RAHABU aliangalia kupitia dirisha lake wakati mwangaza wa mapambazuko ya jua ulipenyeza katika bonde linalozunguka muji wa Yeriko. Jeshi la wavamizi lilikusanyika katika bonde hilo, ni kusema, waaskari wa Israeli. Walipoanza tena kutembea kuzunguka muji, mavumbi yaliruka na mulio wa baragumu ulisikika kila mahali.

Yeriko ndio ulikuwa muji wa asili wa Rahabu, alijua barabara za muji huo, alijua nyumba zilizokuwa katika muji huo, soko na maduka zenye kujaa watu. Alijua vizuri hata watu wa muji huo. Angeweza kutambua namna watu walivyoendelea kuogopa sana kadiri siku zilivyoendelea kupita, na Waisraeli waliendelea na desturi yao isiyo ya kawaida, ni kusema, kutembea kuzunguka muji mara moja kwa siku. Lakini, mulio wa baragumu zao uliposikika katika barabara na njia za Yeriko, Rahabu hakuogopa na kuvunjika moyo kama watu wa muji huo.

Rahabu alitazama wakati majeshi yalianza kutembea asubuhi sana siku ya saba ya kuzunguka muji wa Yeriko. Kati ya waaskari wa Israeli, Rahabu aliona makuhani wao wakipiga baragumu na wakibeba sanduku takatifu ambalo lilifananisha kuwapo kwa Mungu wao, Yehova. Tunaweza kufikiria Rahabu akiwa mwenye kuweka mukono wake juu ya kamba nyekundu iliyokuwa ikininginia kwenye dirisha, ambalo lilikuwa upande wa ukuta mukubwa wa muji wa Yeriko. Kamba hiyo ilimukumbusha Rahabu tumaini alilokuwa nalo kwamba yeye na familia yake wangeokoka uharibifu wa muji huo. Je, Rahabu alikuwa musaliti? Mbele ya Yehova hakuwa musaliti; Yehova alimuona kuwa mwanamuke wa imani ya pekee. Acheni turudi nyuma na tuone namna maisha ya Rahabu yalivyokuwa na mambo tunayoweza kujifunza kutokana naye.

Rahabu alikuwa kahaba. Jambo hilo la hakika liliwashitua sana watu wenye elimu ya Biblia wakati uliopita. Walisema kwamba Rahabu alikuwa tu mwanamuke wa kutunza nyumba. Lakini, Biblia inasema waziwazi na haifiche mambo ya hakika. (Yoshua 2:1; Waebrania 11:31; Yakobo 2:25) Kwa watu wa Kanaani, kazi ya Rahabu ya ukahaba ilikuwa yenye kuheshimika sana. Hata ikiwa Wakanaani waliona kazi ya ukahaba kuwa yenye kukubalika, Rahabu alijua kwamba kazi hiyo ilikuwa mbaya kulingana na zamiri yake, ni kusema, sauti ambayo Yehova aliweka ndani yetu inayotuonyesha ikiwa jambo ni nzuri ao mbaya. (Waroma 2:14, 15) Inawezekana Rahabu alisikia haya kwa sababu ya mwenendo wake mubaya. Labda, kama watu wengi leo walio na mwenendo huo, alijisikia kuwa alikuwa amenaswa katika mutego, na hakuwa na jambo lingine la kufanya ili kushugulikia familia yake.

Bila shaka, Rahabu alitamani sana kuwa na maisha mazuri. Muji wake wa asili ulikuwa umejaa jeuri na mwenendo muovu, kutia ndani ngono kati ya watu wa familia moja na ngono kati ya watu na wanyama. (Mambo ya Walawi 18:3, 6, 21-24) Dini ndio ilichangia kuenea kwa matendo hayo mabaya katika inchi ya Kanaani. Mahekalu yalitumiwa kwa ajili ya ukahaba, na ibada ya miungu ya kishetani kama vile Baali na Moleki, na pia Wakanaani walichoma watoto wao ndani ya moto wa zabihu, wakiwa bado wazima.

Yehova aliona kabisa mambo yote yaliyokuwa yakifanyika katika inchi ya Kanaani. Kwa kweli, kwa sababu ya matendo mengi mabaya ya Wakanaani, Yehova alisema hivi: ‘Inchi si safi, nami nitaleta azabu kwa ajili ya kosa lake juu yake, nayo inchi itawatapika wakaaji wake.’ (Mambo ya Walawi 18:25) Maneno ‘azabu kwa ajili ya kosa lake’ yalimaanisha nini? Kwa  ujumla, Mungu aliwapa Waisraeli ahadi hii: “Yehova Mungu wako atayasukumia mbali mataifa haya toka mbele yako kidogo kidogo.” (Kumbukumbu la Torati 7:22) Mamia ya miaka mbele ya kutoa ahadi hiyo, Yehova alikuwa ameahidi kwamba ataipatia familia ya Abrahamu inchi ya Kanaani, na ‘Mungu hawezi kusema uwongo.’​—Tito 1:2; Mwanzo 12:7.

