Piạ sěngkatau esẹ taharorong kụkaiang sabang ěllo su tukadu bait. Tau esẹ ene tawe makaral᷊eng. Su tempong ěllo rangẹ, i sie nakasilo si Petrus dingangi Yohanes simuẹ̌ su bait. I sie nẹ̌dorong doitẹ̌ si sire. Katewe i Petrus nẹ̌bera, ’Si siạ piạ limembong maarěga bọu doitẹ̌, kụ iạ mapulu měgělị ene si kau. Su ral᷊ungu areng i Yesus, darisị kụ dal᷊engke!’ Bọu ene i Petrus nẹ̌tul᷊ung tau esẹ ene dumarisị, kụ i sie něnětạ dimal᷊eng! Taumata sene sěbạe mal᷊uasẹ̌ nakasilo mukjizat ene, kụ lawọ nangimang si Yesus.

Katewe manga imang dingangu tau Saduki sěbạe nẹ̌pědu. I sire něnamẹ kụ nẹ̌bawa manga rasulẹ̌ ene sarang pengadilan. I sire nẹ̌kiwal᷊o, ’I sai něgělị si kamene kawasa gunang mapakapia tau ene?’ Petrus simimbahẹ̌, ’I kami nakaěbạ kawasa bọu i Yesus Kristus, tau seng nipateng i kamene.’ Manga těmbonangu agama nẹ̌mansagẹ̌, ’Pěngědo mẹ̌bisara soal i Yesus!’ Katewe manga rasulẹ̌ nẹ̌bera, ’I kami harusẹ̌ mẹ̌běke soal i sie. I kami tawe měngědo.’

Su tempong seng nawebasẹ̌, i Petrus dingangi Yohanes nakoạ sarang manga muritẹ̌ bal᷊inẹ kụ nẹ̌běke apa seng nariadi. I sire sěngkasio nẹ̌doa si Yehuwa, ’Tul᷊ungko i kami tatapẹ̌ bahani tadeạu botonge turusẹ̌ měkoạ hal᷊ẹ̌ ini.’ Yehuwa něgělị si sire rohkẹ̌ masusi, kụ i sire turusẹ̌ mělẹ̌habarẹ̌ habarẹ̌ mapia dingangu napakapia taumata masakị. Taumata mangimang si Yesus sauneng kakạl᷊awọe. Tau Saduki sěbạe iri hakị u ene i sire nẹ̌taho manga muritẹ̌ su penjara. Katewe su hěbi ene, Yehuwa něndolohẹ̌ malaekatẹ̌. Malaekatẹ̌ ene němuka tukadu penjara kụ nẹ̌bera, ’Dakọe saụ sarang bait, kụ pěněntiro sene.’

Dịěllone mal᷊ukadẹ̌, piạ u nẹ̌habarẹ̌ su Sanhedrin, ’Penjara bědang kakakunsị, katewe tau nisamẹ i kamene seng tawẹ dịe! I sire orasẹ̌ ini seng su bait měnẹ̌něntiro taumata!’ Manga rasulẹ̌ ene saụ nisamẹ kụ niwawa  sarang Sanhedrin. Imang mawantugẹ̌ nẹ̌bera, ’I kami seng nẹ̌sěding si kamene mẹ̌bisara soal i Yesus!’ Katewe i Petrus simimbahẹ̌, ”I kami harusẹ̌ limembong matuhụ su Mawu makoạ měngangawasang i kami sul᷊ungu su taumata.”

Těmbonangu agama sěbạe nẹ̌pědu hakị u mapulu měmate manga rasulẹ̌ ene. Katewe, tau Farisi arenge i Gamaliel nẹ̌bera, ’Pakaingatẹ̌! Aramanung kahěngang Mawu nẹ̌tul᷊ung si sire. Apa i kamene mapulu lumawang Mawu?’ I sire dimaringihẹ̌ si sie. Su apang bọu něměbahẹ̌ manga rasulẹ̌ dingangu těking, i sire lai saụ nẹ̌sěding su manga rasulẹ̌ mẹ̌bawa habarẹ̌ mapia. Bọu ene i sire saụ nipělọ, katewe i sire tawe něngědo něhabarẹ̌ habarẹ̌ mapia. I sire bahani turusẹ̌ mělẹ̌habarẹ̌ su bait dingangu bọu wal᷊e sarang bal᷊e.