidogo na mipangilio ya kuvuta mwangaza inayopatikana ndani ya miili ya wadudu hao wadogo sana.

Hilo lilikufanya ufikie uamuzi gani?

Nilifikiri juu ya namna mainjinia ao mafundi wanaotengeneza vitu wanavyojaribu kuiga njia ya ajabu ya kufanya kazi inayopatikana ndani ya miili ya viumbe vilivyo na uzima, na nikafikia uamuzi wa kwamba uzima unapaswa kuwa ulianzishwa na Mungu. Lakini imani yangu haikutegemea tu mambo ambayo nilijifunza katika sayansi. Ilitegemea pia kujifunza Biblia kwa uangalifu.

Ni jambo gani lilikusadikisha kwamba Biblia iliongozwa na roho ya Mungu?

Jambo moja kati ya mambo ambayo yalinisadikisha kwamba Biblia iliongozwa na roho ya Mungu ni kutimizwa kwa unabii mbalimbali wa Biblia. Kwa mufano, mamia ya miaka mbele ya wakati, Isaya alieleza mambo mengi juu ya kifo na kuzikwa kwa Yesu. Tunajua kwamba unabii huo wa Isaya uliandikwa mbele ya kifo cha Yesu kwa sababu kitabu cha kukunjwa cha Isaya, kilichopatikana huko Qumran, kiliandikwa kwa mukono miaka mia moja hivi mbele ya Yesu kuzaliwa.

nabii huo unasema hivi: “Atafanya kaburi lake liwe pamoja na waovu, na pamoja na jamii ya matajiri katika kifo chake.” (Isaya 53:9, 12) Jambo la kushangaza ni kwamba Yesu aliuawa pamoja na watenda maovu lakini alizikwa katika kaburi la familia ya watu matajiri. Huo ni mufano mumoja tu kati ya unabii mwingi uliotimizwa ambao ulinisadikisha kwamba Biblia iliongozwa na roho ya Mungu. (2 Timotheo 3:16) Kisha, nikakuwa Shahidi wa Yehova.

Sababu gani unafurahia kuwa Shahidi wa Yehova?

Imani yetu si imani ya kijinga tu inayopuuza mambo ya hakika ya sayansi. Pia, kanuni ambazo zinatuongoza zinategemea kabisa Biblia. Nikiwa Shahidi wa Yehova, ninafurahia kuwaelezea wengine ujumbe wa Biblia wenye kufariji na kuwasaidia kupata majibu ya maulizo yao.