1. Eleza vile hali ilikuwa wakati wa Sikukuu ya Pentekoste.

 KUKO hali ya kuchangamuka mu muji wa Yerusalemu. a Moshi iko inapanda kutoka ku mazabahu ya hekalu wakati Walawi wako wanaimba Haleli (Zaburi 113 mupaka 118). Pengine wamoja wako wanaimba na kisha wengine wako wanaitikia. Kuko watu wengi mu barabara. Wametoka sehemu za mbali sana, sawa vile Elamu, Mesopotamia, Kapadokia, Ponto, Misri, na Roma. b Wamekuya kufanya nini? Ku Sikukuu ya Pentekoste, yenye kuitwa pia “siku ya matunda ya kwanza yenye kukomaa.” (Hes. 28:26) Hii sikukuu inafanywa mara moya kila mwaka ku mwisho wa mavuno ya shayiri, mbele mavuno ya ngano ianze. Ni siku ya furaha sana.

2. Ni mambo gani ya kushangaza yenye inatokea siku ya Pentekoste ya mwaka wa 33 K.K.Y.?

² Ni saa tatu hivi asubui (9h00), mwaka wa 33 K.K.Y. Jambo moya ya ajabu inatokea, yenye watu wataendelea kukumbuka kwa miaka mingi sana. Mara moja, mbinguni kunatokea “makelele kama ya upepo wenye nguvu wenye unavuma.” (Mdo. 2:2) Ile makelele inaenea mu nyumba kwenye wanafunzi wa Yesu karibu 120 walikuwa wamekusanyika. Kisha, jambo ya kushangaza inatokea. Ndimi zenye kuwa kama za moto zinaonekana ku kichwa ya kila mumoja wa wale wanafunzi. c Kisha, wale wanafunzi ‘wanajazwa roho takatifu’ na kuanza kusema mu luga za kigeni! Wakati wanafunzi wanatoka tu mu ile nyumba, watu kutoka sehemu mbalimbali wenye kuwa mu barabara za Yerusalemu wanashangala sana! Kila mutu anasikia wale wanafunzi “wakisema mu luga yake mwenyewe.”​—Mdo. 2:1-6.

3. (a) Juu ya nini Pentekoste ya mwaka wa 33 K.K.Y. inaweza kuitwa jambo ya maana sana mu ibada ya kweli? (b) Hotuba ya Petro inapatana namna gani na zile “funguo za ufalme”?

³ Ile habari yenye kufurahisha inahusu jambo ya maana sana yenye ilitokea mu ibada ya kweli: kuanzishwa kwa taifa ya Israeli ya kiroho, ni  kusema, kutaniko ya Wakristo watiwa-mafuta. (Gal. 6:16) Lakini, haiko ile tu. Wakati Petro anatoa hotuba yake mbele ya watu wengi wenye walikusanyika ile siku, anatumia funguo ya kwanza kati ya zile ‘funguo tatu za ufalme.’ Kila funguo ingefungulia kikundi fulani ya watu mapendeleo ya pekee. (Mt. 16:18, 19) Ile funguo ya kwanza iliwezesha Wayahudi na Wayahudi wageuzwa-imani kukubali habari njema na kutiwa mafuta kwa roho takatifu ya Mungu. d Wangeweza kuwa sehemu ya Israeli ya kiroho, na kuwa na tumaini ya kutawala wakiwa wafalme na makuhani mu Ufalme wa Kimasiya. (Ufu. 5:9, 10) Kisha Wasamaria na kisha watu wa mataifa wangepata pia ile pendeleo. Ile mambo yenye ilitokea ile siku ya Pentekoste ya mwaka wa 33 K.K.Y, inaweza kufundisha Wakristo wa leo jambo gani?

4. Fasiria namna kutaniko ya Kikristo ilianza na kuendelea mupaka leo.

⁴ Kutaniko ya kwanza ya Kikristo ilianza na wanafunzi karibu 120. “Wote walikuwa pamoja mahali pale pale,” mu chumba cha juu. Wote walikuwa wametiwa mafuta kwa roho takatifu. (Mdo. 2:1) Mwisho wa ile siku, maelfu ya watu walibatizwa na wakaingia mu kutaniko ya Kikristo. Ile ilikuwa mwanzo tu ya tengenezo yenye inaendelea kupanuka mupaka leo! Leo kutaniko ya Kikristo inafanyizwa na wanaume na wanamuke wenye wanamuogopa Mungu. Ni wao njo wanahubiri “habari njema ya ufalme” mu “dunia yote yenye kuikaliwa na watu ili kuwa ushahidi kwa mataifa yote” mbele mwisho ufike.​—Mt. 24:14.