Hata hivyo, Yehova alikuwa ameamua pia kwamba vikundi fulani vya watu katika inchi ya Kanaani vingepaswa kuharibiwa kabisa. (Kumbukumbu la Torati 7:1, 2) Kwa sababu yeye ni ‘Muamuzi wa dunia yote,’ alikuwa amesoma mioyo yote na alijua vizuri namna uovu wao ulivyokuwa mwingi sana. (Mwanzo 18:25; 1 Mambo ya Nyakati 28:9) Rahabu alijisikia namna gani kuishi katika muji ambao ulikuwa umehukumiwa uharibifu? Tunaweza kuwazia namna alivyojisikia alipopata habari juu ya taifa la Israeli. Alijifunza kwamba Mungu wa Israeli aliwaongoza watu wake waliokuwa taifa la watumwa ambao walikuwa wakiteswa huko Misri. Yehova alifanya hivyo ili akamilishe ushindi juu ya jeshi la Misri, ambalo lilikuwa jeshi la wapiganaji wenye nguvu zaidi duniani wakati huo. Na sasa taifa la Israeli lilikuwa tayari kushambulia muji wa Yeriko! Hata hivyo, watu wa muji huo waliendelea tu kufanya mambo maovu. Tunaweza kuelewa sababu gani Biblia inazungumuza juu ya Wakaaji wa Kanaani kuwa watu “waliotenda kwa kutotii.”​—Waebrania 11:31.

Rahabu alikuwa tofauti na watu hao. Kwa miaka mingi, labda alifikiri juu ya habari ambazo alisikia kuhusu Waisraeli na Yehova, Mungu wao. Yehova alikuwa tofauti kabisa na miungu ya Wakanaani! Alikuwa Mungu ambaye alipigania watu wake kuliko kuwatendea isivyo haki, ambaye aliwapatia waabudu wake kanuni za mwenendo muzuri kuliko kuwashushia heshima. Mungu huyo aliwaona wanawake kuwa watu wa maana sana, na si kama vyombo vya ngono ambavyo vinapaswa kuuzishwa, kununuliwa, na kuzarauliwa katika ibada chafu. Wakati Rahabu alijua kwamba Waisraeli walikuwa wamepiga kambi ngambo nyingine ya muto Yordani, wakiwa tayari kushambulia, alipaswa kuwa alihuzunika kuhusu mambo ambayo yangewapata watu wake. Je, Yehova alimuona Rahabu na mambo mema yaliyokuwa ndani ya moyo wake?

Leo, kuna watu wengi walio kama Rahabu. Wanajisikia kuwa wenye kunaswa katika mutego kwa kuwa na mwenendo ambao unawakosesha heshima na furaha, na wanajisikia kwamba hakuna mutu anayewaona na kuwachukua kuwa watu wa maana. Hali ya Rahabu inatufariji kwa kutukumbusha kwamba Mungu anaona kila mutu. Hata tukivunjika moyo kadiri gani, ‘hayuko mbali sana na kila mumoja wetu.’ (Matendo 17:27) Mungu yuko karibu sana, yuko tayari na ana nia ya kuwapa tumaini wale wote wanaomuamini. Je, Rahabu alimuamini?

Siku moja, mbele Waisraeli watembee kuzunguka muji wa Yeriko, wageni wawili walifika kwa Rahabu. Wanaume hao wawili walifikiri kwamba hakuna mutu angewaona, lakini katika muji huo ambamo watu walikuwa na woga, watu wengi walikuwa waangalifu ili kutambua mupelelezi yeyote ambaye angetoka kwa Waisraeli. Rahabu ambaye alikuwa muangalifu sana alitambua haraka kwamba wanaume hao walikuwa wapelelezi. Si kwa sababu wageni wanaume walizoea kufika kwake, lakini ni kwa sababu wanaume hao wawili walitaka tu Rahabu awapatie mahali pa kulala, hawakufika ili kutafuta kulala na kahaba huyo.

Kwa kweli, wanaume hao wawili walikuwa wapelelezi waliotoka kwenye kambi ya Waisraeli. Yoshua, kiongozi wa jeshi lao, aliwatuma ili kuona nguvu na uzaifu wa muji wa Yeriko. Huo ndio ulikuwa muji  wa kwanza wa Kanaani ambao Waisraeli walipaswa kushambulia na labda huo ndio ulikuwa muji wenye nguvu zaidi kati ya miji mingine yote. Yoshua alitaka tu kujua yeye na watu wake wangepambana na hali gani. Bila shaka, wapelelezi hao walijua sababu gani walichagua nyumba ya Rahabu. Wageni hao wangetambuliwa haraka mahali pengine, lakini katika nyumba ya kahaba hawangetambuliwa kwa vyepesi. Labda wapelelezi hao walitumaini pia kupata habari za maana kwa kusikiliza mazungumuzo ya watu wasio waangalifu.

