Sasa Ninajua Mungu Ambaye Ninaabudu

Marieta Manuel Bacudio anaeleza maisha yake

Tulitembelewa na muhubiri wa kanisa la Pentekoste aliyesemwa kuwa na uwezo wa kuponyesha. Aliponigusa, nilianguka na kuzimia, nikiwa mwenye “kujazwa na roho.” Akili iliponirudilia, nilijisikia kuwa sasa na kitu nilichohitaji, ni kusema, nguvu ya kuponyesha. Ni nini kilinisukuma nitafute nguvu hiyo, na ilikuwa na matokeo gani katika maisha yangu? Mbele ya kueleza habari hiyo, acha kwanza nizungumuzie maisha yangu.

NILIZALIWA katika Ilocos Norte, huko Philippines, tarehe 10 Mwezi wa 12, 1968. Mimi ni mutoto wa saba katika familia ya watoto kumi. Kama wakaaji wengi wa Philippines, tulikuwa Wakatoliki. Nilipata diplome ya masomo ya sekondari katika mwaka wa 1986, na nilipenda kuwa muganga. Lakini niligonjwa sana na sikuweza tena kutimiza kusudi langu. Niliwaza kama nitakufa. Kwa sababu sikuwa tena na tumaini, nilimuomba Mungu anisaidie na nilimuahidia kama nikipona, nitamutumikia maisha yangu yote.

Siku nyingi kisha kupona, nilikumbuka ahadi yangu kwa Mungu. Kwa hiyo, katika Mwezi wa 6, 1991, nilijiandikisha kwenye masomo ya Biblia ya kanisa la Pentekoste. Programu ya masomo ilikuwa pia na wakati wa kuomba “zawadi ya bure ya roho takatifu.” Nilitaka kuwa na nguvu ya kuponyesha. Kwenye masomo, tulifundishwa kama mutu anaweza kupata nguvu hiyo kwa kufunga na kusali. Siku moja, ili kuonyesha kama nilikuwa na “zawadi” hiyo, nilitoka mahali nilipokuwa nikisali na nikaenda kumusikiliza kwa siri mwanafunzi mwenzangu mahali alipokuwa akisali. Alipokaribia kumaliza sala yake, nilirudia haraka mahali nilipokuwa nikipiga magoti. Kisha, nikamuelezea mambo yote aliyoomba katika sala yake, kwa hiyo akakubali kama nilikuwa sasa na “zawadi ya bure ya roho takatifu”!

Nilipoendelea na masomo yangu, nilikuwa na maulizo mengi. Kwa mufano, andiko la Mathayo 6:9 linasema juu ya “Baba” na “jina” lake. Niliuliza maulizo kama vile “Baba ambaye Yesu alitaja ni nani?” na “Jina linalopaswa kutakaswa ni jina gani?” Majibu ya walimu wangu hayakuwa yenye kueleweka na hayakunisadikisha. Walizungumuzia Utatu na kusema kama ni fumbo. Niliona kama fundisho hilo halieleweke. Hata hivyo, niliendelea na masomo yangu ili niwe pastere.

Ninakutana na Mashahidi wa Yehova

Kwenye masomo ya Biblia, tulifundishwa kama dini ya Mashahidi wa Yehova ni dini ya uongo. Tena, tuliambiwa kama Mashahidi wa Yehova wao ndio wapinga​-Kristo. Nilichukizwa sana na dini hiyo.

Katika mwaka wangu wa pili wa masomo, tulipofunga masomo na kuanza mapumuziko, nilienda nyumbani ili kuwaona wazazi wangu. Carmen, mumoja kati ya dada zangu wakubwa, alikuja pia aliposikia kama nilikuwa nyumbani. Alikuwa tayari Shahidi wa Yehova mwenye kubatizwa na pia muhubiri wa wakati wote. Alipojaribu kunifundisha juu ya Mungu,  nilimujibu kwa ukali hivi: “Ninajua tayari Mungu ambaye ninatumikia!” Kisha kumutukana kwa sauti kubwa, nilimusukuma na sikumuruhusu tena anisemeshe.

Kisha kurudia kwenye masomo yangu ya Biblia, Carmen alinitumia broshua Je! Uamini Utatu? * Mara moja niliikunja​-kunja na kuitupa katika moto. Nilikuwa ningali mwenye kumukasirikia.

Ninaendelea Mupaka Kuwa Pastere

Nilipoendelea na masomo ya Biblia, nilianza kufanya waamini wapya. Nilifurahi sana wakati mama yangu na ndugu yangu mukubwa walipojiunga nami katika kanisa la Pentekoste.

