1, 2. Kujaribu kuzuia Wakristo kuhubiri habari njema kulikuwa na matokeo gani yenye haikutazamiwa?

 MVUA ya mateso inaanza, na Sauli anaanza “kushambulia” kutaniko; mu luga ya kwanza-kwanza neno kushambulia iko na maana ya kutendea mutu kwa ukali sana. (Mdo. 8:3) Wanafunzi wanakimbia, na inaonekana kama kusudi ya Sauli ya kumaliza kabisa Wakristo itatimia. Lakini, kutawanyika kwa Wakristo kunatokeza jambo fulani yenye haitazamiwe. Kunatokeza nini?

² Wale wenye wametawanyika wanaanza ‘kutangaza habari njema ya lile neno’ mu maeneo kwenye walikimbilia. (Mdo. 8:4) Waza kidogo! Ile mateso inashindwa kuzuia Wakristo waache kutangaza habari njema, na zaidi ya ile inasaidia habari njema ifike fasi za mingi! Kwa kutawanya wanafunzi, bila kupenda wapinzani wao wamesaidia habari njema ya Ufalme ifike mu maeneo ya mbali. Sawa vile tutaona, jambo ya vile imetokea pia mu wakati wetu.

3. (a) Filipo alikuwa nani? (b) Samaria haikukuwa imehubiriwa sana, lakini Yesu alitabiri nini juu ya Samaria?

³ Filipo alikuwa kati ya “wale wenye walikuwa wametawanywa.” a (Mdo. 8:4; ona kisanduku “ Filipo ‘Mweneza-injili.’”) Alienda Samaria, kwenye watu wengi hawakukuwa wamehubiriwa juu wakati fulani Yesu alipatiaka mitume wake hii maagizo: “Musiingie katika muji wowote wa Wasamaria; lakini tofauti na hilo, muende tu kwa kondoo wenye kupotea wa nyumba ya Israeli.” (Mt. 10:5, 6) Lakini, Yesu alijua kama, kuko wakati wenye habari njema ingehubiriwa sana mu Samaria, juu mbele apande mbinguni, alisema hivi: “Mutakuwa mashahidi wangu katika Yerusalemu, katika Yudea yote na Samaria, na mupaka kwenye sehemu ya mbali zaidi ya dunia.”​—Mdo. 1:8.

4. Wasamaria walitenda namna gani wakati Filipo aliwahubiria, na pengine juu ya nini walitenda vile?

 ⁴ Filipo aliona kama Samaria ilikuwa ‘mweupe kwa ajili ya kuvunwa.’ (Yoh. 4:35) Ujumbe wake ulikuwa kitulizo kwa watu wenye kuishi Samaria, na ile inaeleweka. Juu ya nini? Wayahudi hawakukuwa wanajiunga na Wasamaria, na hata walionyesha kama wanawachukia. Lakini, Wasamaria waliona kama ujumbe wa habari njema ulitolea watu wote tumaini bila ubaguzi, na ile ilikuwa tofauti kabisa na mawazo ya Wafarisayo wenye ubaguzi. Juu Filipo aliwahubiria Wasamaria kwa bidii bila ubaguzi, ile ilionyesha kama hakukuwa na ubaguzi sawa vile watu wenye walikuwa nawachukia. Njo maana, haishangaze kuona kama Wasamaria wengi sana walimusikiliza Filipo “kwa umoja.”​—Mdo. 8:6.

5-7. Leta mifano yenye kuonyesha namna kutawanyika kwa Wakristo kulisaidia habari njema ifike fasi mingi.

⁵ Sawa vile mu karne ya kwanza, leo pia mateso haiyafanya watu wa Mungu waache kuhubiri. Mara kwa mara, wakati Wakristo wanalazimishwa kuenda fasi ingine sawa vile mu gereza ao mu inchi ingine, ile inawapatia nafasi ya kuhubiria watu wa kule habari njema ya Ufalme. Kwa mufano, wakati wa Vita ya Pili ya Ulimwengu, Mashahidi wa Yehova walipata nafasi ya kuhubiria wengine mu kambi za mateso za Wanazi. Muyahudi fulani mwenye alikutana na Mashahidi wa Yehova mu kambi ya mateso  alisema hivi: “Musimamo wa wafungwa Mashahidi wa Yehova ulinisadikisha kama imani yao ilitegemea Maandiko, na miye nikafikia kuwa Shahidi wa Yehova.”

