NOA ananyoosha mugongo wake na misuli yake yenye maumivu. Umuone akilini mwako akiwa mwenye kukaa kwenye kipande kikubwa cha muti, akipumuzika kidogo na kuangalia safina ambayo alikuwa anajenga. Harufu kali ya lami ao kabulimbo ilisambaa katika hewa na sauti za vyombo vya useremala zilisikika. Akiwa mahali anapokaa, Noa angeweza kuona watoto wake wakijenga kwa bidii sehemu mbalimbali za jengo hilo kubwa la mbao. Sasa, kwa makumi ya miaka, watoto wake, bibi zao, na bibi yake mupendwa, wote wamekuwa wakitumika kwa bidii pamoja naye. Wamekwisha kufanya sehemu kubwa ya kazi, lakini wangali na kazi nyingi ya kufanya ili kumaliza ujenzi wa safina!

Watu wa eneo hilo waliwaza kwamba Noa na familia yake wamepatwa na wazimu. Kadiri safina inavyoendelea kujengwa, ndivyo watu wanavyoendelea kuchekelea wazo la kwamba garika ingekuja na kufunika dunia yote. Musiba ambao Noa aliendelea kuwaonya juu yake ulionekana kuwa jambo lisilowezekana na la kuchekesha! Hawakuweza kuelewa sababu gani mutu angetumia bure maisha yake na ya watu wa familia yake kwa ajili ya kazi hiyo waliyoona kuwa ya kipumbavu. Hata hivyo, Yehova, Mungu wa Noa, hakumuona kuwa amepatwa na wazimu.

Neno la Mungu linasema hivi: “Noa alitembea pamoja na Mungu wa kweli.” (Mwanzo 6:9) Kutembea pamoja na Mungu kulimaanisha nini? Hakukumaanisha kwamba Mungu alitembea duniani, ao kwamba Noa alienda mbinguni. Lakini kulimaanisha kwamba Noa alimutii Mungu na kumupenda sana, ilikuwa kama vile yeye na Yehova walitembea pamoja wakiwa marafiki. Maelfu ya miaka baadaye, Biblia ilisema juu ya Noa hivi: “Kupitia imani [yake] aliuhukumu ulimwengu.” (Waebrania 11:7) Namna gani aliuhukumu ulimwengu? Tunaweza kujifunza nini leo kutokana na imani yake?

Noa alikomalia katika ulimwengu ulioendelea kuharibika sana. Ubaya ulikuwa mwingi katika siku za Enoko, baba ya tate (nkambo) yake, mutu mwengine mwenye haki aliyetembea pamoja na Mungu. Enoko alikuwa ametabiri kwamba siku ya hukumu ingekuja juu ya watu wa ulimwengu wa wakati huo ambao hawakumuogopa Mungu. Sasa, katika siku za Noa, mwenendo wa watu ulikuwa mubaya zaidi. Kwa kweli, machoni pa Yehova, dunia iliharibika, kwa sababu ilijaa jeuri. (Mwanzo 5:22; 6:11; Yuda 14, 15) Ni nini iliyofanya hali ya dunia iwe mbaya zaidi?

Jambo mbaya zaidi lilitokea kati ya malaika, wana wa kiroho wa Mungu. Mumoja wao alikuwa tayari amemuasi Yehova, naye akawa Shetani Ibilisi kwa kumusingizia Mungu na kuwashawishi Adamu na Eva watende zambi. Katika siku za Noa, malaika wengine waliasi utawala wenye haki wa Yehova. Waliacha makao yao ya kiroho huko mbinguni na walikuja duniani, walivaa miili ya kibinadamu na wakajikamatia mabinti wenye sura nzuri kuwa bibi zao. Malaika hao wenye kiburi na wenye kutafuta faida zao wenyewe walichochea watu watende mambo mabaya sana.​—Mwanzo 3:1-5; 6:1, 2; Yuda 6, 7.

Zaidi ya hilo, muungano kati ya malaika waliovaa miili ya kibinadamu na wanawake ulitokeza watoto wasio wa kawaida ambao walikuwa wakubwa na warefu sana na wenye nguvu nyingi. Biblia inawaita Wanefili, jina linalomaanisha “Waangushaji,” ni kusema, wale wanaoangusha wengine. Wanefili hao ambao walikuwa wachokozi na wenye jeuri walifanya hali iwe  mbaya zaidi duniani. Bila shaka, machoni pa Muumbaji, ‘ubaya wa mwanadamu ulikuwa mwingi duniani na kila mwelekeo wa fikira za moyo wake ulikuwa mubaya tu wakati wote.’ Yehova aliamua kuharibu watu hao wabaya kisha miaka 120.​—Mwanzo 6:3-5.

