Su apang i Adam dingangi Hawa nisěbang bọu taman Eden, i rẹ̌dua nakaěbạ lawọ anạ. Anạ kaiakanenge, i Kain, nakoạ tahawaelẹ̌. Anạ karuane, i Habel, nakoạ měngangahạ domba.

Piạ su sahěllo, Kain dingangi Habel něgělị sasěmbah si Yehuwa. Apa i kau masingkạ sasěmbah ene apa? Ene kai hadiah gunang Mawu. Yehuwa mal᷊uasẹ̌ su gaghělị i Habel, katewe i Sie tawe mal᷊uasẹ̌ su gaghělị i Kain. Ual᷊ingu ene i Kain nẹ̌pědu. Yehuwa nẹ̌bera si Kain mạeng i sie turusẹ̌ mẹ̌pědu, i sie sarung měkoạ barang dal᷊akị. Katewe i Kain tawe dimaringihẹ̌.

I Kain naul᷊ị si Habel, ’Bọete i kaduạ sarang kěhu,’ Su tempong kětạeng i rẹ̌dua su tampạ ene, i Kain  němate tuarine. Apa nikoạ i Yehuwa si Kain? Yehuwa něhukung si Kain dingangu něngoro si sie pěněntang kěluargane kụ nẹ̌sěding si sie mẹ̌bal᷊ị.

Apa kaěndungang i kitẹ bọu běke ini? Ěndịu i kitẹ mẹ̌pědu mạeng apa ikẹ̌kapulung i kitẹ tawe nariadi. Mạeng i kitẹ mẹ̌pědu, arau mạeng piạ u nẹ̌bera si kitẹ ual᷊ingu nakasilo i kitẹ nẹ̌pědu, i kitẹ harusẹ̌ masahawụ mẹ̌bal᷊ui těntal᷊ang ene bědang tawe naguwạ.

Ual᷊ingu i Habel makěndagẹ̌ si Yehuwa dingangu někoạ barang nihino, Yehuwa tawe niwul᷊e si sie. Su tempong i Yehuwa měmal᷊ui dunia makoạ firdaus, i Sie sarung saụ mapakawiahẹ̌ si Habel.