LINAONEKANA kuwa jambo la kushangaza sana: Hata wakati watu wana tatizo la kupoteza kazi yao, nyumba yao, na hata wakati wanakosa kulipwa feza za uzee kisha kufanya kazi kwa miaka mingi, wengi kati yao wanaendelea kutafuta kwa bidii ili kupata jambo lolote ao kitu chochote ambacho feza zinaweza kununua.

Watu kama hao wanadaganywa kwa vyepesi na watangazaji wa biashara, ambao njia zao za matangazo zenye kushawishi zinatuonyesha kwamba tunapaswa kuwa na nyumba kubwa, motokari nzuri, na nguo za mutindo wa hali ya juu. Hauna feza za kulipa sasa? Hakuna shida, unaweza kununua kwa deni! Kwa watu wengi, muradi ni kuonekana vizuri hata ikiwa wana madeni mengi.

Bila shaka, siku moja ukweli utajulikana. Kitabu kimoja kinasema kwamba “kununua vitu vingi vyenye kuvutia kwa deni ili tu kuonekana na kujisikia kama mushindi ni kama vile kutumia dawa kali ya kulewesha ili kujisikia vizuri.” (The Narcissism Epidemic) “Mambo hayo mawili yanaonekana kuwa mepesi mwanzoni na yanaendeka vizuri, lakini ni kwa muda mufupi tu. Baadaye mambo hayo mawili yanamuacha mutu bila kitu kabisa na mwenye kushuka moyo.”

Biblia inaonyesha waziwazi upumbavu wa ‘mutu kujionyesha mali yake maishani.’ (1 Yohana 2:16) Ukweli ni kwamba kutafuta kwa bidii vitu vya kimwili kunatufanya tusahau mambo ya maana zaidi katika maisha, ni kusema, mambo ambayo feza haziwezi kununua. Fikiria mambo matatu.

Brianne, * kijana mwanamuke anayeishi huko Amerika, anafikiri kwamba baba yake anaona kazi yake kuwa ya maana sana na feza ambazo anapata kutokana na kazi hiyo. Brianne anasema hivi: “Tuna kila kitu ambacho tunahitaji na hata zaidi. Lakini baba yangu hapatikane nyumbani kwa sababu anasafiri sikuzote. Ninajua hilo ni kwa sababu ya kazi yake, lakini ninawaza kwamba ana daraka la kuhangaikia pia familia yake!”

Jambo la kufikiria: Baba ya Brianne anaweza kujuta ao kuhuzunika juu ya mambo gani baadaye katika maisha? Kwa kuhangaikia sana vitu vya kimwili, hilo lina matokeo gani juu ya uhusiano wake pamoja na binti yake? Zaidi ya feza, ni mambo gani mengine familia yake inahitaji kutoka kwake?

Kanuni za Biblia za kufikiria:

• “Kupenda pesa ni chanzo cha mambo mabaya ya namna zote, na kwa kujitahidi kufikia upendo huo wengine . . . wamejichoma wenyewe kila mahali kwa maumivu mengi.”​—1 Timotheo 6:10.

• ‘Afazali chakula cha mboga za majani mahali penye upendo kuliko ng’ombe​-dume aliyenoneshwa pamoja na chuki.’​—Methali 15:17.

Jambo la maana: Feza haziwezi kununua umoja wa familia. Umoja wa familia unatokana tu na kupitisha wakati pamoja na watu wa familia yako, kuwaonyesha upendo wa kweli, na kuwahangaikia.​—Wakolosai 3:18-21.

Sarah, aliye na miaka 17, anasema hivi: “Mama yangu ananiambia sikuzote kwamba inaomba niolewe na mutu aliye na feza nyingi na kujifunza kazi fulani ili niweze kupata kazi nzuri ya kunisaidia nijitegemeze ikiwa bwana yangu anakataa kunipatia feza zake. Jambo moja ambalo anafikiria tu ni namna ya kuendelea kupata feza.”

Jambo la kufikiria: Unapofikiri juu ya wakati unaokuja, ni mahangaiko gani yenye kufaa yanayokusumbua akili? Ni wakati gani mahangaiko yenye kufaa yanapita kiasi na kuwa wasiwasi usio na maana? Namna gani mama yake na Sarah anaweza kuwa na usawaziko juu ya kuhangaikia sana usalama unaotegemea feza?

Kanuni za Biblia za kufikiria:

• ‘Acheni kujiwekea hazina duniani, ambako nondo na kutu vinakula, na ambako wezi wanavunja na kuiba.’​—Mathayo 6:19.

• ‘Hamujui uzima wenu utakuwa namna gani kesho.’​—Yakobo 4:14.

Jambo la maana: Kujirundikia feza hakuwezi kufanya uwe na usalama wakati unaokuja. Kwa vyovyote, feza zinaweza kuibwa, na haziwezi kuponyesha magonjwa ao kuzuia kifo. (Mhubiri 7:12) Biblia inafundisha kwamba usalama wa kweli unatokana na kumujua Mungu na kusudi lake.​—Yohana 17:3.

Tanya, aliye na miaka 24, anasema hivi: “Nilipokuwa ninakomaa, wazazi wangu walinifundisha kuishi maisha mepesi. Mimi na dada yangu pacha tulifurahia kukomaa hivyo, hata ikiwa mara nyingi tulikuwa tu na vitu vya lazima maishani.”

Jambo la kufikiria: Sababu gani inaweza kuwa vigumu kutosheka na vitu vya lazima maishani? Unawekea familia yako mufano gani kuhusiana na maoni yako juu ya feza?

Kanuni za Biblia:

• ‘Tukiwa na chakula na kitu cha kujifunika, tutarizika na vitu hivyo.’​—1 Timotheo 6:8.

• “Wenye furaha ni wale wanaotambua uhitaji wao wa kiroho.”​—Mathayo 5:3.

Jambo la maana: Kuna mambo mengine ya maana zaidi katika maisha kuliko feza na vitu ambavyo feza zinaweza kununua. Kwa vyovyote, kama vile Biblia inavyosema: ‘Hata wakati mutu ana vitu vingi uzima wake hautokane na vitu alivyo navyo.’ (Luka 12:15) Kwa kweli, furaha ya kweli katika maisha inatokana na kujua majibu ya maulizo ya maana kama vile:

• Sababu gani tuko hapa duniani?

• Wakati unaokuja utakuwa namna gani?

• Ninaweza kutosheleza mahitaji yangu ya kiroho namna gani?

Wachapishaji wa gazeti hili, Mashahidi wa Yehova, watafurahi kukusaidia upate majibu ya maulizo hayo.