PĚNGANGĚNDUNGANG 42
Apa Niul᷊ịu Alkitapẹ̌ soal u Mẹ̌kawing dingangu Tawe Mẹ̌kawing?
Su piram baụ budaya, lawọ mangimang taumata tawe mal᷊uasẹ̌ mạeng tawe mẹ̌kawing. Katewe, tawe kěbị taumata apang nẹ̌kawing mal᷊uasẹ̌, kụ tawe kěbị taumata apang tawe nẹ̌kawing tawe mal᷊uasẹ̌. Sěběnarẹ̌e, Alkitapẹ̌ naul᷊ị mẹ̌kawing dingangu tawe mẹ̌kawing ene kai gaghělị.
1. Apa piram baụ al᷊amatẹ̌ nikapěndangeng i sire apang tawe nẹ̌kawing?
Alkitapẹ̌ naul᷊ị, ”Taumata apang nẹ̌kawing nakaěbạ gunane, katewe taumata apang tawe nẹ̌kawing nakaěbạ limembong lawọ gunane.” (Basa 1 Korintus 7:32, 33, 38.) Kerea taumata apang tawe nẹ̌kawing nakaěbạ ”limembong lawọ gunane”? Tau Kristen apang tawe nẹ̌kawing tawe harusẹ̌ měngurusẹ̌ kebutuhan kawinge. Hakị u ene, i sire piạ limembong lawọ kawawebasẹ̌. Contone, pirang katau botonge někoạ limembong lawọ hal᷊ẹ̌ gunang pelayanan, kere něngal᷊ing sarang negeri wal᷊inẹ gunang měmahiạ habarẹ̌ mapia. Kụ limembong penting, i sire piạ limembong lawọ tempo gunang mẹ̌těngkarani si Yehuwa.
2. Apa piram baụ al᷊amatẹ̌ nikapěndangeng i sire apang nẹ̌kawing?
Kere taumata apang tawe nẹ̌kawing, i sire apang nẹ̌kawing lai nakaěbạ gunane. Alkitapẹ̌ naul᷊ị, ”Duang katau limembong mapaelẹ̌ sul᷊ungu sẹ̌sa.” (Pengkhotbah 4:9) Ini kahěngang mạeng tau Kristen tumol᷊e prinsip Alkitapẹ̌ su pẹ̌kakawing i sire. Taumata apang nẹ̌kawing nẹ̌diandi gunang mẹ̌kakěndagẹ̌, mẹ̌papangadatẹ̌, dingangu makal᷊uasẹ̌ sěmbaụ su wal᷊inẹ. Hasile, i sire biasane makapěndang limembong aman sul᷊ungu esẹ dingangu wawine apang kětạeng měbẹ̌biahẹ̌ sěngkasio katewe tawe nẹ̌kawing. Kụ, manga anạ i sire lai sarung makapěndang limembong aman.
3. Kerea pěndang i Yehuwa su pẹ̌kakawing?
Su tempong Yehuwa někoạ pẹ̌kakawing kahumotongange, i Sie nẹ̌bera, ”Sěngkatau esẹ sarung měněntang i papạ dingangi mamạe kụ sarung turusẹ̌ dingangu kawinge.” (Kejadian 2:24) Yehuwa mapulu kawing esẹ dingangu kawing wawine mẹ̌kakěndagẹ̌ sěmbaụ su wal᷊inẹ dingangu tatapẹ̌ měbiahẹ̌ sěngkasio su kanandụu pěbawiahi rẹ̌dua. I Sie něgělị izin taumata mẹ̌cere mạeng kawinge berzina. Mạeng ene nariadi, Yehuwa něgělị hakẹ̌ su kawing tawẹ apa sal᷊ane gunang měmutusẹ̌ apa i sie sarung mẹ̌cere arau tala. * (Matius 19:9) Yehuwa madiri mạeng tau Kristen piạ kawinge nal᷊iu bọu sěngkatau.—1 Timotius 3:2.
