MUJANE mumoja maskini anamukumbatia mwana wake mumoja tu aliye naye. Anashangaa sana. Muda mufupi tu uliopita, alikuwa na maiti ya mwana wake katika mikono yake. Lakini, mugeni wake anamuambia hivi: ‘Tazama, mwana wako yuko hai [ao muzima].’ Sasa mwanamuke huyo anatazama kwa kicheko mwana wake ambaye amefufuliwa.

Ufufuo huo wenye kushangaza ulitokea miaka 3 000 iliyopita. Unaweza kusoma habari hiyo katika 1 Wafalme sura ya 17. Mugeni huyo alikuwa Eliya, nabii wa Mungu. Lakini mama ya mwana huyo alikuwa nani? Alikuwa mujane mumoja ambaye Biblia haitaje jina lake na aliishi katika muji wa Sarefathi. Ufufuo wa mwana wake ulikuwa moja kati ya mambo yenye kutia nguvu imani ambayo alijionea katika maisha yake. Habari ya mwanamuke huyo inatufundisha mambo fulani ya maana.

Yehova alikuwa ametangaza kwamba katika kipindi cha utawala wa Ahabu, mufalme mubaya wa Israeli, kungekuwa kipwa ao mvua haingenyesha kwa kipindi fulani. Kisha Eliya kutangaza kwamba kungekuwa kipwa, Mungu alimuficha ili Ahabu asimushambulie na alimupatia chakula kwa njia ya muujiza kwa kumutolea mukate na nyama ambayo kunguru walimuletea. Baadaye, Yehova alimuambia Eliya hivi: ‘Ondoka, enda Sarefathi, wa Sidoni, nawe ukae huko. Tazama! Nitamuamuru mwanamuke fulani huko, mujane, akupe chakula.’​—1 Fal. 17:1-9.

Eliya alipofika Sarefathi, aliona mujane mumoja maskini akivunja kuni. Je, huyo ndiye mwanamuke ambaye angemupatia nabii chakula? Kwa kuwa alikuwa maskini sana, namna gani angeweza kufanya hivyo? Inawezekana Eliya alijiuliza mambo mengi, lakini alianza kuongea na mwanamuke huyo. Alimuambia hivi: ‘Tafazali, niletee maji kidogo katika chombo [ao kopo] ili nikunywe.’ Mwanamuke huyo alipokuwa akienda kuleta maji, Eliya aliongezea hivi: ‘Tafazali, niletee kipande cha mukate.’  (1 Fal. 17:10, 11) Ilikuwa rahisi kwa mujane huyo kupata maji ya kumupatia mugeni huyo, lakini shida ilikuwa mukate.

Mwanamuke huyo alimujibu hivi: ‘Kama anavyoishi Yehova Mungu wako, mimi sina mukate, isipokuwa mukono mumoja tu wa unga katika mutungi mukubwa na mafuta kidogo katika mutungi mudogo; na tazama, ninakusanya kuni chache, nami nitaenda kutayarisha kitu kwa ajili yangu na mwanangu, nasi tutakula chakula hicho na kufa.’ (1 Fal. 17:12) Maneno hayo yanafunua nini?

Mujane huyo alitambua kwamba Eliya alikuwa Mwisraeli mwenye kumuogopa Mungu. Ndio sababu alisema “kama anavyoishi Yehova Mungu wako.” Inaonekana kwamba hata ikiwa alikuwa anajua mambo fulani kuhusu Mungu wa Israeli, hakutumia maneno “Mungu wangu” alipozungumuza kuhusu Yehova. Aliishi katika Sarefathi, muji ambao pengine ulitegemea Sidoni, muji wa Wafoinike. Inaonekana kabisa kwamba, waabudu wa Baali waliishi katika muji huo wa Sarefathi. Lakini, Yehova alikuwa ameona jambo fulani la pekee katika moyo wa mujane huyo.

Ijapokuwa mujane huyo maskini aliishi kati ya waabudu-sanamu, alionyesha imani katika Yehova. Yehova alimutuma nabii Eliya ili aweze kumusaidia mwanamuke huyo na ili mwanamuke huyo aweze naye kumusaidia Eliya. Kufikia hapa, tunaweza kujifunza jambo moja la maana.

