Umukaribie Mungu

“Yehova Anataka Nini Kutoka Kwako?”

YEHOVA anawaomba nini wale wanaotaka kumuabudu kwa njia inayokubalika? Je, anatuomba tuwe wakamilifu, na hivyo kufanya isiwezekane sisi watu wasio wakamilifu kumupendeza? Ao je, anatuomba tu mambo yanayolingana na uwezo wetu? Ni lazima tupate majibu ya maulizo hayo ili tumutumikie Mungu kwa furaha. Acheni tuone namna nabii Mika alivyoeleza kwa kifupi mambo ambayo Mungu anatuomba.​—Soma Mika 6:8.

“Yeye amekuambia yaliyo mema.” Hatupaswi kuwazia​-wazia mambo ambayo Mungu anataka tufanye. Kupitia Biblia, anatuelezea mambo hayo waziwazi. Mungu anataka tufanye mambo “yaliyo mema.” Hawezi kutuomba tufanye mambo mabaya. “Mungu ni upendo,” kwa hiyo, anatutakia mambo yaliyo mema. (1 Yohana 4:8; 5:3) Kufanya mambo ambayo anatuomba kunamupendeza yeye na pia kunatuletea faida.​—Kumbukumbu la Torati 10:12, 13.

“Yehova anataka nini kutoka kwako?” Je, Mungu ana haki ya kutuomba jambo lolote? Ndiyo! Tunapaswa kumutii kwa sababu yeye ndiye alitupatia uzima na anatutolea vitu tunavyohitaji ili kuendeleza uzima wetu. (Zaburi 36:9) Kwa hiyo basi, anatuomba nini? Nabii Mika anaeleza kwa kifupi mambo ambayo Mungu anatuomba. Mambo mawili ya kwanza yanahusu namna tunavyowatendea wanadamu wenzetu, na jambo la tatu linahusu urafiki wetu pamoja naye.

“Kutenda haki.” Kitabu kimoja kinasema kama neno la Kiebrania linalotafsiriwa “haki,” “linatoa pia wazo la kuwatendea watu wengine mambo yaliyo sawa na mema.” Mungu anataka tuwatendee wengine mambo ambayo kanuni zake zinasema kuwa sawa na mema. Tunatenda haki tunapowatendea wengine bila ubaguzi, kwa njia inayofaa, na bila udanganyifu. (Mambo ya Walawi 19:15; Isaya 1:17; Waebrania 13:18) Tunapowatendea wengine kwa haki, wao pia wanachochewa kututendea kwa haki.​—Mathayo 7:12.

‘Kupenda fazili.’ Mungu anataka tuonyeshe sifa ya fazili na tuipende. Neno la Kiebrania linalotafsiriwa ‘fazili’ (cheʹsedh) linaweza pia kutafsiriwa “fazili zenye upendo” ao “upendo mushikamanifu.” Mutu mumoja anayefasiria Biblia alisema hivi: “Neno [cheʹsedh] halimaanishe tu upendo, rehema, ao fazili; linamaanisha sifa hizo zote pamoja.” Ikiwa tunapenda sifa ya fazili, tutaionyesha bila kulazimishwa; tutafurahia kusaidia wale walio na uhitaji. Kwa kufanya hivyo, tutapata furaha inayotokana na kutoa.​—Matendo 20:35.

“Kuwa na kiasi katika kutembea na Mungu wako.” Katika Biblia, neno “kutembea” linamaanisha “kufuata muongozo fulani.” Tunatembea na Mungu kwa kufuata muongozo ambao ametuonyesha katika Biblia. Ni lazima “kuwa na kiasi” ili kufuata muongozo huo. Sababu gani? Ikiwa tuna kiasi mbele za Mungu, tutajua kama sisi ni watu wa hali ya chini na tutatambua uzaifu wetu. Kwa hiyo, “kutembea kwa kiasi na mutu fulani” kunamaanisha kukubali kwa unyenyekevu mambo anayotuomba na yale tunayoweza kumutolea.

Sisi ni wenye furaha sana kwa sababu Yehova hawezi hata kidogo kutuomba mambo yanayopita uwezo wetu. Anafurahia sana bidii tunayofanya ili kumutumikia. (Wakolosai 3:23) Anaelewa uzaifu wetu. (Zaburi 103:14) Tunapokubali uzaifu wetu kwa unyenyekevu, tunaweza kutembea naye kwa furaha. Sababu gani usijifunze namna unavyoweza kutembea na Mungu? Ukitembea na Mungu, atakubariki sana.​—Methali 10:22.

Tafazali, mwezi huu wa 11, soma Maandiko haya katika Biblia:

◼ Yoeli sura ya 1-3 mupaka Mika sura ya 1-7