JONATHAN, Muamerika wa asili ya Korea, alichukiwa kwa sababu ya rangi yake ya ngozi alipokuwa mutoto. Alipokuwa akikomaa, alitafuta mahali ambapo watu hawangemuchukia kwa sababu ya sura yake ao rangi yake ya ngozi. Akawa muganga katika muji fulani kaskazini mwa Alaska, huko Amerika, ambako hali yake ya inje ilifanana sana na ile ya wagonjwa wengi aliokuwa akitunza. Alitumaini kwamba, labda huko, katikati ya upepo wenye baridi sana wa Arktiki, ataepuka matokeo mabaya zaidi ya chuki.

Tumaini lolote kama hilo lilivunjwa wakati alimutunza mwanamuke mumoja mwenye miaka 25. Mugonjwa huyo alipotoka katika hali yake ya kupoteza ufahamu, alimuangalia Jonathan kwenye uso na akamuambia maneno ya zarau, hivyo akafunua chuki kali aliyokuwa nayo moyoni kuelekea Wakorea. Jambo hilo lilimukumbusha Jonathan kwa huzuni nyingi kwamba bidii zote alizofanya ili kuhama na kukubaliwa na Waeskimo hazingemusaidia kuepuka chuki.

Jambo hilo ambalo lilimupata Jonathan linaonyesha ukweli wenye kuhuzunisha sana. Katika kila sehemu ya  dunia, watu wana chuki. Inaonekana kwamba mahali popote ambako kuna watu, kuna chuki.

Hata hivyo, ijapokuwa chuki inaenea sana, watu wengi wanapinga chuki. Hilo ni jambo ambalo halieleweke. Inawezekana namna gani jambo ambalo watu hawapendi lienee katika dunia yote? Ni wazi kwamba watu wengi ambao wanapinga chuki wanashindwa kutambua kwamba wao wenyewe wana chuki ndani yao. Je, wewe pia una tatizo hilo? Unaweza kujibu ulizo hilo namna gani?

Iwe tunatambua hivyo ao hapana, ni vigumu kwetu kujua ikiwa mioyo yetu inajaa chuki. Biblia inaeleza sababu inaposema hivi: ‘Moyo ni mudanganyifu kuliko vitu vyote.’ (Yeremia 17:9) Kwa hiyo, tunaweza kujidanganya kwa kuamini kwamba tunawavumilia watu wa aina zote. Ao tunaweza kujitetea kwamba tuna sababu nzuri ya kuwa na mawazo mabaya juu watu wa makabila fulani.

Ili kuonyesha kwamba ni vigumu kutambua ikiwa tuna chuki inayojificha ndani ya moyo wetu, wazia hali inayofuata: Unatembea katika barabara usiku wenye giza ukiwa peke yako. Vijana wanaume wawili ambao haujaona hata siku moja wanakuja mbele yako. Wanaonekana kuwa wenye nguvu, na mumoja wao anaonekana kuwa na kitu fulani katika mukono wake.

Je, utafikia uamuzi wa kwamba vijana hao ni watu hatari kwako? Kwa kweli, mambo yaliyokupata katika maisha yako yanaweza kukufanya uwe mwangalifu, lakini je, kwa kweli mambo hayo uliyojionea yanahakikisha kwamba vijana hao wawili ni hatari kwako? Labda unaweza kujiuliza ulizo hili la kujichunguza, Ninawazia vijana hao wanaume kuwa wa rangi ao kabila gani? Jibu lako kwa ulizo hilo linaweza kufunua mambo yaliyo ndani ya moyo wako. Linaweza kuonyesha kwamba, kwa kadiri fulani, tayari moyo wako umekwisha kuingiwa na chuki.

Ikiwa tunajijua vizuri kabisa, tunapaswa kukubali kabisa ndani ya moyo wetu kwamba sisi wote tuna kiasi fulani cha chuki katika njia moja ao nyingine. Hata Biblia inazungumuzia aina fulani ya chuki iliyo ya kawaida kwa watu wengi inaposema hivi: “Mwanadamu huona kile kinachoonekana kwa macho.” (1 Samweli 16:7) Kwa sababu sisi wote tuna mwelekeo huo wa kibinadamu, ambao mara nyingi unaleta matokeo mabaya, je, kuna tumaini lolote kwamba tunaweza kushinda ao kuondoa chuki katika maisha yetu? Na je, kutakuwa wakati ambapo chuki itaisha katika dunia yote?