Biblia inasema kwamba Rahabu ‘aliwakaribisha wale wajumbe.’ (Yakobo 2:25) Aliwaingiza katika nyumba yake, na hata ikiwa alikuwa na mashaka juu yao na sababu gani walikuja, aliacha wanaume hao wakae kwake. Labda Rahabu alitumaini kwamba wanaume hao wangemujulisha mambo mengi juu ya Mungu wao, Yehova.

Lakini, kwa gafula, watu ambao walitumwa na mufalme wa Yeriko walifika kwa Rahabu! Habari ilikuwa imeenea kwamba wapelelezi kutoka kwa Waisraeli walikuwa wamekuja kwa Rahabu. Rahabu angefanya nini? Ikiwa angewalinda wageni hao wawili, angeweza kujitia katika hatari yeye na familia yake yote. Watu wa muji wa Yeriko wangemuua yeye na familia yake yote ikiwa angewalinda maadui kama hao. Lakini, Rahabu alijua kabisa wanaume hao walikuwa nani. Kwa sababu tayari alijua kwamba Yehova alikuwa ndiye Mungu muzuri zaidi kuliko mungu wake, hiyo ilikuwa nafasi nzuri kwake kuamua kuwa upande wa Yehova.

Rahabu hakuwa na wakati mwingi wa kufikiri, lakini alijua jambo la kufanya na alitenda bila kukawia. Aliwaficha wapelelezi katikati ya marundo ya majani ya kitani yaliyokuwa yakikaushwa juu ya dari la nyumba yake. Kisha akazungumuza na watu ambao walitumwa na mufalme kwa kusema hivi: ‘Ni kweli, wanaume hao walikuja kwangu, lakini sikujua mahali walitoka. Ikawa wakati wa kufungwa kwa lango, kulipokuwa na giza, wanaume wale wakatoka. Wala sijui mahali walienda. Wafuatilieni haraka, kwa maana mutawafikia.’ (Yoshua 2:4, 5) Fikiria Rahabu akitazama nyuso za watu ambao walitumwa na mufalme. Je, alijiuliza ikiwa watu hao walitambua kwamba moyo wake ulikuwa unapiga​-piga kwa woga?

Ujanja wake ulikuwa na matokeo mazuri! Watu ambao walitumwa na mufalme walienda haraka kuelekea vivuko vya Yordani. (Yoshua 2:7) Inaonekana moyo wa Rahabu ulitulia sana wanaume hao walipoondoka! Kwa kutumia ujanja kidogo tu Rahabu aliwaongoza vibaya wanaume hao wauaji ambao hawakuwa na haki ya kuambiwa kweli na aliwaokoa watumishi wa Yehova ambao hawakuwa na kosa.

Rahabu alienda haraka juu ya dari la nyumba yake na kuwaambia wale wapelelezi wawili jambo ambalo alikuwa amefanya. Aliwafunulia pia jambo moja la maana: Watu wa taifa lake walikuwa wenye kuvunjika moyo na walikuwa wanaogopa sana Waisraeli ambao walikuja kuwavamia. Habari hiyo iliwatia nguvu sana wapelelezi hao. Wakanaani hao waovu walikuwa wanaogopa sana nguvu za Yehova, Mungu wa  Israeli! Kisha, Rahabu alifunua jambo fulani ambalo ni la maana sana kwetu. Alisema hivi: “Yehova Mungu wenu ni Mungu juu mbinguni na chini duniani.” (Yoshua 2:11) Habari ambazo Rahabu alikuwa amesikia kuhusu Yehova zilitosha ili kumufundisha kwamba alikuwa na sababu nzuri ya kumutumainia Mungu wa Israeli. Alimuamini Yehova.

Rahabu hakuwa na shaka lolote kwamba Yehova angewapa watu wake ushindi. Kwa hiyo, aliwaomba wanaume hao wamuonyeshe rehema, akiwasihi kwamba wamuokoe yeye na watu wa familia yake. Wapelelezi hao walikubali na wakamuonyesha Rahabu kwamba alipaswa kulinda siri yao na kuninginiza kamba nyekundu kwenye dirisha lake kuelekea ukuta wa muji ili waaskari wamulinde yeye na familia yake.​—Yoshua 2:12-14, 18.

