Tueleze kidogo juu ya maisha yako.

Nilizaliwa katika mwaka wa 1963 na nilikomalia katika inchi ya China, katika kijiji kinachopatikana kusini mwa Muto Yangtze, jimbo la Jiangsu. Ni eneo lenye joto na baridi na linajulikana kwa sababu kuna chakula kingi, kwa hiyo eneo hilo linaitwa kila mara inchi ya muchele na samaki. Nilipokuwa mutoto, nilijiuliza mara nyingi: ‘Sababu gani kuna aina nyingi ya chakula kizuri? Je, aina hizo zilijitokeza? Kati ya kuku na yayi, ni nini ilianza kutokea?’ Watu wengi hawaamini kwamba kuna Mungu katika inchi ya China, kwa hiyo nilifundishwa mageuzi kwenye masomo.

Tuambie kuhusu familia yenu.

Wazazi wangu hawakuwa wanaamini Mungu. Mama yangu alikuwa mulimaji, na baba yangu alikuwa mujenzi na alianzisha kompanyi ya ujenzi. Tulizaliwa watoto vijana watano, mimi ndiye wa kwanza. Jambo la kusikitisha ni kwamba, kaka zangu wawili walikufa walipokuwa wadogo. Hilo lilinihuzunisha sana na nilijiuliza: ‘Sababu gani watu wanakufa? Siku moja nitaona tena kaka zangu?’

Sababu gani ulijifunza sayansi?

Nilitaka kujifunza fizikia kwa sababu nilishangazwa sana na mazingira na nilifikiri kwamba elimu hiyo inaweza kunisaidia nipate majibu kwa maulizo ambayo nimejiuliza tangu utoto.

Unafanya utafiti katika mambo gani?

Ninajifunza namna ya kuongeza mwendo wa visehemu vyenye umeme uwe karibu sawa na mwendo wa mwangaza. Ninafanya hivi kwa kujifunza namna atomu zimeundwa. Ninafanya pia utafiti kuhusu  namna ya kutokeza miale yenye umeme mwingi kama ile ya mikrowevu na miale nyekundu. Hata ikiwa utafiti huo unaniletea feza, unanisaidia pia kuelewa namna ulimwengu ulianza.

Namna gani ulianza kupendezwa na Biblia?

Katika mwaka wa 1998, Mashahidi wa Yehova wawili walitutembelea. Waliahidi kujibu maulizo yangu kupitia Biblia. Bibi yangu, Huabi, ambaye pia ni mwanasayansi anayefanya utafiti, alijiunga na sisi. Ilikuwa mara yetu ya kwanza kuona Biblia, na tulishangazwa sana na mashauri yake mazuri. Tuliona namna Mashahidi hao wenye kuoana walifaidika sana kwa kutumikisha kanuni za Biblia. Walikuwa na furaha na waliishi maisha isiyokuwa na matatizo mengi. Lakini mambo ambayo Biblia inasema juu ya Mungu yalinifanya nijiulize tena ikiwa ulimwengu uliumbwa kabisa. Kwa sababu mimi ni mwanafizikia, kazi yangu ni kutafuta kuelewa mazingira. Kwa hiyo niliamua kuanza kuchunguza mambo kwa uangalifu zaidi.

Ni mambo gani ulichunguza?

Kwanza, nilijua kwamba haiwezekane vitu vipangwe vizuri ikiwa hakuna mutu fulani ambaye amevipanga hivyo. Hiyo ni sheria ya pili kuhusu uhusiano kati ya joto na aina zingine za nguvu ao nishati. Kwa sababu ulimwengu na viumbe vilivyo duniani vimepangwa kwa utaratibu wa hali ya juu, nilifikia kukubali kwamba kunapaswa kuwa Muumbaji. Jambo la pili ni kwamba ulimwengu wote muzima na dunia vinaonekana kwamba viliumbwa kabisa ili kutegemeza uzima.

Ulijionea mambo gani yanayoonyesha kwamba kuna Muumbaji?

Kwa kawaida vitu vyote ambavyo vinaishi katika dunia vinategemea joto ya jua. Joto hiyo inasafiri katika anga kama miale. Inafika katika dunia ikiwa kama mwangaza wenye rangi na urefu mbalimbali. Miale mifupi zaidi ni miale gamma iliyo hatari sana. Kisha kuna miale X, miale ya urujuanimno, mwangaza unaoonekana, miale nyekundu, mikrowevu, na miale iliyo mirefu zaidi kuliko yote, ni kusema, mawimbi ya redio. Jambo la kupendeza ni kwamba, angahewa inazuia miale iliyo hatari sana kwa wanadamu na inatupitishia miale ya lazima.

Sababu gani jambo hilo lilikushangaza sana?

Nilishangazwa sana na namna Biblia inaanza kwa kuzungumuzia uumbaji na namna inataja pia mwangaza. Inasema hivi: “Mungu akasema: ‘Kuwe na nuru [mwangaza].’ Kukawa na nuru.”¹ Ni sehemu ndogo tu ya miale mbalimbali ya jua ndiyo inafanyiza mwangaza unaoonekana, lakini mwangaza unategemeza sana uzima. Mimea inahitaji mwangaza ili kutengeneza chakula, na sisi tunauhitaji ili kuona. Uwezo wa angahewa wa kutupitishia mwangaza huo haukujitokeza. Hata kiasi kidogo cha miale ya urujuanimno ambayo inafika hapa katika dunia ni ya lazima sana.

Sababu gani miale hiyo ni ya lazima?

Miale fulani ya urujuanimno ni hatari. Ngozi yetu inahitaji kiasi kidogo cha miale hiyo ili kutengeneza vitamini D, ambayo inasaidia mifupa iwe nguvu na inatulinda na kansa na magonjwa mengine. Lakini, kiasi kingi cha miale hiyo kinaleta kansa ya ngozi na kinaharibu mboni ya jicho. Angahewa inaruhusu kiasi kidogo cha miale ya urujuanimno ifike kwenye dunia, na ni kiasi cha kutosha kabisa. Hilo linanihakikishia mimi kwamba kuna mutu fulani ambaye aliumba dunia ili viumbe viishi ndani yake.

Pole kwa pole Huabi na mimi tulianza kukubali kwamba kuna Muumbaji na kwamba ni yeye alioongoza wale walioandika Biblia. Katika mwaka wa 2005, tukakuwa Mashahidi wa Yehova, na sasa tunafundisha wengine Biblia.