Hata ikiwa Baali aliabudiwa katika muji wa Sarefathi, wakaaji wote wa muji huo hawakuwa wabaya kabisa. Kwa kumutuma Eliya kwa mujane huyo, Yehova alionyesha kwamba anajua watu walio na nia nzuri ambao hawajaanza bado kumutumikia. Kwa kweli, ‘katika kila taifa mutu anayemuogopa [Mungu] na kutenda uadilifu [ao haki] anakubalika kwake.’​—Mdo. 10:35.

Watu wengi wanaoishi katika eneo lako wanafanana na mujane wa Sarefathi. Ijapokuwa wanaishi kati ya watu wanaoamini sana dini ya uongo, watu hao wana hamu ya kujua kweli. Pengine wanajua mambo machache juu ya Yehova ao hawajue kitu, kwa hiyo wanahitaji kusaidiwa ili wamuabudu Mungu kwa njia inayofaa. Je, unajikaza kutafuta na kusaidia watu kama hao?

Fikiria kwa uangalifu yale ambayo Eliya alimuomba mujane huyo afanye. Mujane alikuwa amemuambia kwamba angetayarisha chakula kidogo walichokuwa nacho na kukitumia pamoja na mwana wake, na baadaye wangekufa. Lakini, Eliya alisema nini? “Usiogope. Nenda, fanya kulingana na neno lako. Ila tu unitayarishie kwanza kipande kidogo cha muviringo cha mukate kutokana na kile kilichopo, nawe uniletee hiyo, na unaweza kutayarisha kitu kwa ajili yako na mwana wako baadaye. Kwa maana Yehova Mungu wa Israeli, amesema hivi: ‘Ule mutungi mukubwa wa unga hautamalizika, na ule mutungi mudogo wa mafuta hautapungua mupaka siku Yehova atakapoleta mvua juu ya uso wa inchi.’”​—1 Fal. 17:11-14.

Ikiwa ungeambiwa hivyo, pengine ungejibu hivi: ‘Unasema nini? Nikupatie chakula chetu? Hatuna kingine.’ Lakini mujane huyo hakusema hivyo. Hata ikiwa hakujua mambo mengi kumuhusu Yehova, aliamini maneno ya Eliya na alifanya namna alivyoombwa. Imani yake ilijaribiwa kabisa, lakini alitenda kwa hekima!

Mungu hakumusahau mujane huyo maskini. Kama vile Eliya alivyosema, Yehova alizidisha chakula kidogo alichobaki nacho ili kiweze kusaidia Eliya, mujane huyo, na mwana wake mupaka wakati mvua ilinyesha. Kwa kweli, ‘ule mutungi mukubwa wa unga  haukumalizika, wala ule mutungi mudogo wa mafuta haukupungua, kulingana na neno la Yehova alilokuwa amesema kupitia Eliya.’ (1 Fal. 17:16; 18:1) Ikiwa mwanamuke huyo hangefanya hivyo, kipande cha mukate ambacho alitengeneza kwa unga na mafuta kidogo aliyokuwa nayo, hicho kingekuwa chakula chake cha mwisho. Lakini, alitenda kwa imani, alimutumaini Yehova, na alimukulisha Eliya kwanza.

Hilo linatufundisha kwamba Mungu anawabariki wale walio na imani. Ikiwa unaonyesha imani unapojaribiwa, Yehova atakusaidia. Atakutimizia mahitaji yako, atakulinda, atakuwa Rafiki yako ili akusaidie kupambana na jaribu.​—Kut. 3:13-15.

Katika mwaka wa 1898, gazeti Le Phare de la Tour de Sion (linaloitwa sasa Munara wa Mulinzi) lilizungumuzia somo hili ambalo tunaweza kujifunza kutokana na hadisi hiyo ya mujane: “Kwa kuwa mwanamuke huyo alikuwa na imani iliyomuwezesha kutii, basi alistahili kubarikiwa na Bwana kupitia Nabii huyo; ikiwa hangeonyesha imani, kungepatikana mujane mwingine ambaye angeonyesha imani. Hali hiyo inatufikia sisi pia. Bwana anaruhusu hali mbalimbali zitupate katika maisha ili kujaribu imani yetu. Tutabarikiwa ikiwa tunaonyesha imani; ikiwa hatutende hivyo, tutapoteza baraka zake.”