Wazia namna ilivyokuwa vigumu sana kulea watoto katika dunia kama hiyo! Lakini, Noa aliweza kulea watoto katika dunia hiyo. Alipata bibi muzuri. Noa alipoeneza miaka 500, bibi yake alimuzalia watoto watatu​—Shemu, Hamu, na Yafethi. * Noa na bibi yake walipaswa kuwalinda watoto wao na uvutano mubaya wa watu waliowazunguka. Watoto wanaume wana mwelekeo wa kushangazwa na kuvutiwa na “watu wenye nguvu” na “wanaume wenye sifa”—na hivyo ndivyo Wanefili walivyokuwa. Ilikuwa vigumu kwa Noa na bibi yake kuwalinda watoto wao ili wasisikie kila habari juu ya matendo maovu ya watu hao wakubwa sana, lakini wangeweza kuwafundisha kweli yenye kupendeza juu ya Yehova Mungu, yule anayechukia mambo mabaya. Walipaswa kuwasaidia watoto wao kuona kwamba Yehova aliumia moyoni kwa sababu ya jeuri na uasi huo uliokuwa duniani.​—Mwanzo 6:6.

Leo, wazazi wanaweza kujitia pa nafasi ya Noa na bibi yake. Dunia yetu ni yenye kujaa jeuri na uasi. Hata mambo ya kujifurahisha yanayofanywa kwa ajili ya watoto yanaweza kuwa yenye kujaa jeuri na uasi. Wazazi wenye hekima wanafanya yote wanayoweza ili kuwasaidia watoto wao wasishawishiwe na mambo kama hayo, kwa kuwafundisha juu ya Yehova, Mungu wa amani, ambaye siku moja atamaliza uovu wote duniani. (Zaburi 11:5; 37:10, 11) Hata katika dunia hii yenye uovu, wazazi wanaweza kuwasaidia watoto wao wajifunze kufanya mambo mema! Noa na bibi yake waliweza. Watoto wao walikomaa na kuwa wanaume wazuri, na walioa bibi ambao walikuwa tayari kumutia Yehova, Mungu wa kweli, pa nafasi ya kwanza katika maisha yao.

Siku moja, maisha ya Noa yalibadilika kabisa. Yehova alizungumuza na mutumishi wake mupendwa na kumujulisha kusudi lake la kuharibu dunia ya wakati huo. Mungu alimuamuru Noa hivi: ‘Jifanyie safina ya muti wenye utomvu.’​—Mwanzo 6:14.

Safina hiyo haikuwa mashua, kama watu fulani wanavyowazia. Lakini ilikuwa kama sanduku kubwa. Haikuwa na sehemu ya mbele wala sehemu ya nyuma iliyo kama ya mashua, haikuwa na usukani, wala sehemu zingine za mashua. Yehova alimupatia Noa vipimo kamili vya safina, maelezo fulani juu ya umbo lake, na maagizo juu ya namna ya kuipaka lami ndani na inje. Na alimuambia Noa sababu gani alipaswa kujenga safina. Alisema hivi: ‘Mimi ninaleta garika ya maji duniani . . . Kila kitu kilicho duniani kitakata pumuzi.’ Lakini, Yehova alimupatia Noa agizo hili: ‘Nawe uingie ndani ya safina, wewe na wana wako na muke wako na wake za wana wako pamoja nawe.’ Noa alipaswa pia kuingiza katika safina wanyama fulani kati ya kila aina. Wanyama walioingizwa katika safina ndio tu wangeokoka Garika!​—Mwanzo 6:17-20.

Noa alikuwa na kazi kubwa. Safina hiyo ilikuwa kubwa sana—ilikuwa na urefu wa metre 133, upana wa metre 22, na kimo cha metre 13. Ilikuwa kubwa zaidi kuliko mashua yoyote ya mbao ambayo imejengwa katika siku zetu. Je, Noa alijaribu kuepuka mugawo wake, kunungunika kwamba ni mugawo mugumu, ao  kubadilisha vipimo alivyopewa ili kufanya kazi hiyo iwe nyepesi zaidi? Biblia inajibu hivi: ‘Noa akafanya kulingana na yote ambayo Mungu alikuwa amemuamuru. Alifanya vivyo hivyo.’​—Mwanzo 6:22.