⁶ Mu hali fulani, hata wale wenye walikuwa natesa Mashahidi walisikia habari njema na wakaikubali. Kwa mufano, wakati Shahidi mwenye kuitwa Franz alipelekwa mu kambi ya mateso ya Gusen mu inchi ya Austria, aliweza kujifunza Biblia na ofisa fulani wa SS. Wazia furaha ya wale wanaume wawili wakati walikutana ku mukusanyiko wa Mashahidi wa Yehova na wote wawili walikuwa wahubiri wa habari njema!

⁷ Jambo ya vile ilitokea wakati mateso ilifanya Wakristo wakimbilie mu inchi zingine. Kwa mufano, mu miaka ya 1970, ushahidi mukubwa ulitolewa Mozambique wakati Mashahidi wa Malawi walilazimika kukimbilia kule. Hata wakati upinzani ulitokea Mozambique, kazi ya kuhubiri iliendelea. Francisco Coana anasema hivi: “Ni kweli kwamba, wamoja kati yetu walikamatwa mara mingi juu ya kazi ya kuhubiri. Lakini, wakati tuliona namna watu wengi walikuwa nakubali habari njema ya Ufalme, tulikuwa hakika kama Mungu alikuwa natusaidia sawa vile alisaidiaka Wakristo wa kwanza-kwanza.”

8. Matatizo ya kupata feza na mabadiliko mu mambo ya politike imekuwa na matokeo gani juu ya kazi ya kuhubiri?

⁸ Lakini, haiko mateso tu njo ilisaidia habari njema ifike mu maeneo ya mingi. Mu miaka yenye imepita, matatizo ya kupata makuta na mabadiliko mu mambo ya politike imefanya watu wenye kuzungumuza luga mbalimbali na wenye kutoka mu inchi mbalimbali wapate nafasi ya kusikiliza habari njema ya Ufalme. Vita na matatizo ya kupata makuta imefanya watu fulani wahamie mu inchi zingine kwenye kuwa maisha ya muzuri zaidi, na kule wameanza kujifunza Biblia. Pia tumepata nafasi ya kuhubiri mu luga zingine mu maeneo yenye kuwa na wakimbizi wengi. Uko najikaza kuhubiria watu “kutoka mataifa yote na makabila na vikundi vya watu na luga” mu eneo yenu?​—Ufu. 7:9.

9. Simoni alikuwa nani, na nini njo ilifanya apendezwe na Filipo?

⁹ Filipo alifanya miujiza ya mingi Samaria. Kwa mufano, aliponyesha watu wenye walikuwa na ulemavu na alifukuza pepo wachafu. (Mdo. 8:6-8) Mutu fulani alishangazwa sana na uwezo wa kufanya miujiza wenye Filipo alikuwa nao. Ule mutu aliitwa Simoni, mwanaume mwenye kufanya uchawi mwenye aliheshimiwa sana mupaka watu walikuwa nasema hivi juu yake: “Mutu huyu ndiye Nguvu za Mungu.” Lakini sasa Simoni alijionea nguvu za kweli za Mungu kupitia miujiza yenye Filipo alifanya. Kwa hiyo Simoni akakuwa Mukristo. (Mdo. 8:9-13) Lakini, kisha wakati fulani jambo fulani ilitokea yenye ingeonyesha sababu yenye pengine ilimuchochea kuwa Mukristo. Ni jambo gani?

10. (a) Petro na Yohana walifanya nini mu Samaria ? (b) Simoni alifanya nini wakati aliona wanafunzi wapya wanapata roho takatifu wakati Petro na Yohana waliweka mikono juu yao?

 ¹⁰ Wakati mitume walisikia juu ya ongezeko yenye ilikuwa kule Samaria, walituma Petro na Yohana. (Ona kisanduku “ Petro Anatumia ‘Funguo za Ufalme.’”) Wakati wale mitume wawili walifika Samaria, waliweka mikono yao juu ya wale wanafunzi wapya, na kila mumoja wao akapokea roho takatifu. b Wakati Simoni aliona vile, akabakia kinywa wazi. Akaambia mitume hivi: “Munipatie mimi pia mamlaka hii, ili mutu yeyote mwenye nitaweka mikono juu yake apokee roho takatifu.” Na hata aliwaambia kama atawapatia makuta. Aliwaza kama anaweza kuuza ule uwezo wenye ulitoka kwa Mungu!​—Mdo. 8:14-19.