5. Kuwa mu kutaniko ya Kikristo iko na baraka gani?

⁵ Pia kutaniko ya Kikristo ingetia nguvu imani ya watu wenye kuwa ndani, ni kusema watiwa-mafuta, na kisha “kondoo wengine.” (Yoh. 10:16) Mu  barua yake kwa Wakristo wa kutaniko ya Roma, Paulo alionyesha kama alifurahi sana kwa sababu watu walikuwa wanategemezana mu ile kutaniko. Alisema: “Ninatamani sana kuwaona ninyi, ili niwapatie zawadi ya kiroho kusudi mufanywe imara; ao tofauti na hilo, tukuwe na ubadilishanaji wa kitia-moyo, kila mumoja kupitia imani ya mwenzake, yenu na yangu pia.”​—Ro. 1:11, 12.

6, 7. Namna gani kutaniko ya Kikristo leo inatimiza kazi ya kuhubiria watu wa mataifa yote?

⁶ Leo, kutaniko ya Kikristo inatimiza mambo ileile yenye kutaniko ya wakati wa mitume ilitimiza. Yesu alipatia wanafunzi wake kazi ya kufurahisha sana, hata kama wangepata mateso. Aliwaambia hivi: “Mufanye wanafunzi kutoka kwa watu wa mataifa yote, na muwabatize katika jina la Baba na la Mwana na la roho takatifu, na muwafundishe kushika mambo yote yenye nimewaamuru ninyi.”​—Mt. 28:19, 20.

⁷ Leo, Yehova anatumikisha kutaniko ya Kikristo ya Mashahidi wa Yehova ili kutimiza ile kazi. Kusema kweli, haiko mwepesi kuhubiria watu wenye wanazungumuza luga tofauti-tofauti. Lakini, Mashahidi wa Yehova wamechapisha vichapo vyenye kutegemea Biblia mu luga zaidi ya 1000. Kama unakusanyikaka kwa ukawaida, na unahubiri na kufanya wanafunzi, uko na sababu ya kushangilia. Uko kati ya watu kidogo mu dunia leo wenye wako na pendeleo ya kutoa ushahidi kamili juu ya jina ya Yehova!

8. Tunapata musaada gani kupitia kutaniko ya Kikristo?

⁸ Juu ya kutusaidia tuendelee kuvumilia kwa furaha mu hizi siku zenye kuwa hatari, Yehova Mungu ametupatia familia ya ndugu na dada ya mu dunia yote. Paulo aliandikia Wakristo Waebrania hivi: “Tufikiriane ili kuchocheana katika upendo na matendo ya muzuri, bila kuacha kukutana pamoja, kama vile wengine wako na desturi, lakini tutiane moyo, na kufanya vile zaidi sana kwa kadiri munaona siku ile kuwa inakaribia.” (Ebr. 10:24, 25) Kutaniko ya Kikristo ni zawadi ya Yehova ya kutusaidia tutiane moyo. Bakia karibu na ndugu na  dada zako. Usiache hata kidogo kuhuzuria mikusanyiko na mikutano ya Kikristo!

9, 10. Wahubiri fulani wamefanya nini ili kuhubiria watu wa luga zingine?

⁹ Wazia namna Wayahudi na wageuzwa-imani walikuwa wenye furaha siku ya Pentekoste ya mwaka wa 33 K.K.Y. Inaonekana wengi wao walijua Kigiriki ao Kiebrania. Lakini sasa “kila mumoja aliwasikia [wanafunzi] wanasema katika luga yake mwenyewe.” (Mdo. 2:6) Bila shaka watu walifurahi sana wakati walisikia habari njema mu luga zao za kizalikio. Hata kama Wakristo leo hawana uwezo wa kimuujiza wa kuzungumuza luga za kigeni, wengi wamejitolea kutangaza Ufalme kwa watu wa mataifa yote. Namna gani? Wamoja wamejifunza luga ingine juu watumikie mu kutaniko ya luga ya kigeni yenye kuwa karibu ao hata kuhamia mu inchi ingine. Mara mingi wasikilizaji wao wanashangala kuona vile wanajikaza kujua luga yao.