Tunapopambana na majaribu fulani, tunapaswa kutafuta uongozi wa Mungu katika Maandiko na katika vichapo vyetu vinavyotegemea Biblia. Kisha, tunapaswa kutenda kulingana na uongozi wa Yehova hata ikiwa inaweza kuwa vigumu kufanya hivyo. Bila shaka, tutabarikiwa ikiwa tunatenda kulingana na maneno haya yenye hekima: ‘Mutegemee Yehova kwa moyo wako wote wala usitegemee uelewaji wako mwenyewe. Mutambue yeye katika njia zako zote, naye atanyoosha mapito yako.’​—Met. 3:5, 6.

Imani ya mujane huyo ilikuwa karibu kujaribiwa kwa njia nyingine. Biblia inasema hivi: ‘Baada ya mambo hayo mwana wa yule mwanamuke, mwenye nyumba hiyo, akawa mugonjwa, na ugonjwa wake ukawa mukali sana hivi kwamba akaacha kupumua.’ Alipotaka kujua sababu gani anapatwa na musiba huo, mwanamuke huyo aliyefiwa, alimuambia Eliya hivi: ‘Nina nini nawe [ao nimekufanya nini], E e mutu wa Mungu? Umekuja hapa ili kurudisha kumbukumbu la [ao kunikumbusha] kosa langu na kumuua mwana wangu?’ (1 Fal. 17:17, 18) Maneno hayo ya huzuni yanaonyesha nini?

Je, mwanamuke huyo alikuwa akifikiria kosa fulani alilofanya ambalo lilisumbua zamiri yake? Je, alifikiria kwamba kifo cha mwana wake kilikuwa malipizi ya Mungu juu ya kosa hilo na kwamba Eliya alikuwa mujumbe wa Mungu aliyeleta kifo? Biblia haiseme hivyo, lakini tunajua kwamba: Mujane huyo hakusema kwamba Mungu amemutendea isivyo haki kwa njia yoyote.

Eliya alihuzunika sana sababu ya kifo cha mwana wa mujane na kwa sababu mujane huyo alifikiri kwamba Eliya ndiye aliyemuletea musiba huo. Kisha kupeleka mwili wa mwana wa mujane katika chumba cha juu, Eliya alisali hivi: ‘Ee Yehova Mungu wangu, je, tena unaleta mabaya juu ya mujane ninayekaa naye kwa kumuua mwana wake?’ Nabii huyo alifikiri kwamba jina la Mungu lingelaumiwa ikiwa angeruhusu mwanamuke huyo mwema na mukaribishaji-wageni ateseke zaidi. Kwa hiyo Eliya alimulilia Yehova hivi: ‘Ee Yehova, Mungu wangu, tafazali, rudisha nafsi [ao uzima] ya mwana huyu ndani yake.’​—1 Fal. 17:20, 21.

Yehova alikuwa anasikiliza. Mujane huyo alikuwa amemupatia nabii chakula na alikuwa ameonyesha imani. Inaonekana kwamba, Mungu aliruhusu ugonjwa wa mwana huyo umuue, kwa sababu alijua kwamba ufufuo wake​—ambao ndio wa kwanza katika Maandiko​—ungetokea na ungetolea vizazi vya wakati ujao tumaini. Eliya alimulilia Yehova afufue mwana huyo, naye alifanya hivyo. Wazia furaha ya mujane huyo wakati Eliya alimuambia hivi: “Tazama, mwana wako yuko hai [muzima]”! Kisha mujane huyo alimuambia Eliya hivi: ‘Kwa kweli sasa najua kwamba wewe ni mutu wa Mungu na kwamba neno la Yehova kinywani mwako ni la kweli.’​—1 Fal. 17:22-24.

Habari inayopatikana katika 1 Wafalme sura ya 17 haiseme mambo mengine tena kuhusu mwanamuke huyo. Kwa kuwa Yesu alimusifu mwanamuke huyo, inawezekana aliendelea kuwa mwaminifu kwa Yehova mupaka mwisho wa maisha yake. (Lu. 4:25, 26) Hadisi yake inatufundisha kwamba Mungu anawabariki wale wanaotendea mema watumishi wake. (Mt. 25:34-40) Inaonyesha kwamba Mungu anawatimizia watumishi wake waaminifu mahitaji yao, hata katika hali ngumu. (Mt. 6:25-34) Habari hii inaonyesha pia kwamba Yehova anatamani na ana uwezo wa kufufua wafu. (Mdo. 24:15) Tuna sababu nzuri kabisa za kuendelea kukumbuka mujane wa Sarefathi.