1-2. Juu ya nini ni muzuri tujifunze habari ya Samsoni?

 NINI inakuyaka mu akili yako ukisikia jina Samsoni? Pengine unakumbukaka mwanaume mwenye alikuwa na nguvu ya ajabu. Ni kweli. Lakini Samsoni alikamata uamuzi wa mubaya wenye ulikuwa na matokeo ya kuumiza. Hata vile, Yehova alikazia uangalifu maisha ya uaminifu ya Samsoni na aliiandikisha mu Biblia ili ituletee faida.

² Yehova alimutumia Samsoni ili kufanya mambo ya ajabu juu ya kusaidia watu wake wenye alikuwa amechagua, ni kusema Waisraeli. Miaka mingi kisha kifo ya Samsoni, Yehova alimuongoza mutume Paulo atie jina ya Samsoni mu liste ya watu wenye walikuwa na imani ya ajabu. (Ebr. 11:32-34) Mufano wa Samsoni unaweza kututia moyo. Alimutegemea Yehova hata wakati hali ilikuwa nguvu. Tuone namna mufano wake unaweza kututia moyo na mambo ingine yenye unaweza kutufundisha.

3. Samsoni alipewa mugao gani?

³ Wakati Samsoni alizaliwa, Wafilisti walikuwa natawala Waisraeli na walikuwa wanawagandamiza. (Amu. 13:1) Juu walikuwa wanawatawala kwa ukali, ile ililetea Waisraeli mateso mingi. Yehova alichagua Samsoni ili ‘aongoze katika kuokoa Israeli katika mukono wa Wafilisti.’ (Amu. 13:5) Ile ilikuwa kazi ya nguvu sana! Juu ya kutimiza ule mugao, Samsoni alipaswa kumutegemea Yehova.

4. Namna gani Yehova alisaidia Samsoni ajitoshe mu mikono ya Wafilisti? (Waamuzi 15:14-16)

 ⁴ Tuone mufano wenye kuonyesha namna Samsoni alimutegemea Yehova na namna Yehova alimutegemeza. Siku moya, maaskari Wafilisti walikuya kumukamata Samsoni wakati alikuwa Lehi, yenye inawezekana ilikuwa katika Yuda. Watu wa Yuda waliogopa, kwa hiyo wakaamua kumutoa Samsoni kwa maadui. Ndugu zake mwenyewe walimufunga nguvu sana kwa kutumia kamba mbili za mupya, na wakamupeleka kwa Wafilisti. (Amu. 15:9-13) Lakini, “roho ya Yehova ikamutia nguvu,” na akajifungua zile kamba. Kisha “akaona mufupa wa mubichi wa taya ya punda-dume,” akaulokota na akautumia ili kuua Wafilisti 1000!—Soma Waamuzi 15:14-16.

5. Juu Samsoni alitumia mufupa wa taya ya punda, ile inaonyesha namna gani kama alimutegemea Yehova?

⁵ Juu ya nini Samsoni alitumia mufupa wa taya ya punda-dume? Kusema kweli ile haiko silaha ya kawaida. Bila shaka Samsoni alijua kama Yehova njo angemusaidia kupata ushindi, hapana silaha yenye angetumia. Kwa kweli, ule mwanaume muaminifu alitumia kitu yenye hali ilimuruhusu kupata ili kutimiza mapenzi ya Yehova. Na juu Samsoni alimutegemea Yehova, Yehova alimusaidia apate ushindi mukubwa.

6. Mufano wa Samsoni unaweza kutufundisha nini wakati tuko natimiza migao yetu ya Kiteokrasi?

⁶ Na siye Yehova anaweza kutupatia nguvu ya kutimiza migao yetu, hata migao yenye inaonekana kuwa ya nguvu sana. Mungu anaweza kututegemeza mu njia ya ajabu yenye pengine hatukuwazia. Ukuwe hakika kama Yehova, mwenye alimutia Samsoni nguvu, atakusaidia kutimiza mapenzi yake kama tu unaendelea kumutegemea.—Mez. 16:3.