¹⁰ Kwa mufano, Christine na Mashahidi wengine saba walijifunza Kigujarati. Siku moya alimusalimia mufanyakazi mwenzake mu luga yake ya Kigujarati. Ule mwanamuke alishangala sana, na alipenda kujua juu ya nini Christine alijikaza kujifunza luga ya nguvu sana sawa vile Kigujarati. Christine alitumia ile nafasi juu ya kumuhubiria. Ule mwanamuke aliambia hivi Christine: “Inawezekana habari yenye muko natangaza ni ya maana.”

11. Tunaweza kufanya nini ili kuhubiria watu wenye kuzungumuza luga ingine?

¹¹ Bila shaka, haiko siye wote njo tunaweza kujifunza luga ingine. Hata vile, tunaweza kuwa tayari kuhubiria watu wenye kuzungumuza luga ingine. Namna gani? Njia moja ni kwa kutumia vyombo sawa vile JW Language^® ili kujifunza namna ya kusalimia  watu mu luga yenye inazungumuziwa sana mu eneo yenu. Unaweza pia kujifunza misemwa fulani mu ile luga yenye inaweza kuchochea watu wenye kuzungumuza ile luga wapende kujifunza Biblia. Uwaongoze ku jw.org, na pengine unaweza kuwaonyesha video na vichapo mbalimbali vyenye kupatikana mu luga yao. Kama tunafanya vile, siye pia tunaweza kuwa na furaha yenye ndugu zetu wa mu karne ya kwanza walikuwa nayo wakati watu wa mu inchi zingine walishangaa kusikia habari njema, “kila mumoja . . . katika luga yake mwenyewe.”

12. (a) Namna gani nabii Yoeli alizungumuzia mbele ya wakati matukio ya Pentekoste ya mwaka wa 33 K.K.Y? (b) Juu ya nini wakati wa mitume watu walitazamia utimizo wa unabii wa Yoeli?

¹² “Petro akasimama” ili kuzungumuza na wale watu wengi wa kutoka mu mataifa mbalimbali. (Mdo. 2:14) Aliwafasiria kama Mungu njo aliwapatia uwezo wa kimuujiza wa kusema mu luga mbalimbali ili kutimiza unabii wa Yoeli wenye kusema: “Nitamwanga roho yangu juu ya kila namna ya mwili.” (Yoe. 2:28) Mbele arudie mbinguni, Yesu aliambia wanafunzi wake hivi: “Nitamuomba Baba, na atawapatia ninyi musaidizi mwingine.” Yesu alionyesha kama ule musaidizi ni “roho.”​—Yoh. 14:16, 17.

13, 14. Petro alifanya nini juu ya kugusa mioyo ya wasikilizaji wake, na siye tunaweza kumuiga namna gani?

¹³ Petro alimalizia hotuba yake na hii maneno ya moja kwa moja: “Nyumba yote ya Israeli inapaswa kujua kwa hakika kwamba Mungu alimufanya kuwa Bwana na Kristo, huyu Yesu mwenye ninyi muliua kwenye muti.” (Mdo. 2:36) Watu wengi kati ya wale wenye walifuata ile hotuba ya Petro hawakukuwaka pale wakati Yesu aliuawa. Lakini walikuwa na hatia juu walikuwa Waisraeli. Taifa lote lilikuwa na hatia. Hata vile, Petro alizungumuza na Wayahudi wenzake kwa heshima na alihangaikia hisia zao. Kusudi ya Petro ilikuwa kuwachochea wasikilizaji wake watubu lakini haikukuwa kuwalaumu. Watu wenye walikuwa namusikiliza Petro waliumizwa na  maneno yake? Hapana. Tofauti na ile, wale watu “walichomwa katika moyo.” Wakauliza: “Tufanye nini?” Inaonekana kama namna Petro alizungumuza nao kwa heshima ilimusaidia afikie kugusa mioyo ya wengi, na kuwachochea kutubu.​—Mdo. 2:37.