11. Petro alishauria Simoni afanye nini, na Simoni alitenda namna gani?

¹¹ Bila kuenda huku na huku Petro alijibia Simoni hivi: “Feza zako ziangamie pamoja na wewe, kwa sababu uliwaza kama unaweza kupata zawadi ya bure ya Mungu kupitia feza. Wewe hauna sehemu ao fungu katika jambo hili, kwa maana moyo wako hauko wenye kunyooka mbele ya macho ya Mungu.” Kisha Petro akamushauria Simoni atubu na kusali ili Yehova amusamehe. Alimuambia hivi: “Umulilie Yehova, ili ikiwezekana, usamehewe nia mubaya ya moyo wako.” Inaonekana Simoni hakukuwa mutu mubaya; alipenda kufanya mambo ya muzuri, lakini hakukuwa naelewa mambo muzuri. Kwa hiyo, aliwaambia mitume hivi: “Mumulilie Yehova kwa ajili yangu ili nisipatwe na jambo hata moja kati ya mambo yenye mulisema.”​—Mdo. 8:20-24.

12. Tabia ya kuuza na kuuzisha vyeo imeenea kwa kadiri gani kati ya Wakristo wa uongo?

 ¹² Karipio yenye Petro alipatia Simoni ni onyo kwa Wakristo leo. Mu luga za mingi, neno yenye kutumiwa ili kuzungumuzia tabia ya kuuza na kuuzisha vyeo, zaidi sana mu mambo ya dini, inatokana na jina “Simoni.” Mu historia ya Wakristo wa uongo muko mifano mingi ya ile tabia ya kuuza na kuuzisha vyeo. Na hata toleo ya kenda ya kitabu Encyclopædia Britannica (1878) inasema hivi: “Wakati tunachunguza historia ya uchaguzi wa Mapapa, inaonekana wazi kama mu kila uchaguzi munakuwaka ile tabia ya kuuza na kuuzisha vyeo, tena wanaifanyaka bila haya na waziwazi.”

13. Ni njia gani mbalimbali za kuuza na kuuzisha madaraka zenye Wakristo wanapaswa kuepuka?

¹³ Wakristo wanapaswa kuepuka ile zambi ya kuuza na kuuzisha vyeo. Kwa mufano, haupaswe kujaribu kujipendekeza kwa wale wenye kuwa na madaraka kwa kuwapatia zawadi ao kwa kuwasifu-sifu ili tu upewe mapendeleo fulani. Na wale wenye kuwa na madaraka wanapaswa kuepuka kupendelea wale wenye kuwa matajiri. Mu zile hali zote kufanya vile ni kutafuta kuuza ao kuuzisha madaraka. Kweli, watumishi wote wa Mungu wanapaswa kujiendesha kama ‘wadogo zaidi,’ na kungojea roho takatifu ya Yehova njo iwachague ili watumikie mapendeleo fulani. (Lu. 9:48) Mu tengenezo ya Yehova hamuna fasi kwa ajili ya watu wenye wanajaribu ‘kujitafutia utukufu wao wenyewe.’​—Mez. 25:27.

14, 15. (a) “Towashi Mwetiopia” alikuwa nani, na Filipo alimupata namna gani? (b) Ule Mwetiopia alitenda namna gani wakati alisikia ujumbe wa Filipo, na juu ya nini hatuwezi kusema kama alibatizwa haraka bila kufikiri? (Ona maelezo ya chini.)

¹⁴ Sasa malaika wa Yehova anaambia Filipo aende kwenye barabara yenye kutoka Yerusalemu kuenda Gaza. Pengine Filipo alijiuliza juu ya nini, lakini bila kukawia anapata jibu wakati anakutana na towashi Mwetiopia mwenye alikuwa ‘anasoma kwa sauti kubwa nabii Isaya.’ (Ona kisanduku “ ‘Towashi’ mu Maana Gani?”) Roho takatifu ya Yehova ilimuongoza Filipo akaribie gari ya ule mwanaume. Na wakati alikuwa  anakimbia pembeni-pembeni ya ile gari alimuuliza hivi ule mwanaume Mwetiopia: “Je, kweli unajua mambo yenye unasoma?” Na ule mwanaume Mwetiopia akajibia hivi: “Ninaweza kujua namna gani kama mutu fulani haniongoze?”​—Mdo. 8:26-31.

