PĚNGANGĚNDUNGANG 53
Pilẹe Hiburan Makal᷊uasẹ̌ si Yehuwa
Yehuwa kai ”Mawu mal᷊uasẹ̌”. (1 Timotius 1:11) I Sie mapulu i kitẹ měbiahẹ̌ mal᷊uasẹ̌. I Sie mapulu i kitẹ bal᷊inẹ kětạeng měhal᷊ẹ̌, katewe lai piạ tempo gunang mẹ̌santai. Su pěngangěndungang ini, i kitẹ sarung měmanda kerea měpakẹ tempo santai gunang makal᷊uasẹ̌ watangeng i kitẹ dingangu makal᷊uasẹ̌ si Yehuwa.
1. Apa harusẹ̌ tahěndungang i kitẹ su tempong měmile hiburan?
Apa kẹ̌koatengu su tempong santai? Pirang katau něpakẹ tempo santai su wal᷊e gunang mẹ̌basa bukẹ̌, dumaringihẹ̌ musikẹ̌, mẹ̌biala film, arau měmuka Internet. Sěnggạ lai někoạ kegiatan limembong aktif, kere mendaki, kumalang, arau měnalang dingangu manga hapị. Tawẹ soale sude limembong ikẹ̌kapuluang i kitẹ, i kitẹ harusẹ̌ měmarikěsa hiburan nipileng i kitẹ ene ”makal᷊uasẹ̌ si Tuang”. (Efesus 5:10) Sěbạe penting makaěna hal᷊ẹ̌ ini ual᷊ingu kal᷊awokange hiburan lohone kai manga hal᷊ẹ̌ ikẹ̌kawěngsing i Yehuwa, kere taumatane měpẹ̌papate, piạ amoralitas seksual, arau spiritisme. (Basa Mazmur 11:5.) Apa makatul᷊ung si kitẹ měkoạ putusang nihino soal u hiburan?
Mạeng i kitẹ měmile hapị makěndagẹ̌ si Yehuwa, i sire sarung makaghělị pengaruh mapaelẹ̌ si kitẹ dingangu makatul᷊ung si kitẹ měmile hiburan mapaelẹ̌. Kere seng bọu niěndungang i kitẹ, ”taumata dụdal᷊eng dingangu taumata matahuěna sarung makoạ matahuěna”. Katewe, mạeng i kitẹ masau mědal᷊ahapị dingangu taumata tawe tụtol᷊e atorangu Mawu, i kitẹ ”sarung masilakạ”.—Amsal 13:20.
2. Kawe nụe penting měngatorẹ̌ pira kal᷊awọe tempo paketang gunang hiburan?
Maning hiburan nipileng i kitẹ ene mapaelẹ̌, i kitẹ harusẹ̌ maingatẹ̌ tadeạu tawe měpakẹ lawọ tempo gunang hiburan. Mạeng tala, ěntěhang i kitẹ tawẹ apa tempo gunang hal᷊ẹ̌ limembong penting. Alkitapẹ̌ němahangsang si kitẹ gunang ’měpakẹ tempo pakapia’.—Basa Efesus 5:15, 16.
BANGKA PAKARAL᷊UNG
Mahịe měngěndung kerea měkoạ putusang nihino soal u hiburan.
3. Pẹ̌těngkarau bọu hiburan dal᷊akị
Kawe nụe i kitẹ harusẹ̌ měmile pakapia hiburan? Putarẹ̌ VIDEONE, bọu ene bisarai manga kakiwal᷊o ini.
-
Kerea pertarungan gladiator su tempong tamai ene mẹ̌sul᷊ung dingangu piram baụ hiburan orasẹ̌ ini?
-
Su video ene, apa nikaěndungang i Dani soal u hiburan?
Basa Roma 12:9, bọu ene bisarai kakiwal᷊o ini:
-
Kerea ayatẹ̌ ini makatul᷊ung si kau měmile hiburan mapaelẹ̌?
