Anạu sěngkataung i Elisabet arenge i Maria, mětẹ̌tanạ su soa Nazaret su Galilea. Maria seng nẹ̌tunangan dingangi Yusuf, sěngkatau basẹ̌ u kalu. Su tempong i Elisabet natiang ěnungu wul᷊ang, malaekatẹ̌ Gabriel nẹ̌bisara dingangi Maria, i Gabriel naul᷊ị, ’Tabeạ, Maria. Yehuwa sěbạe mal᷊uasẹ̌ si kau.’ I Maria tawe nakaěna apa mangal᷊ene bawerang i Gabriel. Bọu ene i Gabriel nẹ̌bera, ’I kau sarung matiang, kụ makaěbạ anạ esẹ. Arengko anạ ene Yesus. I sie sarung makoạ Datu, kụ Kararatuange sarung ene sarang karěngụe.’

Maria naul᷊ị, ’Katewe, iạ bědang perawan. Kerea carane iạ makaěbạ anạ?’ Gabriel naul᷊ị, ’Si Yehuwa kěbị botonge mariadi. I kau sarung makaěbạ rohkẹ̌ masusi, kụ i kau makaěbạ anạ. Elisabet, anạu sěngkataunu, lai seng matiang.’  Bọu ene i Maria naul᷊ị, ’Iạ ini ělang i Yehuwa. Karimakọ baweranu ene mariadi si siạ.’

Bọu ene, i Maria nakoạ sarang soa su manga wukidẹ̌ gunang mẹ̌sombang dingangi Elisabet. Su tempong i Maria nahumpạ kụ něgělị adatẹ̌, Elisabet nakapěndang anạ su ral᷊ungu tiange limingsọ. Elisabet nakaěbạ rohkẹ̌ masusi kụ nẹ̌bera, ’Yehuwa seng něngal᷊amatẹ̌ si kau Maria. Ini kai sěmbaụ kehormatan si siạ ual᷊ingu mamạ i Mesias diměnta su wal᷊eku.’ I Maria nẹ̌bera, ’Iạ mẹ̌dalo si Yehuwa dingangu kaguwạu naungku.’ I Maria nẹ̌tana su wal᷊eng i Elisabet karěngụe tělu wul᷊ang. Bọu ene, i sie napul᷊ẹ sarang Nazaret.

Su tempong i Yusuf nakasingkạ i Maria seng natiang, i sie mapulu měměsụ si Maria. Katewe malaekatẹ̌ nẹ̌bisara si sie su ipi, ’Pẹ̌kawingke dingangi Maria. Abe ghěnggang, i sie tawe někoạ barang nẹ̌sal᷊a.’ Hakị u ene, i Yusuf nẹ̌kawing dingangi Maria.