Kazi ilichukua makumi ya miaka, labda miaka 40 mupaka 50. Kulikuwa miti ya kuangusha, vipande vya miti vya kukokota, kuvikatakata na kuvichonga na hata kuviunganisha pamoja. Safina ilipaswa kuwa na gorofa tatu, vyumba mbalimbali, na mulango kwenye upande wake mumoja. Ni wazi kwamba kulikuwa madirisha kwenye sehemu ya juu, pande zote, na paa ambayo labda ilikuwa yenye kuinuka kidogo katikati na yenye kupakwa lami ndogo ili maji yaweze kuteremuka.​—Mwanzo 6:14-16.

Kadiri miaka ilivyopita na safina ilivyoendelea kujengwa, Noa alipaswa kufurahi sana kwa kusaidiwa na familia yake! Zaidi ya kujenga safina, Noa alikuwa na mugawo mwengine mugumu. Biblia inatuambia kwamba Noa alikuwa ‘muhubiri wa [haki].’ (2 Petro 2:5) Kwa hiyo, aliongoza kwa bidii kazi ya kujaribu kuonya watu waovu na wasiomuogopa Mungu juu ya uharibifu uliokaribia. Watu walitenda namna gani? Baadaye Yesu Kristo alizungumuzia wakati huo, aliposema kwamba watu hao “hawakujali.” Alisema kwamba walijiingiza sana katika shuguli za maisha za kila siku, ni kusema, kula, kunywa, na kuoa ao kuolewa​—hivi kwamba hawakumusikiliza Noa. (Mathayo 24:37-39) Bila shaka, wengine walimuzihaki yeye na familia yake; wengine walimuogopesha na kumupinga vikali.

Hata hivyo, Noa na familia yake hawakuvunjika moyo hata kidogo. Hata ikiwa waliishi katika ulimwengu ambao ulichochea watu kutia vitu vya kimwili pa nafasi ya kwanza katika maisha, Noa na familia yake waliendelea kujenga safina kwa uaminifu ijapokuwa watu waliiona kazi hiyo kuwa isiyo ya maana, isiyofaa, na ya kipumbavu. Leo, familia za Kikristo zinaweza kujifunza mengi kuhusu imani ya Noa na familia yake. Kwa kweli, tunaishi katika kipindi ambacho Biblia inaita “siku za mwisho” za ulimwengu huu muovu. (2 Timotheo 3:1) Yesu alisema kwamba wakati wetu ungekuwa tu kama wakati ambamo Noa alijenga safina. Ikiwa watu hawapendezwe na ujumbe wa Ufalme wa Mungu, wanatucheka, ao hata kutupinga, sisi Wakristo tunapaswa kumukumbuka Noa. Hatuko wa kwanza kupambana na matatizo kama hayo.

Miaka ikapita, na ujenzi wa safina ulikuwa unakabiria mwisho. Noa alipokaribia kuwa na miaka 600, alifiwa na watu aliowapenda. Lameki, baba yake alikufa. * Miaka 5 kisha hapo, Methusela, baba ya tate (nkambo) yake akakufa, akiwa na miaka 969—yeye ndiye mwanadamu aliyeishi miaka mingi zaidi kuliko wengine wote wanaozungumuziwa katika Biblia. (Mwanzo 5:27) Methusela na Lameki, wote wawili waliishi wakati mumoja na Adamu, mutu wa kwanza.

Katika mwaka uleule ambamo Lameki alikufa, Yehova Mungu alimupatia Noa, muzee wa ukoo ujumbe huu mupya: “Ingia ndani ya safina, wewe pamoja na nyumba yako yote.” Wakati huohuo, Mungu alimuambia Noa aingize kila aina ya wanyama katika safina, ni kusema, wanyama saba saba kati ya wale walio safi, wanaofaa kwa ajili ya zabihu, na wanyama mbili mbili kati ya wale wasio safi.​—Mwanzo 7:1-3.

Hilo lilikuwa jambo lisiloweza kusahaulika kabisa. Mamia ya wanyama walikuja kutoka pande zote—wakitembea, wakiruka, wakitambaa, wakitagaa-tagaa, wakitembea kwa kishindo—wote wakiwa na ukubwa, umbo, na tabia zenye kushangaza. Hatuhitaji kuwazia kwamba Noa alijaribu kukusanya, kuzozana, wala kubembeleza wanyama hao ili kuwaingiza katika nafasi yao ndogo sana ya safina. Habari hiyo inasema kwamba ‘wakaingia kwa Noa ndani ya safina.’​—Mwanzo 7:9.

