Su apang seng sěntaung stengah něhabarẹ̌ habarẹ̌ mapia, Yesus harusẹ̌ měkoạ putusang sěbạe penting. I sie harusẹ̌ měmile i sai sarung měhal᷊ẹ̌ dingange, kụ sarung těntirong carane měngahạ sidangu tau Sahani. Těntal᷊ang bědang tawe někoạ putusang, Yesus mapulu mẹ̌dorong laahạ bọu i Yehuwa. Hakị u ene, i sie hala nakoạ sarang bul᷊udẹ̌ kụ nẹ̌doa su kanandụu hěbi. Dịěllone mal᷊ukadẹ̌, i Yesus nẹ̌kui manga murite kụ němile 12 su kataune gunang makoạ rasulẹ̌. I sai arengu 12 rasuli Yesus? Apa i kau nakatahěndung? Areng i sire kai i Petrus, Andreas, Yakobus, Yohanes, Filipus, Bartolomeus, Tomas, Matius, Yakobus anạ i Alfeus, Tadeus, Simon, dingangi Yudas Iskariot.

Mapul᷊o dua rasulẹ̌ ini sarung tumol᷊e si sie maning saranga i sie rumal᷊eng. Su apang seng bọu nilatih, i sire nioro pěhabarẹ̌ habarẹ̌ mapia. Yehuwa něgělị si sire kawasa gunang mapakapia taumata masakị dingangu měnokol᷊ẹ̌ rohkẹ̌ dal᷊akị.

Yesus nẹ̌sěbạ mapul᷊o dua rasule ini kai hapịe kụ i sie  mangimang si sire. Su těngong tau Farisi manga rasulẹ̌ ini kai taumata wiasa dingangu tawe nasikol᷊ah. Katewe, bal᷊inẹ kere tau Farisi, i Yesus něněntiro si sire. I sire sarung ene dingangi Yesus su tempo sěbạe penting su ral᷊ungu pěbawiahe, contone su tempong i sie bědang tawe nate dingangu su tempong i sie seng saụ nipěbiahẹ̌. Mapul᷊o dua rasulẹ̌ ini asal᷊e bọu Galilea mẹ̌sul᷊ung kere i Yesus, kụ pirang katau bọu i sire seng nẹ̌kawing.

Manga rasulẹ̌ ene tawe nasukụ kụ sarung měkoạ pẹ̌sasal᷊a. Pẹ̌sěnsul᷊ẹ i sire nẹ̌bisara tawe nipikirẹ̌ kal᷊imona dingangu někoạ putusang nẹ̌sal᷊a. Pẹ̌sěnsul᷊ẹ i sire lai tawẹ masabarẹ̌. I sire lai nẹ̌darendehẹ̌ soal u i sai kaguwạkenge sụ tal᷊oarang i sire. Katewe, i sire kai taumata mapia kụ makěndagẹ̌ si Yehuwa. Su tempong i Yesus naawị sarang sorga, i sire sarung makoạ fondasi sidangu tau Sahani.