Je, Yehova anapendezwa na mambo ambayo waabudu wake wanajikaza kufanya ili kumufurahisha? Watu fulani wanaweza kujibu hapana, wakisema kwamba Mungu hapendezwe na sisi. Lakini kusema hivyo ni kumuharibia Mungu sifa. Neno lake, Biblia, linasema kweli juu ya jambo hilo. Linatuhakikishia kwamba Yehova anapendezwa na bidii ambayo waabudu wake wanafanya ili kumufurahisha. Fikiria maneno ya mutume Paulo yanayopatikana katika Waebrania 11:6.

Tunaweza kufanya nini ili tumupendeze Yehova? Paulo anaandika hivi: ‘Bila imani haiwezekani kamwe kumupendeza Mungu vema.’ Ona kwamba Paulo haseme kuwa ni vigumu kumupendeza Mungu bila imani. Lakini, mutume Paulo anasema kwamba haiwezekani kumupendeza Mungu bila imani. Kwa maneno mengine, imani ni sifa ya maana sana ili kumupendeza Mungu.

Ni imani ya namna gani ambayo inamupendeza Yehova? Kumuamini Mungu kunapaswa kutia ndani mambo mawili. Jambo la kwanza, ni ‘lazima tuamini kwamba yeye yuko.’ Tafsiri zingine za Biblia zinasema “uamini kwamba yeye ni mutu kwelikweli” na “uamini kwamba yeye yuko.” Namna gani tunaweza kumupendeza Mungu ikiwa tuna mashaka kwamba yeye yuko? Hata hivyo, imani ya kweli inahusisha mambo mengi, kwa sababu hata mashetani wanaamini kwamba Yehova yuko. (Yakobo 2:19) Kuamini kwamba Mungu ni mutu kwelikweli kunapaswa kutuchochea kutenda, ni kusema, kuonyesha imani yetu kwa kuishi maisha ambayo yanamupendeza.​—Yakobo 2:20, 26.

Jambo la pili, ni ‘lazima tuamini kwamba’ Mungu ni ‘musawabishaji.’ Mutu ambaye ana imani ya kweli ana uhakika kabisa kwamba bidii yake ya kuishi maisha ambayo yanamupendeza Mungu si ya bure. (1 Wakorintho 15:58) Hatuwezi kumupendeza Yehova ikiwa tuna mashaka juu ya uwezo wake ao nia yake ya kutupatia zawadi. (Yakobo 1:17; 1 Petro 5:7) Mutu ambaye anasema kwamba Mungu hawahangaikie watu, hapendezwe na watu, na kwamba si mukarimu, mutu huyo hamujue Mungu ambaye anazungumuziwa katika Biblia.

Ni nani ambao Yehova anapatia zawadi? Paulo anasema kwamba ni ‘wale wanaomutafuta kwa bidii.’ Kitabu kimoja cha watafsiri wa Biblia kinasema kwamba neno la Kigiriki ambalo linatafsiriwa ‘wanaomutafuta kwa bidii,’ halimaanishe “kuenda kutafuta inje” lakini, linamaanisha kufanya bidii ya kumukaribia Mungu ili “kumuabudu.” Kitabu kingine kinaeleza kwamba neno hilo la Kigiriki linaonyesha nguvu na kufanya bidii nyingi. Ndiyo, Yehova anawapatia zawadi wale ambao imani yao inawachochea kumuabudu kwa moyo wenye kujaa upendo na bidii.​—Mathayo 22:37.

Namna gani Yehova anawapatia zawadi waabudu wake waaminifu? Amewaahidi kuwapatia zawadi nzuri sana wakati unaokuja, zawadi ambayo inaonyesha ukarimu na upendo wake mukubwa, ni kusema, uzima wa milele katika Paradiso duniani. (Ufunuo 21:3, 4) Hata sasa, wale ambao wanamutafuta Yehova kwa bidii wanapata baraka nyingi sana. Kwa musaada wa roho yake takatifu na hekima iliyo katika Neno lake, wanafurahia kuishi maisha mazuri na yenye kutosheleza.​—Zaburi 144:15; Mathayo 5:3.

Kwa kweli, Yehova ni Mungu mwenye upendo ambaye anapendezwa na kazi ya uaminifu ya waabudu wake wenye kujitolea kwa moyo. Je, kujua jambo hilo kunakuchochea kutaka kumukaribia Mungu zaidi? Ikiwa jibu lako ni ndiyo, basi jifunze mambo mengi zaidi juu ya namna unavyoweza kukomalisha na kuonyesha imani ambayo itamufanya Yehova akupatie zawadi nyingi.