BANGKA PAKARAL᷊UNG
Mahịe měngěndung kerea i kau botonge mal᷊uasẹ̌ dingangu makakoạ Yehuwa mal᷊uasẹ̌, tawẹ soale i kau seng nẹ̌kawing arau tawe nẹ̌kawing.
4. Tau Kristen apang tawe nẹ̌kawing botonge měpakẹ pakapia pěbawiahi sire
Si Yesus, tawe mẹ̌kawing ene kai gaghělị. (Matius 19:11, 12) Basa Matius 4:23, bọu ene bisarai kakiwal᷊o ini:
-
Ual᷊ingu tawe nẹ̌kawing, kerea Yesus něpakẹ pěbawiahe gunang měkoạ kapulung i Amange dingangu mẹ̌tul᷊ung taumata wal᷊inẹ?
Tau Kristen apang tawe nẹ̌kawing botonge makaěbạ karal᷊uasẹ̌ mạeng mẹ̌těno si Yesus. Putarẹ̌ VIDEONE, bọu ene bisarai kakiwal᷊one.
-
Kerea tau Kristen apang tawe nẹ̌kawing botonge měpakẹ pakapia pěbawiahi sire?
Apa i kau masingkạ?
Alkitapẹ̌ tawe naul᷊ị batasẹ̌ kasanạkenge gunang mẹ̌kawing. Katewe, Alkitapẹ̌ němahangsang gunang měngampalẹ̌ sarang ’umurẹ̌ seng matimu’, arau sarang kapulu seksual matoghasẹ̌ mal᷊iu, ual᷊ingu ene sarung makapěngaruh putusangu mangangudạ.—1 Korintus 7:36.
5. Pilẹe kawing pakapia
Měmile kawing ene kai putusang sěbạe penting. Basa Matius 19:4-6, 9, bọu ene bisarai kakiwal᷊o ini:
-
Kawe nụe tau Kristen tawe wotonge tumanịu masahawụ měkoạ putusang gunang mẹ̌kawing?
Alkitapẹ̌ botonge makatul᷊ung si kitẹ makasingkạ manga sipatẹ̌ apa harusẹ̌ piạ su tau sarung makoạ kawing i kitẹ. Kahumotongange, i sie harusẹ̌ makěndagẹ̌ si Yehuwa. * Basa 1 Korintus 7:39 dingangu 2 Korintus 6:14. Bọu ene, bisarai manga kakiwal᷊o ini:
-
Kawe nụe i kitẹ harusẹ̌ mẹ̌kawing kětạeng dingangu ělang i Yehuwa?
-
Tumuhụ si kau, kerea pěndang i Yehuwa mạeng i kitẹ mẹ̌kawing dingangu taumata tawe makěndagẹ̌ si Sie?
Mạeng darua binatang nẹ̌tatěntang němikul᷊ẹ̌ kuk mẹ̌sul᷊ung, darua binatang ene sarung masigěsạ. Kerene lai, mạeng tau Kristen mẹ̌kawing dingangu bal᷊inẹ ělang i Yehuwa, i rẹ̌dua sarung makahombang lawọ masalah
6. Pěngarěga pẹ̌kakawing kere Yehuwa měngẹ̌ngarěga ene
Su Israel tempong tamai, pirang katau esẹ něněntang kawinge ual᷊ingu mětẹ̌tiněna kapiang watangeng i sire hala. Basa Maleakhi 2:13, 14, 16, bọu ene bisarai kakiwal᷊o ini:
-
Kawe nụe Yehuwa mawěngsing taumata mẹ̌cere ual᷊ingu alasang tawe nẹ̌tatahino dingangu Alkitapẹ̌?
Perzinaan dingangu perceraian ene sěbạe makatědụ naungu kawing tawẹ apa sal᷊ane dingangu anạ
Putarẹ̌ VIDEONE, bọu ene bisarai kakiwal᷊one.