Nilipata diplome ya masomo ya Biblia ya kanisa la Pentekoste Mwezi wa 3, mwaka wa 1994. Siku hiyo, muhubiri mukubwa wa kanisa la Pentekoste alikuja kututembelea, kama nilivyoeleza mwanzoni mwa habari hii. Sisi wote tuliopata diplome siku hiyo tulitaka kuwa pembeni yake kwa sababu tuliamini kama alikuwa na zawadi ya kuponyesha. Tulimukuta kwenye jukwaa, tukiruka​-ruka na kupiga mikono, kufuatana na mudundo wa kikundi cha waimbaji. Kisha, kila mutu aliyegusa alianguka chini, akiwa mwenye “kujazwa na roho.” * Aliponigusa, mimi pia nilianguka chini na kuzimia. Akili iliponirudilia, niliogopa sana, lakini nilijisikia sasa kuwa na nguvu ya kuponyesha. Kwa hiyo, nilifurahi sana.

Muda mufupi kisha hapo, nilitumia nguvu hiyo ili kuponyesha mutoto aliyekuwa na homa kali. Nilipotoa sala, mutoto huyo alianza mara moja kutokwa na jasho na homa yake ikapona. Mwishowe, niliona kama ningeweza sasa kutimiza kile nilichomuahidia Mungu. Jambo la kushangaza ni kwamba, nilijisikia kuwa ninakosewa na kitu fulani. Ndani yangu, niliamini kama kuna Mungu mumoja tu, lakini sikujua kabisa yeye ni nani. Na nilianza kuwa na mashaka mengi juu ya mafundisho ya kanisa.

Mambo Yaliyobadilisha Mawazo Yangu

Kisha matukio hayo, nilichukia tena sana Mashahidi wa Yehova. Kila mara nilipopata vichapo vyao, niliviunguza. Kisha, jambo fulani lisilotazamiwa lilitokea. Nilichukia sana wakati Mama aliachana na kanisa letu la Pentekoste. Dada yangu Carmen alikuwa ameanza kujifunza Biblia pamoja naye! Nilimukasirikia sana dada yangu.

Kisha hapo, nilipata gazeti Amkeni! nyumbani kwa mama. Kwa kawaida, nilipaswa kuiunguza. Lakini, nilitaka kabisa kujua mambo ambayo mama alikuwa anasoma, kwa hiyo, nikaanza kufungua-fungua kurasa za gazeti hilo. Niliona habari moja juu ya mutu aliyeamini sana mafundisho ya kanisa. Lakini, alipoanza kusoma vichapo vya Mashahidi wa Yehova pamoja na Biblia, alisadiki kama mafundisho kama vile Utatu, moto wa mateso, na kutokufa kwa nafsi, hayapatane na maandiko. Habari hiyo ilinigusa moyo sana. Hayo ndiyo mafundisho ambayo nilitaka kuelewa. Tangu siku niliposoma habari hiyo, nilitamani kabisa kuelewa mafundisho ya Biblia.

 Nilisoma habari nyingine katika Amkeni! juu ya mutu aliyekuwa mulevi na aliyekuwa anatumia dawa za kulewesha, lakini alibadilika sana alipoanza kujifunza Biblia. Kisha hapo, nilianza kusoma zaidi vichapo vya Mashahidi wa Yehova. Nilipata pia broshua Jina la Mungu Litakaloendelea Milele. * Nilipoisoma, nilivumbua kama jina la Mungu ni Yehova. Nilifurahi sana kujua ukweli juu ya Mungu mumoja wa kweli.​—Kumbukumbu la Torati 4:39; Yeremia 10:10.

Niliendelea kusoma kwa siri vichapo vya Mashahidi wa Yehova na nilijua mafundisho mengi ya Biblia. Kwa mufano, kwenye masomo ya kanisa la Pentekoste, nilifundishwa kama Yesu ni Mungu, lakini kupitia Biblia nilijua kama yeye ni “Mwana wa Mungu aliye hai.”​—Mathayo 16:15, 16.

Moyo Wangu Unaanza Kubadilika

Nilipoonana tena na Carmen, alishangaa nilipomuomba broshua Jina la Mungu Litakaloendelea Milele na vichapo vingine. Nilipitisha miaka mingi kwenye masomo ya Biblia, lakini sikufundishwa kweli huko; nilikuwa nimepofushwa. Sasa moyo wangu ulijaa furaha kwa sababu ya mafundisho ya Biblia ambayo nilikuwa nikijifunza. Niliona kabisa kama maneno haya ya Yesu ni ya kweli: ‘Mutaijua kweli, nayo kweli itawaweka ninyi huru.’ (Yohana 8:32) Mafundisho hayo yalianza kubadilisha maisha yangu.

Wakati fulani, niliwaza kama ningeweza kumuabudu Yehova Mungu kwa siri na kuendelea kuwa pastere. Kisha, nilitambua kama singeweza tena kufundisha mafundisho fulani ya kanisa. Lakini, nilikuwa na woga. Nilijiuliza hivi: Nikiacha kuwa pastere, nitaishi namna gani? Lilikuwa jambo la haya sana kwa kanisa ikiwa pastere wao mumoja anakuwa Shahidi wa Yehova. Kwa hiyo, niliendelea kufundisha, lakini niliepuka mafundisho ya uongo ya kanisa.

