“Historia Haiseme Uongo”

Tarehe 14 Mwezi wa 6, 2007, Biro Kubwa ya Posta ya Estonie ilitoa tembre ya posta ya ukumbusho, inayoonyeshwa hapo kwenye upande wa kuume. Tembre hiyo ilipotolewa, tangazo hili pia lilitolewa: “Tembre hii ya ukumbusho ilitolewa ili kukumbuka watu wa Estonie waliouawa katika mauaji makubwa yaliyofanywa na majeshi ya Staline.” Kati ya mwaka wa 1941 na 1951, makumi ya maelfu ya Waestonia walihamishwa kwa nguvu.

“HISTORIA haiseme uongo.” Hayo ni maneno yanayojulikana sana katika inchi ya Estonie, na katika inchi zingine kuna maneno yanayofanana na hayo. Ndiyo, hatuweze kubadilisha wakati wetu uliopita, lakini bila shaka tunaweza kujifunza mambo fulani kutokana na wakati uliopita. Sulemani, Mufalme mwenye hekima wa taifa la zamani la Israeli alisema hivi: “Haya yote nimeyaona katika uchunguzi wangu juu ya yote yanayotendwa hapa duniani, binadamu anapokuwa na uwezo wa kumkandamiza na kumdhuru binadamu mwenzake.”​—Mhubiri 8:9, Biblia Habari Njema.

Ukweli wa maneno hayo ya Biblia ulionekana waziwazi kabisa huko Estonie miaka fulani iliyopita, na pia katika sehemu zingine nyingi za Ulaya ya Mashariki. Utawala wa mwanadamu uliwatesa wanadamu wengi sana wasio na kosa ambao walihamishwa kwa nguvu ili kuishi katika maeneo ya mbali ao kufungwa katika kambi za kazi ngumu.

Kulingana na wanahistoria wa Estonie, zaidi ya watu 46 000 wa inchi hiyo ndogo walihamishwa kati ya mwaka wa 1941 na 1951. Wengi kati yao walihamishwa kwa sababu za kisiasa, wengine walihamishwa kwa sababu walikuwa watu wa inchi nyingine ao kwa sababu ya cheo chao. Lakini Mashahidi wa Yehova walihamishwa kwa sababu ya imani yao ya kidini.

Watu wa Mungu Wanashambuliwa

Katika uchunguzi uliofanywa na masomo fulani ya juu (Tartu University Press) katika mwaka wa 2004, mwanahistoria Aigi Rahi-Tamm alisema hivi: “Kuanzia mwaka wa 1948 mupaka 1951, Mashahidi wa Yehova pamoja na watu wanaopendezwa na mafundisho yao, ni kusema, watu 72 walifungwa. Hata hivyo, uhamishaji wa watu wengi zaidi ulipangwa na serikali na ulifanyika usiku wa tarehe 1 Mwezi wa 4, 1951, si katika Inchi za Baltiki tu lakini pia katika Moldavie, Ukraine ya mangaribi, na Belarus.”

Mbele ya mwaka wa 1951, Mashahidi wa Yehova katika Estonie walianza kukamatwa, kusumbuliwa kiakili, kuulizwa maulizo na polisi, na kufungwa gerezani. Inaonekana kwamba kampanye hiyo mupya ya kuhamisha watu ilikuwa na kusudi la kumaliza kabisa Mashahidi wa Yehova katika inchi ya Estonie.

Tarehe 1 Mwezi wa 4, 1951, inaonekana kwenye tembre iliyozungumuziwa hapo juu. Namba 382 iliyo kwenye tembre hiyo inaonyesha hesabu ya Mashahidi wa Yehova na watoto wao waliohamishwa siku hiyo. Katika hesabu hiyo kuna  pia watu wa jamaa na majirani wao ambao hawakuwa Mashahidi wa Yehova. Katika muchana huo, watu walifungwa katika inchi yote. Na usiku, watu waliofungwa, vijana na wazee, walirundikwa katika vyumba vya kubebea wanyama vya treni zilizokuwa zikienda Siberie.