-
Mạeng kawingu bal᷊inẹ ělang i Yehuwa, apa wotonge koatengu tadeạu pẹ̌kakawingu matoghasẹ̌?
7. Tol᷊ẹe atorang i Yehuwa gunang pẹ̌kakawing
Aramanung piạ taumata harusẹ̌ sěbạe mẹ̌tawakal᷊i gunang tumol᷊e atorang i Yehuwa soal u pẹ̌kakawing. * Katewe, Yehuwa sarung měngal᷊amatẹ̌ si sire apang tumol᷊e atorang’E. Putarẹ̌ VIDEONE.
Basa Ibrani 13:4, bọu ene bisarai kakiwal᷊o ini:
-
Tumuhụ si kau, apa atorang i Yehuwa gunang pẹ̌kakawing ene masuẹ̌ su akal᷊ẹ̌? Kawe nụe?
Yehuwa mělẹ̌harapẹ̌ pẹ̌kakawing arau perceraian sěngkatau Kristen harusẹ̌ sah, ual᷊ingu su lawọ negeri pěměrenta něngatorẹ̌ hal᷊ẹ̌ ene. Basa Titus 3:1, bọu ene bisarai kakiwal᷊o ini:
-
Mạeng i kau seng bọu nẹ̌kawing, apa pẹ̌kakawingu sah su těngong pěměrenta?
ARAMANUNG PIẠ U NẸ̌KIWAL᷊O: ”Kawe ho harusẹ̌ mẹ̌kawing? Tawe wotonge ho měbiahẹ̌ sěngkasio maning tawe někẹ̌kawing?”
-
Kerea tumuhụ si kau?
RINGKASAN
Mẹ̌kawing dingangu tawe mẹ̌kawing ene kai gaghělị bọu Yehuwa. Kěbị ene botonge makal᷊uasẹ̌ mạeng i kitẹ měbiahẹ̌ tuhụ kapulung Yehuwa.
Apa seng nikaěndungangu?
-
Kerea taumata apang tawe nẹ̌kawing botonge měpakẹ pakapia pěbawiahe?
-
Kawe nụe Alkitapẹ̌ naul᷊ị i kitẹ harusẹ̌ mẹ̌kawing kětạeng dingangu ělang i Yehuwa?
-
Tumuhụ Alkitapẹ̌, apa alasang gunang mẹ̌cere?
PĚMANDA LAI
Apa mangal᷊ene mẹ̌kawing kětạeng dingangu ”tumatol᷊eng Tuang”?
Pẹ̌bialạe tatělu video manibụ botonge makatul᷊ung si kau měkoạ putusang nihino soal u mẹ̌sasintị dingangu mẹ̌kawing.
Pěngěndungke kawe nụe sěngkatau saudara nẹ̌pěndang apa seng nighělị i Yehuwa si sie ene limembong maarěga sul᷊ungu apa seng nitěntange.
Apa piram baụ hal᷊ẹ̌ harusẹ̌ tiněnangu taumata těntal᷊ang bědang tawe němutusẹ̌ gunang mẹ̌cere arau mẹ̌tal᷊ei?
”Pěngadatẹ̌ ’Apa Seng Nipakasěmbaụ karạ u Mawu’” (Měhabarẹ̌, Desember 2018)
^ par. 23 Su piram baụ budaya, matimadẹ̌ biasane měmile kawing gunang anạ i sire. Mạeng kerene, matimadẹ̌ makěndagẹ̌ kahumotongange harusẹ̌ mẹ̌tiněna, bal᷊inẹ soal u roitẹ̌ arau status sosial tau ene, katewe apa i sie makěndagẹ̌ si Yehuwa arau tala.
^ par. 33 Mạeng i kau seng měbẹ̌biahẹ̌ sěngkasio dingangu sintịu kụ tawe někẹ̌kawing, i kau hala harusẹ̌ měmutusẹ̌ gunang měněntang si sie arau mẹ̌kawing dingange.