PĚNGANGĚNDUNGANG 88
Yesus Nisamẹ
Yesus dingangu manga rasule dimal᷊eng limiu Lembah Kidron sarang Wul᷊udu Zaitun. Tempo ene seng hěbi ral᷊ung, kụ su hěbi ene lai bul᷊ang limangu. Su tempong i sire nahumpạ su Taman Getsemani, Yesus nẹ̌bera, ”Pěngampal᷊ẹ̌ sini kụ tatapẹ̌ pẹ̌dariagạ.” Bọu ene, i Yesus nẹ̌těngkarau bọu i sire kụ nẹ̌tumpěkuhẹ̌, ual᷊ingu i sie sěbạe nasusah naung. I sie nẹ̌doa si Yehuwa, ”Balạe kapulu-Nu mariadi.” Bọu ene, Yehuwa něndolohẹ̌ malaekatẹ̌ gunang měnoghasẹ̌ si sie. Su tempong i Yesus nẹ̌bal᷊ị, manga rasule mětẹ̌tikị. I sie nẹ̌bera, ’Pẹ̌bangungko! Ini bal᷊inẹ tempone mẹ̌tikị! Ini seng tempone iạ sarakaneng su manga sědụku.’
Tawe nararěna bọu ene, i Yudas nasongo dingangu komol᷊angu taumata lai manga prajurit, kụ i sire nẹ̌bawa peda dingangu bawanggo. I Yudas masingkạ Yesus ene su taman ene, ual᷊ingu i sire masau makoạ sarang ene. I Yudas seng nẹ̌bera kal᷊imona su manga prajurit, i sie sarung měněbọ sude i Yesus. Yudas apidu nẹ̌těngkarani si Yesus kụ nẹ̌bera, ’Malam bae, Guru.’ Bọu ene i sie něnděngu si Yesus. Yesus naul᷊ị, ’Yudas, apa i kau měnděngu gunang mengkhianati si siạ?’
Yesus dimal᷊eng sarang těngong i sire kụ nẹ̌kiwal᷊o, ”I sai dẹ̌deạkeng i kamene?” I sire simimbahẹ̌, ”Yesus tau Nazaret.” Yesus nẹ̌bera, ”Iạ i Yesus.” I sire apidu simohọ kụ naěngsạ. Yesus saụ nẹ̌kiwal᷊o, ”I sai dẹ̌deạkeng i kamene?” I sire saụ simimbahẹ̌, ”Yesus tau Nazaret.” Yesus nẹ̌bera, ’Iạ seng naul᷊ị iạ i Yesus. Abe samẹ manga muritẹ̌ku, balạe i sire.’
Su tempong i Petrus nakasilo i Yesus seng nisamẹ, i sie něnawụ pědane kụ němotọ tul᷊ing i Malkhus, ělangu imang mawantugẹ̌. Katewe, i Yesus něnenggehẹ̌ dingangu napakapia tul᷊ing ělang ene. Bọu ene, i Yesus nẹ̌bera si Petrus, ’Suhịe pedanu su homane. Mạeng i kau mẹ̌dal᷊ia dingangu peda, i kau sarung mate ual᷊ingu peda.’
Manga prajurit něnamẹ si Yesus dingangu něngikị limane, kụ manga rasule nasue timal᷊ang. Bọu ene i sire nẹ̌bawa si Yesus sarang i Hanas, sěngkatau imang těmbonang. Hanas nẹ̌kiwal᷊o si Yesus dingangu něngoro taumata pẹ̌bawa si Yesus sarang bal᷊eng Imang Mawantugẹ̌ Kayafas. Katewe, apa nariadi su manga rasule?”Su ral᷊ungu dunia ini i kamene sarung masigěsạ, katewe pakasabarẹ̌! Iạ seng nakawatạ dunia ini.”—Yohanes 16:33