Ella Toom, * aliyekuwa na miaka 25 wakati huo, alikuwa mumoja kati ya Mashahidi wa Yehova waliohamishwa. Anapokumbuka namna alivyoulizwa maulizo na polisi, anasema hivi: “Mukubwa mumoja wa polisi alijaribu kuniogopesha na akaniomba niache kuhubiri. Aliniuliza hivi: ‘Je, unataka kuishi? Ao unataka kufa pamoja na Mungu wako katika mashamba ya Siberie?’” Hata hivyo, Ella, aliendelea kuhubiri habari njema bila woga. Alitumwa huko Siberie na alihamishwa mara nyingi kutoka kambi moja ya kazi ngumu mupaka kambi nyingine kwa muda wa miaka 6 hivi.

Kati ya mamia ya watu waliohamishwa bila kupewa nafasi ya kujitetea mbele ya waamuzi, kulikuwa mwanamuke kijana Shahidi wa Yehova anayeitwa Hiisi Lember. Anapokumbuka matukio ya tarehe 1 Mwezi wa 4, 1951, anasema hivi: “Walikuja usiku huo bila kutazamia, na kutuamuru: ‘Muna saa moja na nusu tu. Mufunge vitu vyenu!’” Katika usiku wenye giza, Hiisi na binti yake wa miaka 6 walichukuliwa na kupelekwa kwenye kituo cha treni. Treni hiyo mbaya sana ilisafiri kituo kimoja mupaka kituo kingine ikichukua Mashahidi wa Yehova wengine. “Tulitupwa ndani ya chumba cha treni cha kubebea wanyama. Jambo la kufurahisha ni kwamba mavi ya wanyama yalikuwa yenye kukauka; isingekuwa hivyo, ingekuwa vigumu kusimama ndani ya chumba hicho. Tulirundikwa ndani ya chumba hicho kama wanyama.”

Safari hiyo ngumu ya majuma mawili ilikuwa ya taabu sana. Vyumba hivyo vya treni vilijaa watu na vilikuwa vichafu. Vijana na wazee walizarauliwa na kukosewa heshima katika kila njia. Wengine kati yao walilia na kukataa kula. Hata hivyo, Mashahidi wa Yehova walitiana moyo na kusaidiana kwa kuimba nyimbo za ibada, na kuchangia chakula ambacho walikuwa nacho. Walitumwa katika “makao yao ya kudumu” na waliambiwa kwamba hiyo ilikuwa “safari ya kwenda bila tumaini la kurudia.”

Hiisi alikumbuka musaada wenye kutia moyo ambao waamini wenzake walimutolea wakati wa jaribu hilo: “Kwenye kituo fulani, treni yetu ilisimama karibu na treni ingine iliyotoka Moldavie. Kupitia ukuta wa chumba cha treni, tulisikia sauti ya mwanaume mumoja aliyetuuliza ikiwa sisi tulikuwa nani na tulikuwa tunaenda wapi. Tulieleza kwamba hatukujua mahali tulipokuwa tunaenda na kwamba tulikuwa Mashahidi wa Yehova kutoka inchi ya Estonie. Mashahidi wenzetu wa Yehova waliokuwa katika treni kutoka Moldavie walisikia mazungumuzo hayo. Kupitia tundu moja la chumba cha treni, walitutupia kipande kikubwa cha mukate na matunda fulani.” Hiisi aliongeza hivi: “Sasa tulianza kuelewa kwamba Mashahidi wa Yehova walikuwa wakihamishwa kutoka katika eneo kubwa, ni kusema, kutoka inchi zote za Muungano wa Kisovieti!”

Vijana wawili wanawake Mashahidi wa Yehova, Corinna na dada yake Ene, walitenganishwa na mama yao kwa miaka zaidi ya 6. Mama yao, ambaye pia alikuwa Shahidi wa Yehova, alifungwa na kutumwa katika kambi ya kazi ngumu mbele ya kukamatwa kwa mabinti wake. Katika usiku huo mubaya sana wa Mwezi wa 4, vijana wanawake hao wawili walikamatwa nyumbani kwao na kutupwa ndani ya chumba cha treni. Corinna anasema kwa shukurani hivi: “Katika treni, Shahidi wa Yehova mumoja aliyekuwa na watoto wawili alijitoa ili atushugulikie na alituhakikishia kwamba tutakaa pamoja naye na watoto wake kama familia moja.”