Apa piram baụ hal᷊ẹ̌ ikẹ̌kawěngsing i Yehuwa? Basa Amsal 6:16, 17 dingangu Galatia 5:19-21. Sabang masueng basane ayatẹ̌, bisarai kakiwal᷊o ini:
-
Manga hal᷊ẹ̌ sude nisěbạ su manga ayatẹ̌ ini kụ mẹ̌sul᷊ung dingangu manga hiburan orasẹ̌ ini?
Carane měmile pakapia hiburan
Pẹ̌tiněna hal᷊ẹ̌ ini:
-
Apa? Apa lohong hiburan ene kai hal᷊ẹ̌ ikẹ̌kawěngsing i Yehuwa?
-
Kange? Apa ene makapakẹ tempo gunang hal᷊ẹ̌ limembong penting?
-
I sai? Apa hiburan ene makakoạ si siạ limembong marani arau masau mědal᷊ahapị dingangu taumata tawe makěndagẹ̌ si Yehuwa?
I kitẹ limembong aman mạeng marau bọu bahaya. Hakị u ene, i kitẹ harusẹ̌ mẹ̌těngkarau bọu haghing hiburan kụ kakělaěng sarung makawahaya si kitẹ
4. Pakẹ pakapia temponu
Putarẹ̌ VIDEONE, bọu ene bisarai kakiwal᷊o ini.
-
Maning saudara su video ene tawe nẹ̌biala barang dal᷊akị, apa nakoạ masalah si sie?
Basa Filipi 1:10, bọu ene bisarai kakiwal᷊o ini:
-
Kerea ayatẹ̌ ini makatul᷊ung si kitẹ měmutusẹ̌ pira kal᷊awọe tempo botonge paketang i kitẹ gunang rekreasi?
5. Pilẹe hiburan mapaelẹ̌
Maning piram baụ hiburan tawe makal᷊uasẹ̌ si Yehuwa, piạ lawọ hiburan mapaelẹ̌ botonge pileng i kitẹ. Basa Pengkhotbah 8:15 dingangu Filipi 4:8, bọu ene bisarai kakiwal᷊o ini:
-
Manga hal᷊ẹ̌ mapaelẹ̌ apa botonge koatengu?
I kau botonge měmile hiburan dingangu rekreasi mapaelẹ̌
PIẠ U NAUL᷊Ị: ”Tawe masalah mạeng lohong hiburan i kitẹ taumatane měpẹ̌papate, piạ barang amoral, arau spiritisme, asal᷊ẹ̌ i kitẹ tawe měkẹ̌koạ manga hal᷊ẹ̌ ene.”
-
Kerea tumuhụ si kau?
RINGKASAN
Yehuwa mapulu i kitẹ měmile hiburan mapaelẹ̌.
Apa seng nikaěndungangu?
-
Tau Kristen harusẹ̌ mẹ̌těngkarau bọu hiburan kerea?
-
Kawe nụe i kitẹ harusẹ̌ maingatẹ̌ soal u pira kal᷊awọe tempo paketang i kitẹ gunang hiburan?
-
Kawe nụe i kau mapulu měmile hiburan makal᷊uasẹ̌ si Yehuwa?
PĚMANDA LAI
Pěmanda i sai bertanggung jawab su hiburan nipileng i kitẹ.
”Apa Sahiding Yehuwa Měsẹ̌sěding Piram Baụ Film, Bawasang, arau Kakantarị?” (Artikel web)
Pěmanda kerea i kau botonge měkoạ putusang nihino soal u rekreasi.
”Apa Rekreasinu Piạ Gunane?” (Menara Pengawal, 15 Oktober 2011)
Su běke ”Iạ Lai Nakakoạ Něnděmẹ Prasangka bọu Naungku”, pěmanda kawe nụe sěngkatau esẹ němal᷊ui hiburan nipilene.
”Alkitapẹ̌ Makawal᷊ui Pěbawiahẹ̌” (Menara Pengawal, 1 Februari 2010)
Pěmanda kerea sěngkatau matimadẹ̌ wawine někoạ putusang nihino soal u hiburan piạ sěmpụe dingangu spiritisme.
Pẹ̌těngkarau bọu Hiburan Piạ Sěmpụe dingangu Spiritisme (2:02)
