Daha ene sěbạe penting. Mạeng tawẹ apa daha, i kitẹ tawe makapěbiahẹ̌. Mawu něndiadi si kitẹ, hakị u ene i Sie piạ hakẹ̌ gunang maul᷊ị kerea daha harusẹ̌ paketang. Apa niul᷊ịu Mawu soal u daha? Apa i kitẹ botonge kumaěng daha arau měnarimạ transfusi daha? Kụ, kerea i kitẹ botonge měkoạ putusang nihino soal u hal᷊ẹ̌ ini?

1. Kerea pěndang i Yehuwa soal u daha?

Yehuwa naul᷊ị su manga ělang’E su zaman Alkitapẹ̌, ”Singongong kěbị makhluk ene kai dahane.” (Imamat 17:14) Su těngong Yehuwa, daha melambangkan pěbawiahẹ̌. Pěbawiahẹ̌ kai masusi, kụ hadiah bọu Mawu. Hakị u ene, daha lai masusi.

2. Mawu nẹ̌sěding daha paketang gunang apa?

Těntal᷊ang bědang tawẹ apa Kekristenan, Yehuwa něgělị parenta su manga ělang’E gunang tawe kumaěng daha. (Basa Kejadian 9:4 dingangu Imamat 17:10.) Bọu ene, i Sie saụ nělahẹ parenta ene su tau Kristen limiung badan pimpinan, su tempong badan pimpinan něgělị laahạ, ”Tatapẹ̌e pẹ̌těngkarau bọu . . . daha.”​—Basa Kisah 15:​28, 29.

Apa mangal᷊ene mẹ̌těngkarau bọu daha? Mạeng dokter naul᷊ị si kau pẹ̌těngkarau bọu alkoholẹ̌, i kau tantu tawe měnginung ene. Katewe, apa i kau sarung kumaěng kaěng kụ su ral᷊unge piạ alkoholẹ̌e arau měnuntikẹ̌ alkoholẹ̌ su wadangu? Tantu tala. Kerene lai, parentang Mawu gunang mẹ̌těngkarau bọu daha ene mangal᷊ene i kitẹ tawe wotonge měnginung daha arau kumaěng daging binatang kụ dahane bědang tawe niwoso. Bọu ene lai, i kitẹ tawe wotonge kumaěng haghing kaěng kụ su ral᷊unge piạ daha.

Kerea soal u perawatan kesehatan měpakẹ daha? Piram baụ perawatan kesehatan sěbạe mal᷊ahẹ limawang hukungu Mawu. Contone, měntransfusi daha utuh, arau ěpạ bageang utama daha​—sel darah merah, sel darah putih, trombosit, dingangu plasma. Perawatan kesehatan wal᷊inẹ tawe secara langsung limawang hukungu Mawu. Contone, piram baụ perawatan kesehatan aramanung měpakẹ fraksi bọu sěmbaụ bageang utama daha. Perawatan kesehatan wal᷊inẹ lai měpakẹ daha bọu tau masakị ene. Su tempong mẹ̌timbang manga perawatan kesehatan ene, i kitẹ sěngkatau-sěngkatau harusẹ̌ měkoạ putusang. *​—Galatia 6:5.

 BANGKA PAKARAL᷊UNG

3. Pěkoạe putusang makal᷊uasẹ̌ si Yehuwa

Soal u perawatan kesehatan, kerea i kau botonge měkoạ putusang nẹ̌tatahino dingangu pěndangu Mawu soal u daha? Putarẹ̌ VIDEONE, bọu ene bisarai kawe nụe penting měkoạ piram baụ hal᷊ẹ̌ ini:

• Pẹ̌doạe pẹ̌dorong pelesa.​—Yakobus 1:5.

• Pědeạe manga prinsip Alkitapẹ̌ dingangu pěngěndung kerea tumol᷊e manga prinsip ene.​—Amsal 13:16.

• Pědeạe informasi soal u perawatan kesehatan apa piạ su tampạ pẹ̌tatanakengu.

• Tialai perawatan kesehatan sude tawe tarimakengu.

• Parikěsa apa putusangu makakoạ hati nuraninu tatapẹ̌ burěsi.​—Kisah 24:16. *

• Soal u hati nurani, abe wala sarang sěngkatau, tawẹ soale kawing, penatua, arau guru studi, maul᷊ị si kau putusang apa harusẹ̌ koatengu.​—Roma 14:12.

• Bohẹ putusangu.

4. Sahiding Yehuwa mědẹ̌deạ perawatan kesehatan kapaelange

Tumol᷊e hukungu Mawu soal u daha dingangu měnarimạ perawatan kesehatan tawe měpakẹ daha, ene botonge koateng. Putarẹ̌ VIDEONE.

Basa Titus 3:​2, bọu ene bisarai kakiwal᷊o ini:

• Kawe nụe i kitẹ harusẹ̌ sěntiniạ maadatẹ̌ dingangu matěnang su tempong mẹ̌bisara su dokterẹ̌?

 5. Mạeng perawatan kesehatan něpakẹ fraksi daha

Su daha, piạ ěpạ bageang utama, ene kai sel darah merah, sel darah putih, trombosit, dingangu plasma. Su ral᷊ungu ěpạ bageang ene, piạ lawọ bageang dararodọ nisěbạ fraksi daha. * Piram baụ fraksi seng nipakẹ su undang gunang mẹ̌tul᷊ung lumawang sakị arau mapakaědo pendarahan.

Mạeng soal u fraksi daha, tau Kristen harusẹ̌ měkoạ putusang sěngkatau-sěngkatau tuhụ hati nurani seng nilatih Alkitapẹ̌. Pirang katau aramanung němutusẹ̌ tawe měnarimạ perawatan kesehatan arau prosedur něpakẹ fraksi daha. Sěnggạ lai aramanung nẹ̌pěndang hati nuraning i sire tawe nẹ̌sěding si sire měnarimạ fraksi daha.

Su tempong měkoạ putusang, pẹ̌tiněna kakiwal᷊o ini:

• Kerea iạ mělahẹ su dokterẹ̌ alasang kawe nụe iạ měnarimạ arau tawe měnarimạ fraksi daha?

 RINGKASAN

Yehuwa mapulu i kitẹ mẹ̌tahěndung daha ene masusi.

Apa seng nikaěndungangu?

• Kawe nụe su těngong Yehuwa daha ene masusi?

• Kerea i kitẹ masingkạ parentang Mawu gunang mẹ̌těngkarau bọu daha ene lai mangal᷊ene tawe měnarimạ transfusi daha?

• Kerea i kau botonge měkoạ putusang nihino soal u perawatan kesehatan?