Habarẹ̌ mapia taumata sarung mẹ̌biahẹ̌ sarang karěngụe su dunia, ene niwohẹ su Alkitapẹ̌. (Mazmur 37:29) Su ral᷊ungu Alkitapẹ̌ piạ 66 bukẹ̌. Mawu něpakẹ 40 su kataune manga esẹ gunang měmohẹ Alkitapẹ̌. Lima bukẹ̌ humotong niwohẹ i Musa ěndịu 3.500 su taunge tamai. Bukẹ̌ kasamuriange niwohẹ i Rasul Yohanes nal᷊iu bọu 1.900 su taunge tamai. Tiněnang i sai niwohẹ su Alkitapẹ̌? Mawu něpakẹ rohkẹ̌ masusi gunang mělahẹ tiněna-Ne su měmamohẹ Alkitapẹ̌. (2 Samuel 23:2) I sire němohẹ tiněnang Mawu, bal᷊inẹ tiněnang i sire hala. Hakị u ene, Yehuwa kai Pengarang Alkitapẹ̌.​—Basa 2 Timotius 3:16; 2 Petrus 1:20, 21.

Pẹ̌biala video I Sai Pengarang Alkitapẹ̌?

I kitẹ mangimang Alkitapẹ̌ asal᷊e bọu Mawu ual᷊ingu lohone něněbal᷊ẹ̌ apa sarung mariadi su ěllo mahi sarang hal᷊ẹ̌ kakadodọkange. Taumata tawe makakoạ kerene. (Yosua 23:14) Kětạeng Mawu Makawasa botonge makasilo apa sarung mariadi su tempo mahi sarang hal᷊ẹ̌ kakadodọkange.​—Basa Yesaya 42:9; 46:10.

I kitẹ tantu mělẹ̌harapẹ̌ bukẹ̌ bọu Mawu nẹ̌tatěntang bọu bukẹ̌ bal᷊inẹ, kụ memang kerene. Miliarẹ̌ Alkitapẹ̌ seng nicetakẹ̌ su hasụe bawera. Maning Alkitapẹ̌ seng marěngụ niwohẹ, lohone nẹ̌tatahino dingangu kasingkạ u taumata soal u alam. Bọu ene lai, apa niwohẹu 40 měmamohẹe tawe nẹ̌tatěntang sěmbaụ su wal᷊inẹ. * Kụ, kakěndagu  Mawu seng nilahẹ mal᷊awọ su Alkitapẹ̌, piạ kawasane gunang měkoạ pěbawiahu taumata makoạ limembong mapia. Manga hal᷊ẹ̌ ini nakakoạ taumata mangimang Alkitapẹ̌ kai Hengetangu Mawu.​—Basa 1 Tesalonika 2:13.

Pẹ̌biala video Kawe Nụe i Kitẹ Botonge Mangimang Lohong u Binohẹ Susi Ene Kahěngang?

Alkitapẹ̌ nělahẹ habarẹ̌ mapia soal u kapulung Mawu gunang měgělị pěbawiahẹ̌ mal᷊uasẹ̌ su kěbị taumata su ěllo mahi. Alkitapẹ̌ lai nẹ̌běke kerea taumata nikailangengu pěbawiahẹ̌ mal᷊uasẹ̌ su firdaus, kụ kerea firdaus ene saụ koateng su tempo mahi.​—Basa Wahyu 21:4, 5.

Hengetangu Mawu lai lohone hukung, prinsipẹ̌, dingangu sasasa. Bọu ene lai, su Alkitapẹ̌ piạ contoh kerea Mawu měkoạ taumata. Bọu contoh ene, i kitẹ makasingkạ sipatu Mawu. Hakị u ene, Alkitapẹ̌ makatul᷊ung si kau makasingkạ soal u Mawu dingangu makasingkạ carane mẹ̌dal᷊ahapị dingang’E.​—Basa Mazmur 19:7, 11; Yakobus 2:23; 4:8.

Brosur ini makatul᷊ung si kau makaěna lohong Alkitapẹ̌ ual᷊ingu timol᷊e carang i Yesus měněntiro. Yesus nẹ̌sěbạ lawọ ayatẹ̌, kụ nělahẹ apa ”mangal᷊ene Binohẹ Susi”.​—Basa Lukas 24:27, 45.

Tawẹ apa hal᷊ẹ̌ limembong mapaelẹ̌ sul᷊ungu habarẹ̌ mapia bọu Mawu. Katewe, piạ taumata madiri dumaringihẹ̌. Abe tol᷊e si sire. Pělaharapẹ̌ měbiahẹ̌ sarang karěngụe, kětạeng kaěbakeng mạeng i kau makasingkạ soal u Mawu.​—Basa Yohanes 17:3.