Anạu sěmbaụ ikẹ̌kěndagi kami,

Ual᷊ingu i kitẹ měnẹ̌němbah si Yehuwa, i kitẹ makěndagẹ̌ su Hengetang’E, Alkitapẹ̌. I kitẹ mangimang Alkitapẹ̌ lohone sejarah nihino, laahạ botonge kapěngimangeng gunang pěbawiahẹ̌, dingangu bukti i Yehuwa makěndagẹ̌ su manga keluarga. (Mazmur 119:105; Lukas 1:3; 1 Yohanes 4:19) I kitẹ sěbạe mapulu mẹ̌tul᷊ung taumata wal᷊inẹ makasingkạ katěngadẹ̌ maarěga su ral᷊ungu Hengetangu Mawu. Hakị u ene, i kami sěbạe mal᷊uasẹ̌ botonge něnadia bukẹ̌ ini, Pěngěndungke bọu Manga Běke su Alkitapẹ̌. I kami mělahẹ kadodọ soal u bukẹ̌ ini.

Kal᷊awokange lohong bukẹ̌ ini nikoạ gunang manga rariọ. Katewe, bukẹ̌ ini lai botonge makatul᷊ung taumata matělang apang mapulu makasingkạ limembong mal᷊awọ soal u Alkitapẹ̌. Ual᷊ingu Alkitapẹ̌ gunang kěbị taumata, i kitẹ kěbị sarung makaěbạ gunane mạeng měngěndung lohone. Kụ i kitẹ sarung makapěndang karal᷊uasẹ̌ tutune.

Bukẹ̌ ini nẹ̌běke soal u taumata dongkeng i sire niriadi, kụ kěbị ene nial᷊ạ bọu Alkitapẹ̌. I kami nẹ̌tawakal᷊i nẹ̌běke manga peristiwa su Alkitapẹ̌ dingangu mal᷊ahẹ, sederhana, kụ lai sěngapang botonge, nipẹ̌tatuhụ.

Maning kerene, bukẹ̌ ini lohone bal᷊inẹ kětạeng běke. Manga bawera dingangu gambarẹ̌ su ral᷊ungu bukẹ̌ ini nikoạ tadeạu i kitẹ mẹ̌sul᷊ung kere nakahombang hala manga peristiwa ene dingangu botonge makapěndang apa nikapěndangeng i sire.

Bọu bukẹ̌ ini, i kitẹ makasingkạ Alkitapẹ̌ nẹ̌běke soal u taumata apang matuhụ si Yehuwa dingangu tala. I kitẹ lai botonge mawahansang gunang měngěndung bọu i sire. (Roma 15:4;  1 Korintus 10:6) Su bukẹ̌ ini piạ 14 bageang. Kěbị bageang nitětạ dingangu ringkasan soal u apa botonge kaěndungang i kitẹ.

Mạeng Anạu sěmbaụ piạ anạ, Anạu sěmbaụ botonge mẹ̌basa sěmbaụ běke dingangu anạu, kụ mělahẹ gambare. Bọu ene, i kamene botonge mẹ̌basa manga ayatẹ̌ nakoạ dasaru běke ene. Pẹ̌tul᷊ung anạu makaěna apa niěndungange ene kai asal᷊e bọu Alkitapẹ̌. Cara mẹ̌sul᷊ung lai botonge paketang gunang mẹ̌tul᷊ung taumata apang seng matělang makaěbạ gambaran soal u lohong Alkitapẹ̌.

I kami mělẹ̌harapẹ̌ bukẹ̌ ini botonge makatul᷊ung kěbị taumata apang naunge masanạ, baẹbe mangudạ arau lai maghurang, gunang makaěbạ tatěntiro bọu Hengetangu Mawu kụ měpakẹ ene su pěbawiahi sire. Hasile, i sire lai botonge makoạ ělang i Yehuwa dingangu makoạ kěluarga-Ne.