Tunaweza kujifunza jambo fulani la maana kuhusu imani ya Rahabu. Kama Biblia inavyosema, ‘imani inafuata jambo lililosikiwa.’ (Waroma 10:17) Rahabu alisikia habari zenye kutegemeka kuhusu nguvu na haki ya Yehova Mungu, kwa hiyo akamuamini Yehova na kumutumainia. Leo, tunajua mambo mengi kuhusu Yehova. Je, tutajikaza kumujua Yehova na kumuamini kwa kutegemea mambo ambayo tunajifunza katika Neno lake, Biblia?

Kwa kufuata shauri la Rahabu, wale wapelelezi wawili walishuka kwenye ukuta kupitia kamba iliyoninginizwa kwenye dirisha la Rahabu na kisha wakashuka haraka milimani kwa uficho. Kulikuwa na mapango mengi kwenye miteremuko ya milima ya Yeriko ya kaskazini. Wapelelezi hao wangeweza kujificha katika mapango hayo mupaka wangefika mahali salama na kurudi kwenye kambi ya Israeli wakiwa na habari njema waliyokuwa wamepata kutoka kwa Rahabu.

Baadaye, watu wa Yeriko walitetemeka kabisa kwa woga walipojua kwamba Yehova alisimamisha kimuujiza maji ya Muto Yordani, na kuruhusu Waisraeli wavuke kwenye njia ya muto uliyokuwa imekaushwa. (Yoshua 3:14-17) Lakini kuhusu Rahabu, habari hiyo ilimuhakikishia zaidi kwamba alikuwa na sababu nzuri ya kumuamini Yehova.

Kisha, Waisraeli wakaanza kutembea kuzunguka muji wa Yeriko siku sita, wakizunguka muji huo mara moja kwa siku. Sasa siku ya saba ikafika, na siku hiyo ilikuwa tofauti na siku zingine. Kama ilivyoonyeshwa mwanzoni mwa habari hii, walianza kutembea wakati wa mapambazuko ya jua, na baada ya waaskari kuzunguka muji mara ya kwanza, waliendelea kuzunguka tena na tena muji wa Yeriko. (Yoshua 6:15) Waisraeli hao walikuwa wanafanya nini?

Mwishowe, walipomaliza kuzunguka muji kwa mara ya saba siku hiyo ya saba, waaskari wakasimama. Baragumu zikaacha kupigwa. Kimya kikaenea kila mahali. Watu wakashikwa na woga katika muji wote. Kisha, Yoshua akaonyesha alama, waaskari wa Israeli wakapaaza sauti zao kwa mara ya kwanza, wakazipaaza kwa nguvu sana. Walinzi ambao walikuwa juu ya ukuta wa muji wa Yeriko walifikiri kwamba sauti hizo zilikuwa za shambulizi fulani la ovyoovyo. Ikiwa walifikiri hivyo, hawakukawia kubadilisha mawazo yao. Ukuta mukubwa ukaanza kutikisika chini ya miguu yao. Ukuta huo ukatetemeka, ukapasuka, na kisha ukaanguka chini kwa kishindo! Lakini mavumbi yalipopunguka, kulikuwa na sehemu moja ya ukuta ambayo ilibaki wima. Nyumba ya Rahabu haikuanguka kwa sababu ya imani yake. Wazia namna Rahabu alivyojisikia alipoona jinsi Yehova alivyomulinda! * Familia yake ilikuwa salama!​—Yoshua 6:10, 16, 20, 21.

Waisraeli, watu wa Yehova, walimuheshimu pia Rahabu kwa sababu ya imani yake. Wakati waliona kwamba nyumba moja tu ilibaki wima katika muji huo ulioharibiwa, walijua kwamba Yehova alikuwa pamoja na mwanamuke huyo. Yeye na familia yake waliokoka uharibifu uliokuja juu ya muji huo muovu. Kisha mapigano, Rahabu aliruhusiwa kukaa karibu na kambi ya Waisraeli. Baadaye, Rahabu alijiunga na taifa la Israeli na akaolewa na mwanaume anayeitwa Salmoni. Boazi, mutoto wao, alikomaa na kuwa mwanaume mwenye imani ya pekee. Alimuoa Ruthu mwanamuke Mumoabu. * (Ruthu 4:13, 22) Mufalme Daudi na baadaye Masiya mwenyewe, Yesu Kristo, walizaliwa katika familia hiyo yenye imani kubwa.​—Yoshua 6:22-25; Mathayo 1:5, 6, 16.

Maisha ya Rahabu yanaonyesha kwamba hakuna mutu ambaye hafae kitu machoni pa Yehova. Anatuona sisi wote, anasoma mioyo yetu, na anafurahi wakati anaona kwamba tuna imani kama ile aliyoona ndani ya moyo wa Rahabu. Imani yake ilimusukuma kutenda. Kama Biblia inavyosema, ‘alitangazwa kuwa muadilifu kwa matendo.’ (Yakobo 2:25) Ni jambo la hekima kwetu kuiga imani ya Rahabu!