Kararatuang Asiria seng nakakala kararatuang Israel mapul᷊o suku. Datung Asiria, i Sanherib, mapulu měngawasa kararatuang darua suku su Yehuda. I sie něngal᷊ạ sěmbaụ-sěmbaụ manga soa su Yehuda. Katewe, soa sěbạe ikẹ̌kapuluange ute Yerusalem. Sanherib běga Yerusalem kai dẹ̌diagateng i Yehuwa.

Hizkia, datung Yehuda něgělị lawọ doitẹ̌ si Sanherib tadeạu i sie tawe měngal᷊ạ Yerusalem. Sanherib něngal᷊ạ doitẹ̌ ene, katewe i sie tatapẹ̌ něngoro manga prajurite gunang měngalo Yerusalem. Taumata su soa ene sěbạe natakụ ual᷊ingu tau Asiria kakạranine. Bọu ene, Hizkia nẹ̌bera, ’Abe katakụ. Tau Asiria matoghasẹ̌, katewe Yehuwa sarung měkoạ si kitẹ limembong matoghasẹ̌ bọu i sire.’

Sanherib něndolohẹ̌ Rabsyake sarang Yerusalem gunang měheghesẹ̌ taumata sene. Rabsyake dimarisị su likudu těndạ kụ němansagẹ̌, ’Yehuwa tawe makatul᷊ung si kamene. Abe pangimang su konting i Hizkia. Tawẹ apa mawu makasal᷊amatẹ̌ si kamene bọu limang i kami.’

I Hizkia nẹ̌kiwal᷊o si Yehuwa apa harusẹ̌ koatenge. Yehuwa simimbahẹ̌, ’Abe katakụ ual᷊ingu bawerang i Rabsyake ene. Sanherib tawe makaal᷊ạ Yerusalem.’ Bọu ene, Hizkia nakatarimạ suratẹ̌ bọu i Sanherib. Su suratẹ̌ ene, Sanherib nẹ̌bera, ’Pẹ̌těngkawatạe. Yehuwa tawe makasal᷊amatẹ̌ si kamene.’ I Hizkia nẹ̌doa si Yehuwa, ’Yehuwa, tul᷊ungko i kami, tadeạu kěbị taumata masingkạ kětạeng i Kau Mawu kahěngang.’ Yehuwa simimbahẹ̌, ’Datung Asiria tawe makasuẹ̌ su Yerusalem. Iạ sarung měndiagạ soa-Ku.’

Sanherib sěbạe mangimang Yerusalem seng mal᷊ighạ makala. Katewe su hěbi ene, Yehuwa něndolohẹ̌ sěmbaụ malaekatẹ̌ sarang kemang prajurit Asiria su likudu soa ene. Malaekatẹ̌ ene němate 185.000 prajurit!  Kěbị prajurit Datu Sanherib katoghasenge nate. Ual᷊ingu ene, i sie napul᷊ẹ. Yehuwa něndiagạ si Hizkia dingangu Yerusalem, kere seng niriandi-Ne. Mạeng tempo ene i kau ene su Yerusalem, apa i kau lai sarung mangimang si Yehuwa?