Nilipoonana tena na dada yangu Carmen, alinitia moyo nianze kuhuzuria mikutano ya Mashahidi wa Yehova. Kwa sababu nilizoea kupeleka ripoti kwenye kanisa letu kubwa katika muji wa Laoag, nilitafuta Jumba la Ufalme la Mashahidi kwa siri. Walinionyesha dada Alma Preciosa Villarin, aliyeitwa tena “Precious,” ambaye alikuwa muhubiri wa wakati wote katika kutaniko hilo. Ijapokuwa nilikuwa ningali na mawazo mabaya juu ya Mashahidi wa Yehova, nilikubali anifundishe Biblia.

Dada yangu Carmen alinivumilia sana alipokuwa akizungumuza nami juu ya Biblia. Precious pia alikuwa muvumilivu. Alinisaidia sana ili nielewe mafundisho ya Biblia, hata ikiwa nilikuwa nikimukasirikia, kubishana naye, na wakati fulani kupandisha sauti ili kutetea  mafundisho niliyofundishwa hapo zamani. Precious na Mashahidi wengine walipendezwa nami, walikuwa wanyenyekevu na wapole, hilo lilinigusa moyo sana na kunichochea nitamani kumuabudu Yehova.

Mwezi wa 7, 1995, niliona kama jambo la kufanya ni kuacha tu cheo changu cha pastere. Sababu gani? Andiko la Ufunuo 18:4 linazungumuzia kwa njia ya mufano dini ya uongo kwa kusema hivi: ‘Tokeni kwake, watu wangu, ikiwa hamutake kushiriki pamoja naye zambi zake, na ikiwa hamutake kupokea sehemu ya mapigo yake.’ Sasa, ningepata feza namna gani? Andiko la Waebrania 13:5 lilinifundisha kama ikiwa tunafanya mapenzi ya Mungu, yeye anatuahidia hivi: “Sitakuacha wala kukutupa hata kidogo.”

Hata ikiwa baba yangu na ndugu yangu walinipinga sana, majuma mawili mbele ya kubatizwa, nilijikaza sana kuenda nyumbani na nikaunguza vitu vyote nilivyokuwa nikitumia nilipokuwa pastere. Kisha kufanya hivyo, nilitambua kama sikuwa tena na nguvu zote za pekee nilizopewa. Zamani, nilipokuwa nikilala, nilikuwa nikisikia sawa vile kitu fulani kilikuwa kinanifinyanga. Sikujisikia tena hivyo. Na sikuona tena kivuli ambacho nilizoea kuona kwenye dirisha la chumba changu. Kupitia funzo langu la Biblia, nilikuwa nimekwisha kujua kama zile zinazoitwa leo zawadi, kama vile nguvu ya kuponyesha, hazitoke kwa Mungu lakini zinatokana na mashetani. Ninafurahi sana kwa sababu niliachana na mashetani, kama yule kijakazi ambaye Paulo alisaidia kuachana na mashetani kwa kumutosha ‘roho muovu wa uaguzi.’​—Matendo 16:16-18.

Ilikuwa furaha kubwa kubatizwa siku moja na Mama yangu na kuwa Mashahidi wa Yehova Mwezi wa 9 mwaka wa 1996. Kisha kubatizwa, nikakuwa muhubiri wa wakati wote na nikafanya kazi hiyo kwa miaka mingi.

Sasa, nimeolewa na ndugu Silver. Mimi naye, tunajikaza sana ili kumufundisha mutoto wetu mwanamuke kanuni za Biblia. Dada zangu wakubwa wawili na dada yangu mudogo wamekuwa pia Mashahidi wa Yehova. Ijapokuwa ninasikitika kwa sababu nilifanya miaka mingi bila kumujua Yehova, mimi ni mwenye furaha kwa sababu sasa ninajua Mungu ambaye ninaabudu.

[Maelezo ya chini]]

[Wazo la fungu kwenye ukurasa 13]

Nilitumia nguvu hiyo ili kuponyesha mutoto aliyekuwa na homa kali

[Wazo la fungu kwenye ukurasa 14]

Mafundisho hayo yalianza kubadilisha maisha yangu

[Wazo la fungu kwenye ukurasa 15]

Nilifurahi sana kujua ukweli juu ya Mungu mumoja wa kweli

[Picha katika ukurasa wa 13]

Nilipopata diplome ya kuwa pastere

[Picha katika ukurasa wa 14]

Precious ananifundisha Biblia

[Picha katika ukurasa wa 15]

Wakati mimi na mama yangu tulibatizwa

[Picha katika ukurasa wa 15]

Ninakuwa muhubiri wa wakati wote

[Picha katika ukurasa wa 15]

Mimi, bwana yangu, mutoto wetu mwanamuke, na watu wengine wa jamaa yangu ambao wamejiunga na sisi katika ibada ya kweli