7. Ni mufano gani unaonyesha kama ni jambo ya maana tutafute muongozo wa Yehova?

⁷ Ndugu na dada wengi wenye wametumika mu kazi mbalimbali za ujenzi mu tengenezo ya Yehova wameonyesha kama wanamutegemea Yehova. Zamani, ndugu walizoea kujenga wao wenyewe Majumba ya Ufalme ya mupya na majengo ingine. Lakini juu ya ongezeko  yenye kuwa mu tengenezo ya Yehova, iliomba kufanya mabadiliko. Ndugu wenye kusimamia kazi walitafuta muongozo wa Yehova na walijaribu njia za mupya za kufanya mambo, sawa vile kuuza majengo na kuitengeneza upya. Robert, mwenye amesaidia mu ujenzi wa majengo yetu mbalimbali mu dunia yote, anasema hivi: “Ku mwanzo haikukuwa mwepesi kwa ndugu fulani kujipatanisha na ile namna ya mupya ya kufanya mambo. Ilikuwa tofauti kabisa na namna tulikuwa tunafanya kwa miaka mingi. Lakini ndugu walikuwa tayari kujipatanisha na ile mabadiliko. Imeonekana wazi kama Yehova iko nabariki ile mabadiliko.” Ile ni mufano moya tu yenye kuonyesha namna Yehova iko naongoza watu wake ili watimize mapenzi yake. Mara kwa mara ni muzuri siye wote tukuwe najiuliza hii ulizo: ‘Niko natafuta muongozo wa Yehova na ninaendelea kujipatanisha na mabadiliko mu utumishi wangu kwake?’

8. Siku fulani wakati Samsoni alisikia kiu sana alifanya nini?

⁸ Pengine umesoma mambo ingine ya ajabu yenye Samsoni alifanya. Kwa kutumia tu mikono yake, aliua simba, na kisha aliua watu 30 mu muji wa Wafilisti wa Ashkeloni. (Amu. 14:5, 6, 19) Samsoni alijua kama hangeweza kutimiza ile mambo yote bila musaada wa Yehova. Na ile ilionekana wazi siku moya wakati Samsoni alisikia kiu sana kisha kuua wanaume Wafilisti 1000. Alifanya nini? Kuliko kujitegemea mwenyewe ili kupata maji ya kunywa, alimulilia Yehova amusaidie.—Amu. 15:18.

9. Yehova alijibia namna gani kilio ya Samsoni ya kuomba musaada? (Waamuzi 15:19 na maelezo ya chini)

⁹ Yehova alijibia kilio ya Samsoni ya kuomba musaada kwa kutokeza kimuujiza chemchemi ya maji. Wakati Samsoni alikunywa ile maji, “nguvu yake ikamurudia na akakuwa tena na nguvu.” (Soma Waamuzi 15:19 na maelezo ya chini.) Inaonekana kuwa, ile chemchemi ya maji iliendelea kuwa miaka mingi kisha pale wakati nabii Samweli aliongozwa na roho ya Mungu ili kuandika kitabu ya Waamuzi. Waisraeli wenye walikuwa naona ile maji pengine walikumbuka kama Yehova anasaidiaka watumishi wake waaminifu wakati wako na lazima ya musaada ikiwa tu wanamutegemea.

10. Tunapaswa kufanya nini ili Yehova atusaidie? (Ona pia picha.)

¹⁰ Siye pia tunapaswa kutafuta musaada wa Yehova hata tukuwe na vipawa ao uwezo wa namna gani, ao ikuwe tulishafanya mambo gani mu utumishi wa Yehova. Tunapaswa kuwa wenye kiasi na kukubali kama juu tupate matokeo ya muzuri, tunapaswa tu kumutegemea Yehova. Sawa tu vile Samsoni alipata nguvu kisha kunywa maji yenye Yehova alimutolea, tutakuwa nguvu kiroho kama tunatumia mambo mbalimbali yenye Yehova anatutolea.—Mt. 11:28.

