Musa nẹ̌diandi si Firaun i sie seng tawe makoạ sarang i Firaun. Katewe su tempong seng suměbang, i sie nẹ̌bera, ’Tenga malam, kěbi anạ esẹ kaiakanenge su Misirẹ̌ sarung mate, měnětạ bọu anạ i Firaun sarang anạu ělang.’

Yehuwa něngoro tau Israel pěkoạ kaěng nẹ̌tatěntang bọu wiasane. I Sie naul᷊ị, ’Pěmotọko domba arau kambing esẹ umure sěntaung, kụ buhako dahane su tukadẹ̌ i kamene. Tongkạko ene, kụ kaěng sěngkasio dingangu borotẹ̌ tawẹ apa ragine. Pẹ̌sasadiạe kụ pakẹ solopẹ̌ i kamene. Hěbi ini, Iạ sarung mapakawebasẹ̌ si kamene.’

Tenga malam, malaekatẹ̌ i Yehuwa nakoạ sarang kěbị bal᷊e su Misirẹ̌. Mạeng su tukadẹ̌ sěmbaụ bal᷊e piạ daha, anạ esẹ su wal᷊e ene tawe pateng. Katewe mạeng tawẹ apa daha, anạ esẹ kaiakanenge su wal᷊e ene sarung pateng. Kěbị anạ esẹ kaiakanenge bọu tau Misirẹ̌ nate, měnětạ bọu anạu taumata kalạ sarang taumata masusah. Katewe anạu tau Israel tawẹ apa sarang sěngkatau nate.

Anạ i Firaun esẹ lai nate. Firaun seng tawe nakatahang. I sie langsung nẹ̌bera si Musa dingangi Harun, ’Dakọe sěbang bọu ini. Pěngibadạe su Mawung i kamene. Bawa kěbị binatang i kamene!’

 Su tempong bul᷊ang limangu, tau Israel siměbang bọu Misirẹ̌. I sire niatorẹ̌ tuhụ keluarga dingangu suku. Piạ 600.000 manga esẹ Israel kụ piạ lawọ lai manga wawine dingangu manga rariọ. Bọu ene, piạ lai taumata bọu bangsa wal᷊inẹ timol᷊e gunang měngibadah si Yehuwa. Samurine tau Israel nawebasẹ̌!

Gunang mẹ̌tahěndung kerea Yehuwa něnal᷊amatẹ̌ si sire, sabang taung tau Israel kụkaěng kaěng mẹ̌sul᷊ung kere su ěllo ene. Acara ene nisěbạ Paskah.