Biblia haionyeshe sababu. Lakini, inazungumuzia habari fulani za maana zenye njo pengine zilifanyaka waamue vile.

Malaika alimuambia Maria kama atapata mimba na atazala mutoto. Wakati ule malaika alimuambia ile habari, Maria na Yosefu walikuwa naishi Nazareti, yenye ilikuwa mu Galilaya, muji wa Yosefu. (Lu. 1:26-31; 2:4) Kisha, wakati walitoka Misri, walirudia Nazareti. Yesu alikomalia kule na akakuwa Munazareti. (Mt. 2:19-23) Njo maana, wakati tunataya Yesu, Yosefu, na Maria, tunafikiriaka Nazareti.

Maria alikuwa na mutu wa jamaa mwenye kuitwa Elizabeti, mwenye aliishi Yuda. Elizabeti alikuwa bibi wa kuhani Zekaria na mama wa Yohana Mubatizaji. (Lu. 1:5, 9, 13, 36) Maria aliendaka kumutembelea Elizabeti na wakabakia pamoya miezi tatu mu Yuda. Kisha Maria alirudia Nazareti. (Lu. 1:39, 40, 56) Kwa hiyo, kwa njia fulani, Maria alikuwa najua eneo ya Yuda.

Ku mwisho, Yosefu alitii amri ya “kuandikishwa.” Kwa hiyo, alitoka Nazareti na kuenda Betlehemu, yenye ilikuwa “muji wa Daudi,” na njo kwenye Masiya angezaliwa, kulingana na unabii. (Lu. 2:3, 4; 1 Sa. 17:15; 20:6; Mik. 5:2) Kisha Maria kumuzala Yesu kule, Yosefu hakumuomba Maria afanye safari ya murefu ya kurudia Nazareti na iko na mutoto mwenye kunyonya. Walibakia Betlehemu, yenye ilikuwa ku kilometre kenda hivi kutoka Yerusalemu. Ingekuwa mwepesi kwao kuenda na mutoto wao ku hekalu na kutoa zabihu yenye Sheria iliomba.​—Law. 12:2, 6-8; Lu. 2:22-24.

Malaika wa Mungu alikuwa alishaambia Maria kama mutoto wake mwanaume njo atapewa “kiti cha ufalme cha Daudi” na “atatawala akiwa Mufalme.” Pengine Yosefu na Maria waliwaza kama ilikuwa jambo ya muzuri Yesu azaliwe mu muji wa Daudi. (Lu. 1:32, 33; 2:11, 17) Na Pengine waliwaza kama ilikuwa jambo ya hekima wabakie kule mupaka Mungu awaambie jambo ingine yenye alipenda wafanye.

Hatujue kama walikuwa wameishi Betlehemu kwa muda gani wakati watu fulani wenye elimu ya nyota walifika. Lakini, kufikia ile wakati, walikuwa naishi mu nyumba fulani na ‘mutoto wao mudogo,’ mwenye hakukuwa nanyonya tena. (Mt. 2:11) Inaonekana kama, kuliko kurudia kaskazini mu Nazareti, walibakia Yerusalemu kwa wakati fulani na waliifanya ikuwe muji wao.

Herode alitoa amri ya kama “watoto wote wanaume katika Betlehemu. . . kuanzia miaka mbili na kushuka chini” wauawe. (Mt. 2:16) Malaika alimuonya Yosefu juu ya ile; kwa hiyo yeye na bibi yake Maria walikimbilia Misri pamoya na Yesu, na waliishi kule mupaka wakati wenye Herode alikufa. Kisha, Yosefu alienda na familia yake Nazareti. Juu ya nini hawakurudia Betlehemu? Juu ya kuepuka Arkelao, mutoto wa Herode, mwenye alikuwa mubaya sana na mwenye alikuwa anatawala Yudea ile wakati. Zaidi ya ile, malaika alimuonya tena Yosefu kwa kumuambia juu ya hatari ya kurudia kule. Mu Nazateti njo mwenye Yosefu angemukomalishia Yesu kwa usalama.​—Mt. 2:19-22; 13:55; Lu. 2:39, 52.

Inawezekana, Yosefu alikufa mbele Yesu akufe na mbele afungulie watu wengine njia ya kuenda mbinguni. Njo maana, wakati Yosefu atafufuliwa, ataishi ku dunia. Kwa hiyo, watu wengi watapata nafasi ya kumuona na kumuuliza mambo mingi zaidi kuhusu sababu yenye ilifanyaka yeye na Maria wabakie Betlehemu kisha Yesu kuzaliwa.