11. Namna gani tunaweza kutumia mambo yenye Yehova anatutolea ili kutusaidia? Leta mufano.

¹¹ Fikiria mufano wa Aleksey, ndugu yetu wa Urusi mwenye iko navumilia mateso ya nguvu. Ni nini imemusaidia aendelee kuwa nguvu wakati iko napambana na hali za nguvu sana? Yeye na bibi yake wamejiwekea programu ya muzuri ya kiroho. Anasema hivi: “Ninajikaza kuheshimia programu yangu ya funzo ya kipekee na ya kusoma Biblia kila siku. Kila asubui, miye na bibi yangu tunazungumuziaka andiko ya siku na kusali pamoya kwa Yehova.” Ile inatufundisha nini? Kuliko kujitegemea siye wenyewe, tunapaswa kumutegemea Yehova. Tutafanya vile namna gani? Kwa kutia imani yetu nguvu kupitia programu ya muzuri ya kujifunza Biblia kipekee na kufanya mambo ingine  ya kiroho. Kama tunafanya vile, Yehova atabariki kabisa mambo yenye tuko nafanya ili kumutumikia. Alimutia Samsoni nguvu, na bila shaka anaweza pia kututia nguvu.

12. Samsoni alikamata uamuzi gani mubaya, na juu ya nini ulikuwa tofauti na maamuzi ingine yenye alikamata mbele ya pale?

¹² Sawa siye wote, Samsoni pia hakukuwa mukamilifu. Kwa hiyo, wakati fulani alikamata maamuzi ya mubaya. Uamuzi fulani wenye alikamata ulileta matokeo ya mubaya sana. Kisha Samsoni kuwa muamuzi kwa wakati fulani, ‘alipenda mwanamuke fulani katika Bonde la Soreki, mwenye aliitwa Delila.’ (Amu. 16:4) Mbele ya pale, Samsoni alikuwa nachumbia mwanamuke Mufilisti. Lakini ule uhusiano ‘ulitoka kwa Yehova,’ mwenye “alikuwa anatafuta nafasi ya kupiga Wafilisti.” Wakati fulani kisha pale, Samsoni alibakia mu nyumba ya kahaba fulani mu muji wa Wafilisti wa Gaza. Ile wakati Yehova alimupatia Samsoni nguvu ya kubeba milango mikubwa ya ule muji, na ile ilifanya muji ubakie bila ulinzi. (Amu. 14:1-4; 16:1-3) Lakini kuhusu Delila, mambo ilikuwa tofauti juu inawezekana alikuwa Mwisraeli.

13. Namna gani Delila alimufikisha Samsoni mu hali ya mubaya?

¹³ Delila alikubali makuta mingi kutoka kwa Wafilisti ili kumusaliti Samsoni. Je, Samsoni alimutumainia sana Delila na kupofushwa na upendo wenye alikuwa nao kwake, mupaka akashindwa kutambua mambo yenye Delila alikuwa anapanga? Ikuwe ni vile ao hapana, Delila alimusumbua Samsoni tena na tena ili amuambie nguvu yake ilitoka wapi. Na ku mwisho, Samsoni alimuambia. Jambo ya kuhuzunisha ni kama, Samsoni alijiingiza mu  hali yenye ilifanya apoteze nguvu yake na yenye ilifanya asikubaliwe tena na Yehova kwa wakati fulani.—Amu. 16:16-20.

14. Samsoni alipata matokeo gani ya mubaya juu alimutumainia Delila?

¹⁴ Samsoni alipata matokeo ya mubaya sana kwa sababu alimutumainia Delila kuliko kumutumainia Yehova. Wafilisti walimukamata na wakamufanya kuwa kipofu. Alifungwa mu gereza katika Gaza, kwenye mbele ya pale alifezeheshaka watu wa ule muji. Sasa alikuwa mu mikono yao na wakamufanya kuwa mutu wa hali ya chini wa kusaga nafaka. Kisha, wakati Wafilisti walikutana ili kufanya sherehe, walimuleta. Walitoa zabihu za mingi kwa mungu wao wa uongo Dagoni, kwa sababu waliwaza ni yeye alitia Samsoni mu mikono yao. Walitosha Samsoni mu gereza na kumuleta fasi ya sherehe ili “awafurahishe,” ni kusema ili wamuchekelee.—Amu. 16:21-25.