¹⁴ Na siye tunaweza kuiga namna ya Petro ya kugusa mioyo. Wakati tuko nahubiri, tusikuwe napinga kila jambo yenye haipatane na Maandiko, yenye pengine mwenye-nyumba anasema. Lakini, ni muzuri kuzungumuzia mambo yenye tunaweza kukubaliana. Kisha kukubaliana na musikilizaji wetu, kwa busara tunaweza kumusaidia aone mawazo ya Neno ya Mungu. Mara nyingi, kama tunatumia ile njia, watu wenye mioyo ya muzuri wanaweza kukubali ujumbe wetu.

15. (a) Petro alisema nini, na watu walitenda namna gani? (b) Juu ya nini maelfu ya watu wenye walisikia habari njema walistahili kubatizwa ileile siku?

¹⁵ Ile siku ya Pentekoste ya mwaka wa 33 K.K.Y., Petro aliwaambia hivi Wayahudi na wageuzwa-imani: “Mutubu, na kila mumoja wenu abatizwe.” (Mdo. 2:38) Kisha, watu karibu 3000 wakabatizwa, pengine mu viziwa (piscines) vyenye vilikuwa Yerusalemu ao karibu na Yerusalemu. e Wale watu walikamata ule uamuzi bila kufikiri? Je, hii habari inatufundisha kama wanafunzi wa Biblia na watoto wenye wazazi wao ni Wakristo wanapaswa kukimbilia kubatizwa hata kama hawayakuwa tayari? Hapana. Kumbuka kama Wayahudi na Wayahudi wageuzwa-imani wenye walibatizwa ile siku walikuwa wanafunzi wa Neno ya Mungu, na walikuwa mu taifa yenye ilikuwa ilishajitoa kwa Yehova. Zaidi ya ile, walikuwaka na bidii; walionyesha bidii yao kwa kufanya safari ya murefu juu ya kuenda kuhuzuria ile sikukuu ya kila mwaka. Kisha kukubali kweli za maana kuhusu daraka ya Yesu Kristo katika kutimizwa kwa  kusudi ya Mungu, walikuwa tayari kuendelea kumutumikia Mungu wakiwa wafuasi wenye kubatizwa wa Kristo.

16. Namna gani Wakristo wa wakati wa mitume walionyesha roho ya kujitoa?

¹⁶ Bila shaka, Yehova alibariki wale watu. Biblia inasema hivi: “Wale wote wenye walikuwa waamini walikuwa pamoja na walichangia mambo yote pamoja, na walikuwa wanauzisha vitu vyao na mali zao na kugawia wote feza zenye walipata, kulingana na kile chenye kila mutu alikuwa nacho lazima.” f (Mdo. 2:44, 45) Bila shaka, Wakristo wote wa kweli wanapaswa kuiga ile roho ya kujitoa na ya upendo.

17. Juu mutu astahili kubatizwa anapaswa kufanya nini?

¹⁷ Juu mutu ajitoe kwa Yehova na kubatizwa anapaswa kutimiza mambo fulani yenye Maandiko inaomba. Anapaswa kufikia kujua Neno ya Mungu. (Yoh. 17:3) Ni lazima akuwe na imani, atubu, na aonyeshe kama anahuzunikia kabisa mwenendo wake wa zamani. (Mdo. 3:19) Kisha, ni lazima ageuke ao abadilishe mwenendo wake, na kuanza kufanya mambo ya muzuri yenye kupatana na mapenzi ya Mungu. (Ro. 12:2; Efe. 4:23, 24) Kisha kufanya ile mambo yote, atajitoa kwa Mungu katika sala na kisha atabatizwa.​—Mt. 16:24; 1 Pe. 3:21.

18. Wanafunzi wenye kubatizwa wa Kristo wako na pendeleo gani?

¹⁸ Uko mwanafunzi wa Yesu Kristo mwenye alishajitoa kwa Yehova na kubatizwa? Kama ni vile, unapaswa kuonyesha shukrani sana juu ya ile pendeleo. Sawa vile wale wanafunzi wa wakati wa mitume wenye walijazwa roho takatifu, na weye unaweza kutoa ushahidi kamili na kufanya mapenzi ya Yehova!