Watu fulani walio na mashaka wanaweza kuuliza  hivi: ‘Jambo kama hilo lingeweza kutendeka namna gani? Na namna gani wanyama hao wangeweza kuishi pamoja kwa amani katika chumba hicho kidogo?’ Fikiria hili: Je, Muumbaji wa ulimwengu wote hana mamlaka juu ya wanyama, na je, hawezi kuwafanya wawe watiifu, ikiwa inahitajiwa? Kumbuka kwamba Yehova ni Mungu ambaye aligawanya Bahari Nyekundu na aliyefanya jua lisimame. Je, hangeweza kutimiza kila tukio linaloelezwa katika habari ya Noa? Bila shaka aliweza, na alifanya hivyo!

Kwa kweli, Mungu angeweza kuchagua njia nyingine ili kuwalinda wanyama wake. Hata hivyo, kwa hekima alichagua njia inayotukumbusha kwamba hapo mwanzoni alimutumainia mwanadamu ili kushugulikia viumbe vyote vinavyoishi juu ya dunia hii. (Mwanzo 1:28) Leo, wazazi wengi wanatumia habari ya Noa ili kuwafundisha watoto wao kwamba Yehova anaona watu na wanyama ambao aliumba kuwa wa maana.

Yehova alimuambia Noa kwamba Garika ingekuja kisha juma moja. Familia ya Noa ilipaswa kuwa na shuguli nyingi katika juma hilo. Wazia kazi ya kuingiza na kupanga wanyama wote na vyakula vyao katika safina na pia vitu vyote vya familia. Inawezekana bibi ya Noa na bibi za watoto wake watatu walikuwa na kazi nyingi za kufanya ili safina iwe mahali pazuri pa kuishi.

Tuseme nini juu ya watu waliowazunguka? Bado “hawakujali”​—hata ikiwa waliona mambo yote yaliyohakikisha kwamba Yehova alikuwa anamubariki Noa na kazi yake. Hawakufanya jambo lolote isipokuwa tu kutazama namna wanyama walivyokuwa wakiingia kwa uwingi katika safina. Lakini hatupaswe kushangazwa na kutojali kwao. Leo, watu hawajali mambo mengi yanayohakikisha kwamba tunaishi sasa katika siku za mwisho za ulimwengu huu. Na kama vile mutume Petro alivyotabiri, wazihaki wamekuja na zihaka zao, wakiwachekelea wale wanaotii maonyo ya Mungu. (2 Petro 3:3-6) Kwa kweli, watu walimuzihaki pia Noa na familia yake.

Zihaka zao ziliisha wakati gani? Habari hiyo inatuambia kwamba wakati tu Noa na familia yake na wanyama wote walipoingia katika safina, ‘Yehova akafunga mulango nyuma yake.’ Ikiwa wazihaki hao walikuwa karibu, tendo hilo la Mungu liliwanyamazisha kabisa. Ikiwa hawakunyamazishwa na tendo hilo, mvua iliwanyamazisha bila shaka, kwa sababu ilikuja hakika! Na iliendelea kunyesha tena na tena na tena, mupaka ikafunika dunia, kama vile Yehova alivyokuwa amesema.​—Mwanzo 7:16-21.

Je, Yehova alifurahia kifo cha watu hao wabaya? Hapana! (Ezekieli 33:11) Tofauti na hilo, Yehova alikuwa amewapatia nafasi ya kubadilisha njia zao na kufanya mema. Je, walifanya hivyo? Namna Noa alivyoishi ilijibu ulizo hilo. Kwa kutembea pamoja na Yehova, na kumutii katika mambo yote, Noa alionyesha kwamba wokovu uliwezekana. Katika njia hiyo, imani yake iliuhukumu ulimwengu wa wakati wake; imani yake ilionyesha kwamba iliwezekana kuishi maisha yanayomupendeza Mungu. Imani yake ilimuokoa yeye na familia yake. Ikiwa unaiga imani ya Noa, unaweza pia kujiokoa na kuokoa wale unaowapenda. Kama Noa, unaweza kutembea pamoja na Yehova Mungu akiwa rafiki yako. Na urafiki wenu unaweza kudumu milele!