1-2. Nini njo inaleteaka watumishi wa Mungu furaha? (Yakobo 1:​22-25)

 YEHOVA na Mwana wake wanapenda tukuwe na furaha. Muandikaji wa Zaburi 119:2 alisema hivi: “Wenye furaha ni wale wenye wanashika vikumbusho vyake, wenye wanamutafuta kwa moyo wao wote.” Yesu alisema pia hivi: “Wenye furaha ni wale wenye wanasikia neno la Mungu na kulishika.”—Lu. 11:28.

² Siye waabudu wa Yehova tuko watu wa furaha. Juu ya nini? Kuko mambo mingi yenye inatuletea furaha, kati ya ile mambo kuko kusoma Neno ya Mungu kwa ukawaida na kujikaza kutumikisha mambo yenye tunajifunza.—Soma Yakobo 1:​22-25.

3. Tunapata faida gani wakati tunatumikisha mambo yenye tunajifunza na yenye tunasoma mu Neno ya Mungu?

³ Tunapata faida mingi wakati ‘tunakuwa watendaji wa neno.’ Kwa mufano, tunajua kama wakati tunatumikisha mambo yenye tunasoma, tunamufurahisha Yehova, na kumufurahisha Yehova kunatuletea furaha. (Muh. 12:13) Wakati tunatumikisha mambo yenye tunasoma mu Neno ya Mungu yenye kuongozwa na roho yake, tunakuwa na furaha mu familia na tunakuwa na urafiki muzuri pamoya na waabudu wenzetu. Pengine na weye umejionea ile. Zaidi ya ile, tunaepuka magumu yenye watu wenye hawafuate amri za Yehova wanapata. Kwa kweli, tunakubaliana kabisa na mambo yenye Mufalme Daudi alisema. Kisha kutaya sheria, maagizo, na hukumu za Yehova mu wimbo wake, alimalizia kwa kusema hivi: “Katika kuzishika, kuko zawabu kubwa.”—Zb. 19:​7-11.

4. Juu ya nini haiko mwepesi kuwa watendaji wa Neno ya Mungu?

 ⁴ Kusema kweli, haikuwake mwepesi kuwa watendaji wa Neno ya Mungu kila wakati. Hata kama tuko na mambo mingi ya kufanya, tunapaswa kujiwekea wakati wa kusoma Neno ya Mungu juu tuelewe mambo yenye Yehova anapenda tufanye. Tuzungumuzie basi mambo fulani yenye inaweza kutusaidia juu tukuwe nasoma Biblia kwa ukawaida. Tutaona pia ni nini njo inaweza kutusaidia juu tukuwe nafikiria mambo yenye tunasoma na kuona namna ya kuitumikisha mu maisha yetu.

UJIWEKEE WAKATI WA KUSOMA NENO YA MUNGU

5. Ni mambo gani yenye inatukamataka wakati mingi?

⁵ Watumishi wengi wa Yehova wako na mambo mingi ya kufanya. Wengi wetu wanatumia wakati mingi juu ya kutimiza mambo ya maana yenye maandiko inawaomba. Kwa mufano, wamoya kati yetu wanatumikaka juu ya kutimiza mahitaji yao ya kimwili na mahitaji ya familia zao. (1 Ti. 5:8) Wakristo wengi wanahangaikia watu wa familia yao wenye kuwa wagonjwa ao wenye kuzeeka. Na siye wote tunapaswa kuhangaikia afya yetu, ile pia inakamataka wakati. Zaidi ya ile mambo, tuko na migao mu kutaniko. Na mugao wa maana zaidi wenye tuko nao, ni kufanya kazi ya kuhubiri kwa bidii. Tumeona kama tuko na mambo mingi ya kufanya, sasa wapi njo tunaweza kupata wakati ya kusoma Biblia kwa ukawaida, kutafakari juu ya mambo yenye tunasoma, na kuitumikisha?

6. Tunapaswa kufanya nini juu tusikose kusoma Biblia? (Ona pia picha.)

⁶ Kwetu siye Wakristo, kusoma Biblia ni kati ya “mambo ya maana zaidi.” Kwa hiyo, tunapaswa kuhakikisha kama tunaisoma. (Flp. 1:10) Kuhusu mutu mwenye furaha, zaburi ya kwanza inasema hivi: “Anapendezwa na sheria ya Yehova, na anasoma sheria Yake kwa sauti ya chini muchana na usiku.” (Zb. 1:​1, 2) Ile maneno inaonyesha kama inaomba kutia wakati pembeni ili kusoma. Inakuwaka muzuri kusoma Biblia saa gani? Kila mutu iko na saa yenye ni ya muzuri kwake. Lakini inapaswa kuwa saa yenye utaweza kufanya vile  kwa ukawaida. Ndugu mwenye jina yake Victor anasema hivi: “Napendaka kusoma Biblia asubui. Hata kama sipendake kulamuka asubui sana, naonaka kama asubui hakukuwake mambo mingi ya kunikengeusha. Akili yangu haiyakuwa na mambo mingi na ninaweza kukazia akili mambo yenye niko najifunza.” Na weye ni vile? Ujiulize hivi: ‘Ni saa gani njo ya muzuri kwangu kusoma Biblia?’

