Taumata su dunia sauneng kakạl᷊awọe, katewe piạ lawọ taumata ral᷊akị. Bọu ene lai, piạ manga malaekatẹ̌ su sorga nakoạ dal᷊akị. I sire něněntang bal᷊eng i sire su sorga kụ limintụ sarang dunia. I kau masingkạ kawe i sire někoạ kerene? I sire mapulu makoạ taumata kụ mẹ̌kawing dingangu manga wawine.

I sire nakaěbạ anạ bọu manga wawine ene. Anạ i sire timuwo nakoạ sěbạe matoghasẹ̌ kụ puluang měngoka taumata wal᷊inẹ. Yehuwa madiri ene turusẹ̌ mariadi. Hakị u ene, i Sie mapulu měminasa taumata ral᷊akị su lěba.

Katewe, piạ sěngkatau esẹ nẹ̌tatěntang bọu i sire. I sie masayang si Yehuwa. Arenge Noakẹ̌. I sie piạ kawinge dingangu tatělu anạ esẹ, arenge Sem, Ham, dingangi Yafet. Tatělu anạe seng piạ kawinge. Yehuwa něngoro si Noakẹ̌ pěkoạ bahtera gěguwạ, tadeạu i Noakẹ̌ dingangu kěluargane tawe mate ual᷊ingu lěba, arau Air Bah. Bahtera ene kai kasẹ̌ kalu gěguwạ botonge dumal᷊ěto su wowong akẹ. Yehuwa lai něngoro si Noakẹ̌ pẹ̌bawa lawọ binatang sarang bahtera, tadeạu manga binatang ene tawe mate.

I Noakẹ̌ apidu někoạ bahtera. Noakẹ̌ dingangu kěluargane někoạ bahtera ene karěngụe ěndịu 50 su taunge. I sire někoạ ene mẹ̌sul᷊ung kere niul᷊ị i Yehuwa. Su tempo ene, i Noakẹ̌ něhabarẹ̌ su taumata soal u Air Bah. Katewe, tawẹ apa taumata mapulu dumaringihẹ̌ si sie.

Samurine, i sire harusẹ̌ sumuẹ̌ su bahtera. Mahịe měmanda apa nariadi tuhụe.