I kitẹ kěbị tantu mapulu měmile pakeang sude paketang i kitẹ arau kerea penampilan i kitẹ. Mạeng i kitẹ tumol᷊e piram baụ prinsip sederhana bọu Alkitapẹ̌, i kitẹ bal᷊inẹ kětạeng měpakẹ pakeang ikẹ̌kapulung i kitẹ katewe lai makal᷊uasẹ̌ si Yehuwa. Mahịe měmanda piram baụ prinsipẹ̌ ene.

1. Prinsip apa makatul᷊ung si kitẹ su tempong měkoạ putusang soal u pakeang dingangu penampilan?

I kitẹ harusẹ̌ měmile ”pakeang nẹ̌tatahino, dingangu kesederhanaan lai tiněna mapia”. Kụ, i kitẹ lai měndiagạ penampilan burěsi tadeạu taumata wal᷊inẹ makasilo i kitẹ kai ”měnẹ̌němbah Mawu”. (1 Timotius 2:​9, 10) Pẹ̌tiněna ěpạ prinsip ini: (1) Pakeang i kitẹ harusẹ̌ ”nẹ̌tatahino”. Kere seng nikasilonu su pěngangibadang, modelẹ̌u pakeang ikẹ̌kapulung manga ělang i Yehuwa ene nẹ̌tatěntang. Maning kerene, pakeang lai modelẹ̌u utạ i kami něnodẹ i kami měngẹ̌ngadatẹ̌ Mawu sẹ̌sěmbang i kami. (2) Mẹ̌papakeang ”dingangu kesederhanaan” ene mangal᷊ene pakeang i kitẹ tawe wotonge ketat dingangu tumanịu terbuka. Arau, pakeang i kitẹ tawe wotonge makakoạ taumata měngkate měmẹ̌manda si kitẹ. (3) I kitẹ měnodẹ ”tiněna mapia” mạeng i kitẹ tawe sěntiniạ tumol᷊e modelẹ̌u pakeang kawuhuange. (4) Penampilan i kitẹ harusẹ̌ sěntiniạ měnodẹ i kitẹ ”měnẹ̌němbah Mawu” nihino.​—1 Korintus 10:31.

2. Su tempong měmile pakeang, kawe nụe i kitẹ harusẹ̌ mẹ̌tiněna pěndangu anạu sěmbaụ?

Maning i kitẹ bebasẹ̌ měmile měpakẹ pakeang kerea, i kitẹ harusẹ̌ mẹ̌tiněna apa pengaruh pakeang nipileng i kitẹ su taumata wal᷊inẹ. I kitẹ mẹ̌tawakal᷊i tawe makakoạ taumata wal᷊inẹ tersinggung, bọu ene lai i kitẹ mapulu ”makal᷊uasẹ̌ sěndinganeng i kitẹ, kụ měkoạ mapia gunang měnoghasẹ̌ si sire”.​—Basa Roma 15:​1, 2.

3. Kerea pakeang nipakẹ i kitẹ makakoạ taumata limembong mapulu měngěndung soal i Yehuwa?

Maning i kitẹ měpẹ̌pakẹ pakeang nẹ̌tatahino su haghing tempo, i kitẹ harusẹ̌ limembong maingatẹ̌ soal u pakeang su tempong měngibadah dingangu měnginjilẹ̌. I kitẹ madiri penampilan i kitẹ makakoạ taumata tawe fokus su habarẹ̌ mapia. Katewe, i kitẹ mapulu penampilan i kitẹ makakoạ taumata limembong mapulu měngěndung soal u Mawu dingangu ”makawantugẹ̌ těntirong Měnanal᷊amati kitẹ”.​—Titus 2:​10.

 BANGKA PAKARAL᷊UNG

4. Mạeng penampilan i kitẹ mapaelẹ̌ ene něnodẹ i kitẹ měngẹ̌ngadatẹ̌ si Yehuwa

Apa alasang kahumotongange i kitẹ mapadul᷊i su penampilan i kitẹ? Basa Mazmur 47:​2, bọu ene bisarai manga kakiwal᷊o ini:

• Ual᷊ingu i kitẹ měbẹ̌bawa areng i Yehuwa, apa pěngarune hal᷊ẹ̌ ene su tempong i kitẹ měmile pakeang?

• Tumuhụ si kau, apa masuẹ̌ su akal᷊ẹ̌ mạeng i kitẹ mapadul᷊i su penampilan i kitẹ su tempong duměnta su pěngangibadang dingangu měnginjilẹ̌? Kawe nụe?

 5. Carane měkoạ putusang mapaelẹ̌ soal u pakeang dingangu penampilan

Putarẹ̌ VIDEONE.

Tawẹ soale pakeang i kitẹ mal᷊ěghadẹ̌ arau mamura, ene harusẹ̌ burěsi lai nẹ̌tatahino dingangu situasine. Basa 1 Korintus 10:24 dingangu 1 Timotius 2:​9, 10. Bọu ene, bisarai kawe nụe i kitẹ tawe měpakẹ pakeang . . .

• kotorẹ̌, lusu, arau tumanịu santai.

• ketat arau tumanịu terbuka.

Maning tau Kristen seng tawe harusẹ̌ tumuhụ Hukung Musa, Hukung ene něnodẹ pěndang i Yehuwa. Basa Ulangan 22:​5, bọu ene bisarai kakiwal᷊o ini:

• Kawe nụe pakeang dingangu penampilan i kitẹ tawe wotonge makakoạ esẹ kakělaěng kere wawine arau wawine kakělaěng kere esẹ?

Basa 1 Korintus 10:​32, 33 dingangu 1 Yohanes 2:​15, 16, bọu ene bisarai manga kakiwal᷊o ini:

• Kawe nụe i kitẹ madiri penampilan i kitẹ makatěrsinggung taumata su tampạ pẹ̌tatanakeng i kitẹ arau anạu sěmbaụ su sidang?

• Kerea pakeang dingangu penampilan taumata su tampạ pẹ̌tatanakengu?

• Tumuhụ si kau, apa pakeang dingangu penampilan kerene nẹ̌tatahino gunang tau Kristen? Kawe nụe?

 RINGKASAN

Mạeng i kitẹ měkoạ putusang nihino soal u penampilan, ene něnodẹ i kitẹ měngẹ̌ngadatẹ̌ si Yehuwa dingangu měngẹ̌ngarěga taumata wal᷊inẹ.

Apa seng nikaěndungangu?

• Kawe nụe pakeang dingangu penampilan i kitẹ ene penting si Yehuwa?

• Apa piram baụ prinsip makatul᷊ung si kitẹ měkoạ putusang nihino soal u penampilan?

• Kerea penampilan i kitẹ makapěngaruh pěndangu taumata su ibadah tutune?