15. Namna gani Samsoni alionyesha kama anamutumainia tena Yehova? (Waamuzi 16:28-30) (Ona picha ku jalada.)

¹⁵ Samsoni alikuwa amefanya kosa kubwa, lakini hakuacha kufanya mapenzi ya Yehova. Alitafuta nafasi ya kutimiza mugao wenye Mungu alimupatia wa kupiganisha Wafilisti. (Soma Waamuzi 16:28-30.) Samsoni alimuomba hivi Yehova: “Uache nilipize kisasi juu ya Wafilisti.” Mungu wa kweli alijibia sala ya Samsoni, na kwa muujiza alimurudishia nguvu ya pekee yenye alikuwaka nayo. Matokeo ilikuwa nini? Ku ile tukio, Samsoni aliua Wafilisti wengi zaidi kuliko wenye alikuwa ameua mbele ya pale.

16. Makosa ya Samsoni inaweza kutufundisha nini?

¹⁶ Hata kama Samsoni alipata matokeo ya mubaya kwa sababu ya kosa yake, hakuacha kujikaza kufanya mapenzi ya Yehova. Na siye, hata kama tunafanya makosa na inaomba tukaripiwe ao tupoteze mapendeleo, hatupaswe kuacha kujikaza ili kufanya mapenzi ya Yehova. Kumbuka kama Yehova iko tayari kusamehe. (Zb. 103:8-10) Hata kama tumefanya makosa, Yehova anaweza kuendelea kututumikisha sawa vile alitumikisha tena Samsoni.

17-18. Juu ya nini mufano wa Michael unakutia moyo? (Ona pia picha.)

¹⁷ Fikiria mufano wa ndugu kijana mwenye kuitwa Michael. Alikuwa nafanya mambo mingi mu tengenezo; alikuwa mutumishi wa huduma na painia wa kawaida. Lakini alifanya kosa, na ile ilifanya apoteze mapendeleo yake mu kutaniko. Anasema hivi :“Mambo ilikuwa  inaniendea muzuri mu utumishi wangu kwa Yehova. Kisha kwa kushitukia, nilijisikia sawa vile nimegonga ukuta. Hakuna siku niliwaza kama Yehova ataniacha, lakini nilijiuliza ikiwa kuko siku uhusiano wangu na Yehova utakuwa tena sawa zamani, ao ikiwa nitakuwaka tena na uwezo wa kufanya mambo mingi mu kutaniko sawa zamani.”

¹⁸ Jambo ya kufurahisha ni kama, Michael aliendelea kujikaza kufanya mapenzi ya Mungu. Anasema tena hivi: “Nimejikaza sana kurudisha uhusiano wangu pamoya na Yehova kwa kumufungulia kwa ukawaida moyo wangu katika sala, kujifunza, na kutafakari.” Kisha wakati fulani, Michael alipata tena mapendeleo mu kutaniko. Sasa ni muzee na painia wa kawaida. Anasema hivi: “Namna wengine walinitegemeza na kunitia moyo, zaidi sana wazee, ilinisaidia nione kama Yehova angali ananipenda. Sasa niko natumikia tena Yehova mu kutaniko nikiwa na zamiri safi. Mambo yenye ilinifikia ilinifundisha kama Yehova atasamehe mutu yeyote ikiwa tu anatubu kutoka moyoni.” Tunaweza kuwa hakika kama Yehova atatutumia na kutubariki sisi pia hata kama tumefanya makosa, ikiwa tu tunafanya yetu yote ili kurekebisha njia zetu na tunaendelea kumutegemea.—Zb. 86:5; Mez. 28:13.

19. Namna gani mufano wa Samsoni umekutia nguvu?

¹⁹ Mu hii habari, tumezungumuzia mambo fulani yenye ilitokea mu maisha ya Samsoni. Hakukuwa mukamilifu lakini aliendelea kujikaza ili kumutumikia Yehova, hata kisha kosa yenye alifanya kwa sababu ya Delila. Yehova aliendelea kumutumia. Mungu alimutumia tena Samsoni mu njia ya ajabu. Yehova aliendelea kumuona kuwa mwanaume mwenye kuwa na imani ya ajabu, na alimutia mu liste ya watu waaminifu wenye kuzungumuziwa mu Waebrania 11. Inatia moyo kujua kama Baba yetu wa mbinguni mwenye tunatumikia ni mwenye upendo sana na anapenda sana kututia nguvu, zaidi sana wakati tuko wazaifu! Kwa hiyo, kama Samsoni, tumuombe hivi Yehova: “Unikumbuke, tafazali, na kunitia nguvu.”—Amu. 16:28.