 Ni nini kilichotokea tulipofika mahali ambapo tulikuwa tunaenda? Siku moja kisha kufika katika jangwa lenye baridi la Siberie, biashara yenye kufezehesha ya “soko la watumwa” ikaanza. Wanaume kutoka katika mashamba ya karibu walikuja ili kuchagua wafanyakazi kwa ajili ya mashamba yao. Corinna anakumbuka hivi: “Tuliwasikia wakibishana kati yao, kwa kusema hivi: ‘Wewe umekwisha kupata mutu wa kutembeza mashini yako ya kulima. Huyu sasa ni wangu,’ ao, ‘Nimekwisha kuchukua wazee wawili. Wewe pia unapaswa kuchukua wazee fulani.’”

Corinna na Ene walikuwa mabinti wenye bidii. Baadaye walisema hivi: “Tulikuwa tunamukumbuka sana mama yetu, na tulitamani sana kuwa tena pamoja naye!” Hata hivyo, waliendelea kuwa wenye nguvu kiroho na hawakupoteza hali yao ya kuchekesha. Corinna aliongeza hivi: “Katika njia fulani, ilikuwa vizuri kwamba mama hakutuona kwa sababu nyakati fulani tulipaswa kuenda kufanya kazi inje katika baridi kali bila nguo nzuri za baridi.”

Bila shaka, watu wasio na kosa huko Estonie na mahali pengine wameteseka kwa sababu ya ukosefu wa haki, na Mashahidi wa Yehova kwa ujumla walikuwa kati ya watu hao. (Soma kisanduku “‘Mateso Makali’ Yasiyoweza Kuwaziwa.”) Ijapokuwa walitendewa vibaya na kuteswa wakati uliopita, Mashahidi wa Yehova huko Estonie wangali watu wenye bidii na wenye furaha.

Wakati Muzuri Sana Uko Mbele Yetu

Biblia inatuhakikishia kwamba Yehova Mungu anachukia ukosefu wa haki. Inasema hivi: ‘Kila mutu anayefanya mambo haya, kila anayefanya ukosefu wa haki, ni chukizo kwa Yehova Mungu wako.’ (Kumbukumbu la Torati 25:16) Ijapokuwa Mungu ameruhusu mambo maovu, hivi karibuni atamaliza mambo maovu na ukosefu wa haki. Mutunga-zaburi alisema hivi: ‘Bado muda kidogo tu, na mutu muovu hatakuwako tena; nawe hakika utapaangalia mahali pake, naye hatakuwapo. Bali wapole wataimiliki dunia, nao watapata furaha yao tele katika wingi wa amani.’​—Zaburi 37:10, 11.

Ndiyo, wakati muzuri sana uko mbele yetu! Hata ikiwa hatuweze kubadilisha wakati uliopita, tunaweza kufanya mambo fulani sasa ili kufurahia maisha mazuri wakati unaokuja. Umukaribie Mungu na uone namna gani unaweza kufurahia wakati muzuri sana unaokuja, wakati ambapo haki ya kweli itaenea duniani pote.​—Isaya 11:9.

[Maelezo ya chini]

[Sanduku katika ukurasa wa 28]

“Mateso Makali” Yasiyoweza Kuwaziwa

TAREHE 30 MWEZI WA 10, 2009, MEDVEDEV, RAISI WA RUSSIE, alisema hivi: “Haiwezekane kuelewa . . . mateso makali ambayo yalienea katika inchi yote . . . , mamilioni ya watu walipoteza maisha yao. Watu waliuawa bila kujitetea mbele ya waamuzi na wengine waliuawa bila habari yoyote kuandikwa juu yao; watu wengine walihamishwa na kutumwa katika kambi za mateso, walinyimwa haki zao kwa sababu ya kuwa na kazi ambayo ilionwa kuwa ‘mbaya’ ao kwa sababu ya kuwa ‘mutu wa inchi iliyoonwa kuwa isiyofaa.’ . . . Acheni tufikirie jambo hili: Mamilioni ya watu walikufa kwa sababu ya mateso makali na mashitaka ya uongo.”

[Picha katika ukurasa wa 29]

1. Ella Toom

2. Hiisi Lember na Maaja, binti yake

3. Ene na Corinna, dada yake