¹⁵ Ule mwanaume akamuomba Filipo apande mu gari yake. Bila shaka walikuwa na mazungumuzo yenye kufurahisha! Kwa miaka mingi watu hawakujua ikiwa “kondoo,” ao “mutumishi” mwenye kuzungumuziwa mu unabii wa Isaya ni nani. (Isa. 53:1-12) Lakini, wakati Filipo alikuwa nasafiri na towashi Mwetiopia alimufasiria kama ni Yesu Kristo njo alitimiza ule unabii. Sawa tu wale wenye walibatizwa ku Pentekoste ya mwaka wa 33 K.K.Y., ule Mwetiopia, mwenye tayari alikuwa mugeuzwa-imani, alijua palepale jambo yenye alipaswa kufanya. Aliambia hivi Filipo: “Angalia! Hapa kuko maji; ni kitu gani kinanizuia nisibatizwe?” Bila kukawia Filipo akamubatiza ule Mwetiopia! c (Ona kisanduku “ Kubatizwa ‘Katika Maji.’”) Kisha pale, roho ya Mungu iliongoza Filipo mu mugao ingine kule Ashdodi, kwenye aliendelea kutangaza habari njema.​—Mdo. 8:32-40.

16, 17. Namna gani malaika wako wanaongoza kazi ya kuhubiri leo?

¹⁶ Leo Wakristo wako na pendeleo ya kufanya kazi ya kuhubiri sawa Filipo. Mara mingi, wanahubiriaka watu wenye wanakutana nao wakati wowote, kwa mufano wakati wako wanasafiri. Na kwa ukawaida, wanakutana na watu wenye moyo muzuri kwa sababu wanaongozwa na malaika. Biblia inaonyesha kama malaika wako wanaongoza kazi ya kuhubiri juu ujumbe wa Ufalme ufikie “kila taifa na kabila na luga na watu.” (Ufu. 14:6) Yesu alitabiri waziwazi kama malaika wangeongoza kazi ya kuhubiri. Mu mufano wake wa ngano na magugu, Yesu alisema kama mu kipindi ya mavuno, ni kusema mu siku za mwisho, “wavunaji ni malaika.” Alisema pia kama malaika “watakusanya kutoka katika Ufalme wake vitu vyote vyenye vinafanya watu wakwazike na pia watu wenye matendo ya  kuvunja sheria.” (Mt. 13:37-41) Wakati uleule, malaika wangekusanya wale wenye watatawala mu Ufalme mbinguni, na kisha wangekusanya “kundi kubwa” ya “kondoo wengine” wenye Yehova anapenda kuvuta mu tengenezo yake.​—Ufu. 7:9; Yoh. 6:44, 65; 10:16.

¹⁷ Watu wengi wenye tunakutana nao mu kazi ya kuhubiri wamesema kama walikuwa nasali ili Mungu awasaidie. Ile inaonyesha kama malaika wako naongoza kazi ya kuhubiri. Kwa mufano, siku moya wahubiri wawili walikuwa mu mahubiri na mutoto mudogo. Wakati wale wahubiri walitaka kumaliza mahubiri yao ya asubui, ule mutoto alipenda sana kuenda ku nyumba ya kufuata, na hata alienda yeye peke na kugonga ku mulango! Wakati kijana mwanamuke alifungula mulango, wale Mashahidi wawili walimukaribia na kuzungumuza naye. Na walishangala wakati ule mwanamuke aliwaambia kama alikuwa anasali na kuomba mutu fulani akuye kumutembelea na kumusaidia kuelewa Biblia. Kisha ule mwanamuke akaanza kujifunza Biblia!

18. Juu ya nini hatupaswe kuzarau hata kidogo kazi yetu ya kuhubiri?

¹⁸ Juu uko mu kutaniko ya Kikristo, uko na pendeleo ya kutumika pamoya na malaika mu kazi kubwa ya kuhubiri yenye iko nafanyika leo mu namna yenye haiyafanyikaka. Usizarau hata kidogo ile pendeleo. Kama unaendelea kujikaza utapata furaha kubwa wakati unaendelea kutangaza “habari njema juu ya Yesu.”​—Mdo. 8:35.