Musa nẹ̌tanạ su Midian karěngụe 40 taung. I sie nẹ̌kawing kụ nakaěbạ anạ. Piạ su sahěllo, su tempong i sie něndiagạ domba maraning Wul᷊udu Sinai, i sie nakasilo barang makạherang. Piạ semak natutung katewe tawe nahěngisẹ̌! Su tempong i Musa nẹ̌těngkarani, i sie nakaringihẹ̌ tingihẹ̌ bọu semak ene, ’Musa! Abe pẹ̌těngkarani. Luạ sělopẹ̌u, ual᷊ingu i kau dụdarisị su ěntana masusi.’ Ene kai i Yehuwa nẹ̌bisara něpakẹ malaekatẹ̌.

Ual᷊ingu natakụ, i Musa něnutu gatine. Bọu ene Yehuwa nẹ̌bera, ’Iạ seng nakasilo kasasusang tau Israel. Iạ sarung měnal᷊amatẹ̌ si sire bọu tau Misirẹ̌ kụ mẹ̌bawa si sire sarang ěntana masuburẹ̌. I kau sarung měngahạ umatẹ̌-Ku suměbang bọu Misirẹ̌.’ I Musa tantu himěkosẹ̌.

Musa nẹ̌kiwal᷊o, ’Mạeng i sire mẹ̌kiwal᷊o i sai něngoro si kau, iạ harusẹ̌ sumimbahẹ̌ apa?’ Mawu simimbahẹ̌, ’Paul᷊ị si sire, něngoro si siạ kai i Yehuwa, Mawung i Abraham, Ishak, dingangi Yakub.’ Musa nẹ̌bera, ’Kerea mạeng i sire madiri dumaringihẹ̌ si siạ?’ Yehuwa něgělị tatiala i Sie sarung mẹ̌tul᷊ung si Musa. I Sie něngoro si Musa pěneledẹ̌ těkinge su ěntana. Těking ene apidu nẹ̌bal᷊ui nakoạ těmpu! Su tempong i Musa něname tol᷊ene, těmpu ene saụ nakoạ těking. Bọu ene Yehuwa nẹ̌bera, mukjizat ini sarung makoạ tatiala Iạ seng něngoro si kau.’

Katewe i Musa nẹ̌bera, ’Iạ tawe pande mẹ̌bisara.’ Hakị u ene Yehuwa nẹ̌diandi si sie, ’Iạ sarung maul᷊ị si kau apa harusẹ̌ habarengu, kụ Iạ lai měngoro si kakạu, i Harun, gunang pẹ̌tul᷊ung si kau.’ Ual᷊ingu masingkạ Yehuwa sarung mẹ̌tul᷊ung si sie, Musa nẹ̌bal᷊ị sarang Misirẹ̌ dingangu kawing lai manga anạe.