Mawu měgẹ̌gausẹ̌ kěbị taumata mẹ̌doa si Sie. (Mazmur 65:2) Katewe, i Sie tawe dụdaringihẹ̌ kěbị daroa. Contone, mạeng sěngkatau esẹ matingkaị měkoạ kawinge, Mawu madiri dumaringihẹ̌ daroane. (1 Petrus 3:7) Bọu ene lai, su tempong tau Israel turusẹ̌ měkẹ̌koạ barang dal᷊akị, Mawu tawe dimaringihẹ̌ daroang i sire. Nal᷊ahẹ, daroa kai sěmbaụ hal᷊ẹ̌ mạarěga. Katewe, Mawu sarung dumarigihẹ̌ daroang taumata apang někoạ dosa gěguwạ mạeng i sire mẹ̌tobatẹ̌.—Basa Yesaya 1:15; 55:7.

Pẹ̌biala video Apa Mawu Dụdaringihẹ̌ Kěbị Daroa?

Daroa kai sěmbaụ bageang bọu ibadang i kitẹ, hakị u ene i kitẹ kětạeng botonge mẹ̌doa su Měndariading i kitẹ, Yehuwa. (Matius 4:10; 6:9) Bọu ene, ual᷊ingu tawe nasukụ, i kitẹ harusẹ̌ mẹ̌doa su ral᷊ungu areng i Yesus, ual᷊ingu i sie nate gunang měněbusẹ̌ dosang i kite. (Yohanes 14:6) Yehuwa madiri mạeng daroang i kitẹ nihafalẹ̌ arau niwohẹ. I Sie mapulu i kitẹ mẹ̌doa bọu dal᷊ungu naung.—Basa Matius 6:7; Filipi 4:6, 7.

Měndariading i kitẹ makaringihẹ̌ maning i kitẹ mẹ̌doa su ral᷊ungu naung. (1 Samuel 1:12, 13) I Sie měgẹ̌gausẹ̌ si kitẹ mẹ̌doa su haghing tempo, contone, su tempong buhudeng nẹ̌bangung, mẹ̌tikị, kumaěng, arau su tempong tụtatěngo sigěsạ.—Basa Mazmur 55:22; Matius 15:36.

Makoạ hapị u Mawu tawe gampang ual᷊ingu i kitẹ měbẹ̌biahẹ̌ su tal᷊oarang taumata tawe mangimang su Mawu dingangu mělẹ̌heghesẹ̌ diandi-Ne soal u pẹ̌darame  su dunia. (2 Timotius 3:1, 4; 2 Petrus 3:3, 13) Hakị u ene, i kitẹ kěbị harusẹ̌ mẹ̌tatoghasẹ̌ sěmbaụ su wal᷊inẹ.—Basa Ibrani 10:24, 25.

Mạeng i kitẹ mẹ̌dal᷊ahapị dingangu taumata kukěndagu Mawu, i kitẹ lai sarung mědal᷊ahapị mapia dingangu Mawu. Su pěngangibadang Sahiding Yehuwa, pangangimang i kitẹ makoạ matoghasẹ̌ ual᷊ingu makasilo pangangimangu taumata wal᷊inẹ.—Basa Roma 1:11, 12.

I kau botonge makoạ hapị u Mawu mạeng mẹ̌tiněna apa seng niěndungangu su Hengetang’E. Pẹ̌tiněna pakapia kakanoạ’E, těntiro-Ne, dingangu diandi-Ne. Mạeng i kitẹ mẹ̌tiněna dingangụ mẹ̌doa, i kitẹ sarung limembong měngarěga kakěndagẹ̌ dingangu pelesang Mawu.—Basa Yosua 1:8; Mazmur 1:1-3.

I kau sarung mědal᷊ahapị dingangu Mawu mạeng i kau mangimang si Sie. Katewe, kere sasuang harusẹ̌ sěbohang tadeạu tumuwo, pangangimang i kitẹ lai harusẹ̌ toghaseng. Carane, pakasau mẹ̌tiněna katěngadẹ̌ seng nakoạ dasaru pangangimangu.—Basa Matius 4:4; Ibrani 11:1, 6.

Yehuwa mapadul᷊i si sire apang makěndagẹ̌ si Sie. Yehuwa botonge měndiagạ si sire bọu kěbị apang makarusa pangangimang dingangu pělaharapẹ̌ měbiahẹ̌ kěkalẹ̌. (Mazmur 91:1, 2, 7-10) I Sie něgělị laingatẹ̌ tadeạu i kitẹ mẹ̌těngkarau bọu dal᷊engu pěbawiahẹ̌ makarusa kasasehatẹ̌ dingangu karal᷊uasẹ̌ i kitẹ. Yehuwa něněntiro si kitẹ dal᷊engu wiahẹ̌ kapaelange.—Basa Mazmur 73:27, 28; Yakobus 4:4, 8.