FIKIRIA MAMBO YENYE UNASOMA

7-8. Ni nini inaweza kufanya mambo yenye tuko nasoma isituletee faida? Leta mufano.

⁷ Lakini kusema kweli, tunaweza kuwa na zoea ya kusoma mambo mingi bila kuiacha iingie kabisa ndani yetu na ituguse. Ulishakasoma jambo fulani lakini kisha wakati kidogo haukumbuke jambo yenye ulisoma? Ile ilishakatufikia siye wote. Jambo ya kuhuzunisha ni kama, ile hali inaweza kutufikia mu usomaji wa Biblia. Pengine tulishajiwekea muradi wa kusoma sura fulani za Biblia kila siku. Ni muradi wa muzuri. Ni muzuri kujiwekea miradi na kujikaza kuitimiza. (1 Ko. 9:26) Lakini, kusoma Biblia ni mwanzo tu, kuko mambo ingine yenye tunapaswa kufanya kama tunapenda usomaji wetu utuletee kabisa faida.

⁸ Fikiria hii mufano: Mvula ni ya lazima juu mimea iote, lakini kama mvula inanyesha ya mingi sana mu wakati kidogo, mayi inaweza kuwa ya mingi sana, na kama ile inatokea, mvula haitasaidia. Inaomba wakati juu mayi ya mvula iingie mu budongo na kusaidia mimea ikomale. Vilevile tunapaswa kuepuka kusoma Biblia mbiombio, ni kusema kusoma haraka mupaka mambo yenye tulisoma inakosa wakati wa kuingia kabisa mu moyo wetu juu tuweze kuikumbuka na kuitumikisha.—Yak. 1:24.

9. Tunapaswa kufanya nini kama tuko na tabia ya kusoma Biblia mbiombio?

⁹ Wakati fulani unasomaka Biblia mbiombio? Kama ni vile, unapaswa kufanya nini? Punguza mwendo. Ujikaze kufikiria mambo yenye uko nasoma ao yenye unatoka tu kusoma. Haiko nguvu kufanya vile. Unaweza kuamua kuongeza wakati yenye unatumia  juu ya kujifunza, juu upate wakati wa kufikiri ao kutafakari. Ao unaweza kuamua kusoma mambo kidogo na kutumia wakati yenye inabakia juu ya kufikiri juu ya mambo yenye umesoma. Victor mwenye tulizungumuzia anasema hivi: “Ninasomaka mambo kidogo, pengine sura moya. Juu ninasomaka asubui sana, nafikiriaka mambo yenye nilisoma muchana yote.” Ikuwe unaamua kutumia njia gani, ni muzuri kusoma polepole juu upate wakati wa kufikiria mambo yenye uko nasoma.—Zb. 119:97; ona kisanduku “ Maulizo ya Kufikiria.”

10. Toa mufano juu ya kufasiria namna unaweza kutumikisha mambo yenye uko najifunza. (1 Watesalonike 5:​17, 18)

¹⁰ Ikuwe unasomaka Biblia saa gani ao unatumia muda gani juu ya kusoma, uhakikishe kama uko natumikisha mambo yenye uko nasoma. Wakati unasoma jambo fulani mu Neno ya Mungu, ujiulize hivi: ‘Naweza kutumikisha namna gani hii habari leo ao mu siku zenye ziko nakuya?’ Kwa mufano, tuseme mu usomaji wako wa Biblia, muko 1 Watesalonike 5:​17, 18. (Soma.) Kisha kusoma ile mistari mbili, unaweza kuacha kwanza kusoma na kufikiria ikiwa unakuwaka na zoea ya kusali na ikiwa unakuwaka nasali kwa moyo wote kabisa. Pia, unaweza kufikiria mambo yenye ungependa kumushukuru Yehova. Pengine unaweza kuamua kumushukuru Yehova juu ya mambo tatu fulani. Hata kama unatumia dakika kidogo tu juu ya kufikiria mambo yenye uko nasoma, ile itakusaidia ukuwe musikiaji na mutendaji wa Neno ya Mungu. Fikiria faida yenye utapata kama unafanya vile kila siku wakati unasoma Biblia! Utafikia kuwa mutumishi muzuri wa Yehova. Sasa utafanya nini ikiwa unaona kama uko na mambo mingi ya kufanyia kazi?

UKUWE NA KIASI WAKATI UNAJITILIA MIRADI

11. Juu ya nini wakati fulani unaweza kujisikia kama uko na mambo mingi sana ya kufanyia kazi? Toa mufano.

¹¹ Wakati uko nasoma Biblia unaweza kuvunjika moyo wakati unatambua kama uko na mambo ya mingi sana ya kufanyia kazi. Fikiria hii mufano: Leo, mu usomaji wako wa Biblia muko mashauri juu ya kuepuka kuonyesha upendeleo. (Yak. 2:​1-8) Unaona kama unapaswa kufanyia maendeleo ile jambo kwa kubadilisha namna yako ya kutendea wengine. Unafanya muzuri! Kesho unasoma maandiko yenye kuonyesha kama ni jambo ya maana kuwa waangalifu juu ya mambo yenye tunasema. (Yak. 3:​1-12) Unatambua kama wakati fulani unasemaka mambo yenye haiko ya muzuri na yenye haiko ya kutia moyo. Unaamua kuanza kusema mambo ya muzuri na yenye kujenga. Siku yenye kufuata, mu usomaji wako wa Biblia unasoma mambo yenye  kuonyesha kama tunapaswa kuepuka kuwa marafiki wa ulimwengu. (Yak. 4:​4-12) Kisha unatambua kama unapaswa kuchagua muzuri mambo yenye unajifurahisha nayo. Siku ya ine unaweza kuona kama, mambo ya kufanyia kazi inakuwa mingi sana.

