“Mutu ambaye hawezi kuwasamehe wengine anavunja daraja ao kilalo ambako yeye mwenyewe anapaswa kupita.” Maneno hayo ya Edward Herbert, mwanahistoria Mwiingereza aliyeishi kati ya mwaka wa 1601 na 1700 yanakazia sababu moja inayofanya iwe lazima kwetu kuwasamehe wengine: Siku moja, tunaweza kuwaomba wengine watusamehe. (Mathayo 7:12) Hata hivyo, tuna sababu ya maana zaidi ya kuwasamehe wengine. Ona maneno ya mutume Paulo yaliyo katika andiko la Wakolosai 3:13.​—Soma.

Kwa sababu sisi wote si wakamilifu, wakati fulani tunaweza kuwakasirisha ao kuwakosea wengine, na wao pia wanaweza kututendea vivyo hivyo. (Waroma 3:23) Namna gani tunaweza kuendelea kuwa na amani pamoja na wanadamu wenzetu wasio wakamilifu? Akiongozwa na roho ya Mungu, Paulo anatushauria kuwa wavumilivu na wenye kusamehe. Shauri hilo ni la maana sana leo kama lilivyokuwa wakati lilipoandikwa, kumepita karibu miaka elfu mbili. Tuchunguze basi kwa uangalifu zaidi maneno hayo ya Paulo.

“Endeleeni kuvumiliana.” Maneno “endeleeni kuvumiliana” yanaeleza neno la Kigiriki linalotoa wazo la kuwa muvumilivu ao mustahimilivu. Kitabu kimoja kinasema kwamba Wakristo wanaonyesha sifa hiyo ya uvumilivu kwa kuwa “tayari kuwavumilia watu ambao makosa yao ao tabia zao zisizofurahisha zinawakasirisha.” Neno “kuvumiliana” linatuonyesha kwamba uvumilivu unapaswa kuonyeshwa na pande zote mbili, ni kusema, kuvumiliana mumoja na mwengine. Hilo linamaanisha kwamba, wakati tunakumbuka kwamba tuna tabia ambazo zinaweza kuwakasirisha wengine, hatutaruhusu tabia za watu wengine ambazo hazitupendezi zivuruge amani kati yetu na watu hao. Lakini tutafanya nini ikiwa wengine wanatukosea?

“Endeleeni . . . kusameheana kwa hiari [ao kwa kupenda].” Kulingana na mutu mumoja mwenye elimu, neno la Kigiriki lililotafsiriwa “kusamehe kwa hiari” “si neno linalotumiwa kwa ukawaida ili kumaanisha musamaha . . . lakini ni neno ambalo lina maana zaidi linalokazia musamaha wa kutoka moyoni.” Kitabu kingine kinasema kwamba neno hilo la Kigiriki linaweza kumaanisha “kufanya kitu kiwe chenye kufurahisha, rehema, faida.” Tunajionyesha kuwa wenye kusamehe kutoka moyoni kwa kuwa tayari kusamehe hata ikiwa tuna ‘sababu ya kulalamika juu ya mwengine.’ Sababu gani basi tunapaswa kuwa tayari kuwaonyesha wengine rehema hiyo? Sababu moja ni kwamba wakati fulani tunaweza kuhitaji mutu aliyetukosea atuonyeshe rehema kwa kutusamehe.

“Kama vile Yehova alivyowasamehe ninyi kwa hiari, nanyi fanyeni vivyo hivyo pia.” Hiyo ndiyo sababu kubwa ya sisi kuwasamehe wengine kwa kupenda. (Mika 7:18) Fikiria kidogo rehema kubwa ambayo Yehova anaonyesha wafanya​-zambi wenye kutubu. Tofauti na sisi ambao ni wafanya​-zambi, Yehova hawezi kufanya zambi. Hata hivyo, anasamehe kwa kupenda na anasahau kabisa makosa ya wafanya​-zambi ambao wanatubu hata ikiwa anajua kwamba hatakuwa na lazima hata siku moja kwamba wafanya​-zambi hao wamuonyeshe rehema kwa kumusamehe. Kwa kweli, Yehova anaonyesha mufano muzuri kabisa kwa kuwa tayari kuwasamehe wafanya​-zambi wenye kutubu!

Rehema ya Yehova inatufanya tumukaribie na inatuchochea tuwe na nia ya kumuiga. (Waefeso 4:32–5:1) Ni vizuri kila mumoja wetu ajiulize, ‘Kwa sababu Yehova ananionyesha rehema kwa kunisamehe kabisa, namna gani ninaweza kukataa kusamehe mwanadamu mwenzangu asiye mukamilifu ambaye anatubu kabisa kwa sababu alinikosea?’​—Luka 17:3, 4.