PĚNGANGĚNDUNGANG 74
Yesus Nakoạ Mesias
Yohanes turusẹ̌ mělẹ̌habarẹ̌, ’Taumata kawasane limembong gěguwạ bọu iạ sarung duměnta.’ Su tempong umuri Yesus ěndịu 30 su taunge, i sie diměnta bọu Galilea sarang Sal᷊ụ u Yordan, tampạ i Yohanes měnẹ̌nahani taumata. Yesus nẹ̌dorong tadeạu i Yohanes měnahani si sie, katewe Yohanes nẹ̌bera, ’Sěběnarẹ̌e bal᷊inẹ iạ měnahani si kau, katewe i kau měnahani si siạ.’ Yesus simimbahẹ̌, ’Yehuwa mapulu i kau měnahani si siạ.’ Bọu ene, i rẹ̌dua limintụ sarang akẹ, kụ i Yesus niurung karạ i Yohanes.
Su apang siměbang bọu akẹ, i Yesus nẹ̌doa. Su tempo ene langị nawuka, kụ rohkẹ̌ masusi kere burung paluma limintụ sarang i Yesus. Bọu ene, Yehuwa nẹ̌bisara bọu sorga, ”I kau anạ-Ku ikẹ̌kěndagẹ̌. Iạ mal᷊uasẹ̌ si kau.”
Su tempong rohkẹ̌ i Yehuwa limintụ sarang i Yesus, i sie nakoạ Kristus, arau Mesias. Su tempo ene, Yesus seng sadia měkoạ tugasẹ̌ nighělị i Yehuwa gunang koatenge su dunia.
Su apang seng nisahani, i Yesus nakoạ sarang padang belantara kụ nẹ̌tanạ sene karěngụe 40 su ěllone. Su apang nẹ̌bal᷊ị, i sie nakoạ sarang i Yohanes. Su tempong i Yesus seng marani, i Yohanes naul᷊ị, ’Ini Anạ u Dombang Mawu, kụ sarung měngěmụ dosang taumata.’ Su tempong nẹ̌bera kerene, sěběnarẹ̌e i Yohanes maul᷊ị su taumata i Yesus kai Mesias. Apa i kau masingkạ apa nariadi si Yesus su padang belantara? Bọete mědeạ sasimbahe.
”Piạ tingihẹ̌ nikaringihẹ̌ bọu langị, ’I kau anạ-Ku ikẹ̌kěndagẹ̌. Ia mal᷊uasẹ̌ si kau.’”—Markus 1:11