“Kujisikia kuwa sifae ndicho kizuizi kikubwa ambacho ninajikaza kupambana nacho.” Hivyo ndivyo alivyosema mwanamuke mumoja aliyeona kuwa vigumu kuamini kama Yehova anaweza kuwa na sababu ya kumuhangaikia. Je, umekwisha kujisikia hivyo? Ikiwa ndiyo, unaweza kujiuliza, ‘Je, kweli Yehova anahangaikia kila muabudu wake kipekee?’ Jibu ni ndiyo! Maneno ya Yesu yanatuhakikishia kama Yehova anahangaikia kila mumoja wetu kipekee.​—Soma Yohana 6:44.

Yesu, anayejua vizuri zaidi sifa na mapenzi ya Yehova kuliko mutu mwengine yeyote, alisema nini? (Luka 10:22) Yesu alieleza hivi: ‘Hakuna mutu anayeweza kuja kwangu isipokuwa Baba, aliyenituma, amuvute; nami nitamufufua siku ya mwisho.’ Kwa hiyo, hatuwezi kuwa wafuasi wa kweli wa Kristo na waabudu wa Yehova, Baba yetu wa mbinguni, isipokuwa Yehova mwenyewe atuvute. (2 Wathesalonike 2:13) Ikiwa tunaelewa kile Yesu alimaanisha, maneno yake yatatusadikisha kabisa kama Mungu anahangaikia kila mumoja wetu kipekee.

Inamaanisha nini kusema kama Yehova anatuvuta? Neno la Kigiriki lililotafsiriwa ‘kuvuta’ linatumiwa pia ili kumaanisha kukokota samaki katika wavu. (Yohana 21:6, 11) Je, Yehova anatukokota bila sisi kupenda, akitulazimisha tumutumikie? Hapana. Yehova alitupatia uhuru wa kuchagua, kwa hiyo, hatulazimishe tufungue mioyo yetu. (Kumbukumbu la Torati 30:19, 20). Yehova anachunguza kwa uangalifu mioyo ya mamilioni ya watu katika dunia hii, akitafuta watu walio na mwelekeo unaofaa. (1 Mambo ya Nyakati 28:9) Yehova anapopata mutu wa namna hiyo, anatenda kwa njia yenye kugusa moyo. Anafanya hivyo namna gani?

Yehova anakokota, ao kuvuta kwa upole moyo wa mutu aliye na “mwelekeo unaofaa.” (Matendo 13:48) Yehova anafanya hivyo katika njia mbili: kupitia ujumbe wa habari njema ulio katika Biblia, unaofikia kila mumoja wetu kipekee, na kupitia roho yake takatifu. Yehova anapoona moyo unaoitikia kweli ya Biblia, anatumia roho yake ili kusaidia mutu huyo ambaye moyo wake uliitikia kweli aielewe na kuitumia katika maisha yake. (1 Wakorintho 2:11, 12) Bila musaada wa Mungu, hatungeweza kuwa wafuasi wa kweli wa Yesu na waabudu waliojitoa kwa Yehova.

Maneno ya Yesu yaliyoandikwa katika andiko la Yohana 6:44 yanatufundisha nini kumuhusu Yehova Mungu? Yehova anavuta watu kwa sababu anatambua jambo fulani nzuri katika moyo wao na anahangaikia kila mumoja kipekee. Kuelewa kweli hiyo yenye kutuliza kulimutia moyo mwanamuke aliyetajwa mwanzoni mwa habari hii. Anasema hivi: “Kuwa mutumishi wa Yehova ni pendeleo kubwa sana ambalo kila mutu anaweza kupata. Na ikiwa Yehova alinichagua kuwa mumoja wa watumishi wake, kwa hiyo ninapaswa kuwa mutu wa maana machoni pake.” Wewe unawaza namna gani? Je, kujua kama Yehova anahangaikia kila muabudu wake kipekee kunakuchochea uwe na nia ya kumukaribia?