12. Juu ya nini haupaswe kuvunjika moyo kama mu usomaji wako wa Biblia unaona kama uko na mambo ya kufanyia kazi? (Ona pia maelezo ya chini.)

¹² Kama uko na mambo mingi ya kufanyia kazi ao ya kufanyia maendeleo, usivunjike moyo. Ile inaonyesha kama uko na moyo wa muzuri. Mutu mwenye ni munyenyekevu na munyoofu anasomaka Biblia na muradi wa kutafuta mambo yenye anapaswa kufanyia kazi. a Kumbuka kama, kuvala “utu mupya” haiko kazi ya siku moya. (Kol. 3:10) Ni nini itakusaidia ukuwe mutendaji wa Neno ya Mungu?

13. Namna gani unaweza kuwa na kiasi wakati unajitilia miradi mbalimbali? (Ona pia picha.)

¹³ Kuliko kujaribu kutumikisha mara moya mambo yote yenye umesoma, jaribu kwanza kutumikisha jambo moya ao mbili. (Mez. 11:2) Unaweza kufanya hivi: Kwanza fanya liste ya mambo yote yenye unapaswa kufanyia kazi. Kisha chagula jambo moya ao mbili yenye utatumikia kwanza; na mambo ingine yote yenye inabakia, utaendelea kuitumikia polepole. Utaanza na ya wapi?

14. Unaweza kuanza kutumikia miradi gani?

¹⁴ Unaweza kuanza kutumikia muradi wenye ni mwepesi kwako kufikia. Ao unaweza kuamua kutumikia jambo yenye unaona kama ni lazima kabisa ufanyie maendeleo. Wakati unaamua jambo yenye utatumikia kwanza, ufanye utafiti mu vichapo vyetu, pengine kwa kutumia Musaada wa Kutafuta Habari kwa Ajili ya Mashahidi wa Yehova ao Index des publications  de la Société Watch Tower. Sali juu ya muradi wako, umuombe Yehova akupatie “hamu na pia nguvu za kutenda.” (Flp. 2:13) Kisha, utumikishe mambo yenye umejifunza. Kisha kufanyia kazi muradi wako wa kwanza, utakuwa na hamu sana ya kutumikia muradi ingine. Kwa kweli, wakati unafanya maendeleo mu jambo fulani yenye kuhusu maisha yako ya Kikristo ao unajikaza kukomalisha sifa fulani ya Kikristo, utaona kama inakuwa mwepesi zaidi kufanya maendeleo mu mambo ingine.

ACHA NENO YA MUNGU ‘IFANYE KAZI NDANI YAKO’

15. Juu ya nini watu wa Yehova wako tofauti na watu wengine wenye wanasomaka Biblia? (1 Watesalonike 2:13)

¹⁵ Watu wengi wanasema kama wamesoma Biblia mara mingi. Lakini, wanaamini kabisa mambo yenye Biblia inasema? Wanatumikisha mambo yenye wanasoma na kufanya mabadiliko mu maisha yao? Jambo ya kuhuzunisha ni kama, mara mingi jibu ni hapana. Wako tofauti kabisa na watu wa Yehova! Sawa Wakristo wa mu karne ya kwanza, tunakubali Biblia ‘vile iko kwa kweli, kama neno la Mungu.’ Zaidi ya ile, tunajikaza kuonyesha kama Neno ya Mungu iko nafanya kazi mu maisha yetu.—Soma 1 Watesalonike 2:13.

16. Ni nini inaweza kutusaidia tukuwe watendaji wa Neno ya Mungu?

¹⁶ Haikuwake mwepesi sikuzote kusoma na kutumikisha mambo yenye tunasoma mu Neno ya Mungu. Inaweza kuwa nguvu kupata wakati wa kusoma. Ao pengine tunaweza kuanza kusoma mbiombio bila kufikiria mambo yenye tuko nasoma. Ao tena, tunaweza kuona kama tuko na mambo mingi ya kufanyia kazi. Ikuwe unapambana na hali gani, ujue kama unaweza kuishinda. Utaishinda kwa musaada wa Yehova. Tuazimie basi kukubali musaada wa Yehova na kuwa hapana wasikiaji wasahaulifu, lakini watendaji wa Neno. Bila shaka, kadiri tunajikaza kusoma Neno ya Mungu na kuitumikisha mu maisha yetu, ni vile tutakuwa na furaha.—Yak. 1:25.