PĚNGANGĚNDUNGANG 25
Pěbawiahẹ̌ Kerea Ikẹ̌kapulung Mawu gunang i Kitẹ?
Alkitapẹ̌ něngakui pěbawiahu taumata ene ”manibụ dingangu napenẹu kasasusah”. (Ayub 14:1) Apa ene pěbawiahẹ̌ ikẹ̌kapulung Mawu gunang i kitẹ? Mạeng tala, pěbawiahẹ̌ kerea ikẹ̌kapulung Mawu? Apa ene sarung mariadi? Pěmanda sasimbahẹ̌ makahiborẹ̌ bọu Alkitapẹ̌.
1. Pěbawiahẹ̌ kerea ikẹ̌kapulung Yehuwa gunang i kitẹ?
Yehuwa mapulu i kitẹ piạ pěbawiahẹ̌ kapaelange. Su tempong i Sie něndiadi taumata humotong, i Adam dingangi Hawa, i Sie nẹ̌taho si sire su firdaus masadadạ, ene kai taman Eden. Bọu ene, ”Mawu něngal᷊amatẹ̌ si sire kụ nẹ̌bera si sire, ’Pěmpẹ̌hitẹe pakal᷊awọ, pěmenẹe dunia kụ pẹ̌kawasạe ene’”. (Kejadian 1:28) Yehuwa mapulu i sire piạ manga anạ i sire, měmal᷊ui dunia makoạ firdaus, dingangu měngurusẹ̌ manga binatang. Mawu mapulu kěbị taumata piạ badang masehatẹ̌ dingangu měbiahẹ̌ sarang karěngụe.
Maning orasẹ̌ ini hal᷊ẹ̌ ene bědang tawe nariadi, * kapulung Mawu tawe nẹ̌bal᷊ui. (Yesaya 46:10, 11) I Sie bědang mapulu taumata matuhụ měbiahẹ̌ kěkalẹ̌ su situasi mapaelẹ̌.—Basa Wahyu 21:3, 4.
2. Kerea i kitẹ botonge mal᷊uasẹ̌ orasẹ̌ ini?
Yehuwa něndiadi si kitẹ dingangu ”kebutuhan rohani”, ene kai kapulu gunang makasingkạ lai měněmbah si Sie. (Basa Matius 5:3-6.) I Sie mapulu i kitẹ mědal᷊ahapị mapia dingang’E, ’tumol᷊e kěbị dal᷊eng’E, kuměndagẹ̌ si Sie’, lai mẹ̌tahamawu si Sie ”dingangu kaguwạu naung”. (Ulangan 10:12; Mazmur 25:14) Mạeng měkoạ ene, i kitẹ botonge kahěngang-hěngang mal᷊uasẹ̌ maning tụtatěngo haghing masalah. Mẹ̌tahamawu si Yehuwa makakoạ pěbawiahi kitẹ piạ timonane ual᷊ingu i kitẹ seng něbiahẹ̌ tuhụ kapulu-Ne.
BANGKA PAKARAL᷊UNG
Mahịe měngěndung soal u kaguwạu kakěndagẹ̌ nitodẹ i Yehuwa su tempong něnadia dunia gunang i kitẹ. Bọu ene lai, mahịe měmanda apa niul᷊ịu Hengetang’E soal u pěbawiahẹ̌ ikẹ̌kapulu-Ne gunang i kitẹ.
3. Yehuwa mapulu taumata měbiahẹ̌ mal᷊uasẹ̌
Putarẹ̌ VIDEONE, bọu ene bisarai kakiwal᷊o ini.
-
Kawe nụe Mawu někoạ dunia masadadạ?
Basa Pengkhotbah 3:11, bọu ene bisarai kakiwal᷊o ini:
-
Bọu ayatẹ̌ ini, apa kaěndungangu soal u Mawu Yehuwa?
4. Kapulung Yehuwa tawe nẹ̌bal᷊ui
Basa Mazmur 37:11, 29 dingangu Yesaya 55:11, bọu ene bisarai kakiwal᷊o ini:
-
Kerea i kitẹ masingkạ kapulung Yehuwa gunang i kitẹ tawe nẹ̌bal᷊ui?
Bal᷊e seng narusa botonge saụ koateng pakapaelẹ̌. Kerene lai, dunia seng narusa sarung saụ koatengu Mawu pakapaelẹ̌ gunang pẹ̌tanakengu taumata apang makěndagẹ̌ si Sie
5. Mẹ̌tahamawu si Yehuwa makakoạ pěbawiahi kitẹ kahěngang-hěngang mal᷊uasẹ̌
Makasingkạ soal u apa kapulung Mawu gunang i kitẹ ene makakoạ si kitẹ mal᷊uasẹ̌. Putarẹ̌ VIDEONE, bọu ene bisarai kakiwal᷊o ini.
-
Kerea i Terumi nakaěbạ gunane ual᷊ingu něngěndung apa kapulung Mawu gunang taumata?
Basa Pengkhotbah 12:13, bọu ene bisarai kakiwal᷊o ini:
-
Ual᷊ingu Yehuwa seng někoạ lawọ hal᷊ẹ̌ gunang i kitẹ, apa koateng i kitẹ gunang měmal᷊isẹ̌ kapia-Ne?
ARAMANUNG PIẠ U NẸ̌KIWAL᷊O: ”Kerea tadeạu pěbawiahi kitẹ mal᷊uasẹ̌?”
-
Kerea i kau sumimbahẹ̌ kakiwal᷊o ene?
RINGKASAN
Yehuwa mapulu i kitẹ měbiahẹ̌ mal᷊uasẹ̌ sarang karěngụe su situasi mapaelẹ̌ su dunia ini. Mạeng i kitẹ mẹ̌tahamawu si Sie dingangu kaguwạu naung, pěbawiahi kitẹ sarung kahěngang-hěngang mal᷊uasẹ̌ měnětạ orasẹ̌ ini.
Apa seng nikaěndungangu?
-
Pěbawiahẹ̌ kerea ikẹ̌kapulung Yehuwa gunang i Adam dingangi Hawa?
-
Kerea i kitẹ masingkạ kapulung Mawu gunang taumata tawe nẹ̌bal᷊ui?
-
Kerea tadeạu pěbawiahu botonge kahěngang-hěngang mal᷊uasẹ̌?
PĚMANDA LAI
Pẹ̌tiněna bukti něnodẹ taman Eden kai kahěngang-hěngang ene.
”Taman Eden—Mitos arau Fakta?” (Menara Pengawal, 1 Januari 2011)
Pěngěndungke kawe nụe i kitẹ botonge mangimang dunia sarung tatapẹ̌ ene sarang karěngụe.
Parikěsa apa niul᷊ịu Alkitapẹ̌ soal u makaěbạ timonang pěbawiahẹ̌.
Pěmanda pengalaman sěngkatau esẹ kakělaěng piạ pěbawiahẹ̌ mal᷊uasẹ̌ katewe nẹ̌pěndang piạ barang kurang su pěbawiahe.
^ par. 6 Su pěngangěndungang tuhụe, i kitẹ sarung měngěndung kawe nụe ene bědang tawe nariadi.
