Maning i kau sěbạe makěndagẹ̌ si Yehuwa kụ mětẹ̌tawakal᷊i tawe měkoạ barang makatědụ naung’E, pẹ̌sěngkatempo i kau sarung měkoạ pẹ̌sasal᷊a. Katewe, piram baụ pẹ̌sasal᷊a ene limembong serius bọu pẹ̌sasal᷊a wal᷊inẹ. (1 Korintus 6:​9, 10) Mạeng i kau někoạ dosa serius, pẹ̌tahěndung ene tawe makaědo Yehuwa kuměndagẹ̌ si kau. I Sie mapulu měgělị ampung dingangu mẹ̌tul᷊ung si kau.

1. Apa harusẹ̌ koateng i kitẹ tadeạu ampungang i Yehuwa?

Taumata apang makěndagẹ̌ si Yehuwa sarung sěbạe masusah naung su tempong masadarẹ̌ i sire seng někoạ dosa serius. Katewe, i sire botonge makaěbạ pělahiborẹ̌ bọu dianding Yehuwa su umat’E: ”Maning manga dosang i kamene mahamụ kere daha, ene sarung koateng pakawira kere salju.” (Yesaya 1:​18) Mạeng i kitẹ kahěngang-hěngang mẹ̌tobatẹ̌, Yehuwa sarung měgělị ampung si kitẹ. Kerea i kitẹ mẹ̌tobatẹ̌? Ual᷊ingu sěbạe nẹ̌sasěsilẹ̌, i kitẹ měngědo měkoạ barang dal᷊akị kụ mẹ̌dorong ampung si Yehuwa. Bọu ene, i kitẹ mẹ̌tawakal᷊i měmal᷊ui tiněna nẹ̌sal᷊a arau kakanoạ makakoạ si kitẹ měkoạ dosa. Kụ i kitẹ lai mẹ̌tawakal᷊i měbiahẹ̌ tuhụ atorang i Yehuwa.​—Basa Yesaya 55:​6, 7.

2. Kerea Yehuwa něpakẹ manga penatua gunang mẹ̌tul᷊ung si kitẹ su tempong i kitẹ někoạ dosa?

Mạeng i kitẹ někoạ dosa serius, Yehuwa něngoro si kitẹ gunang ”pẹ̌kui manga [penatua su] jamaatẹ̌.” (Basa Yakobus 5:​14, 15, Binohẹ Susi Bal᷊o Mapia.) Manga esẹ seng nipile ene makěndagẹ̌ si Yehuwa dingangu su manga dombang Yehuwa. I sire botonge mẹ̌tul᷊ung si kitẹ saụ mědal᷊ahapị dingangi Yehuwa.​—Galatia 6:1.

Kerea manga penatua mẹ̌tul᷊ung mạeng i kitẹ někoạ dosa serius? Darua arau tatělu penatua sarung měpakẹ manga ayatẹ̌ su Alkitapẹ̌ gunang měnodẹ kawe nụe apa nikoạ i kitẹ ene nẹ̌sal᷊a. I sire lai sarung měgělị si kitẹ těgu dingangu sasasa kụ makatul᷊ung si kitẹ tawe saụ měkoạ pẹ̌sasal᷊a ene. I sire lai aramanung maul᷊ị i kitẹ tawe wotonge měkoạ piram baụ kegiatan Kristen sarang i kitẹ saụ masehatẹ̌ secara rohani. Gunang měndiagạ sidang bọu pengaruh dal᷊akị, manga penatua sarung měněbang bọu sidang taumata apang někoạ dosa serius kụ madiri mẹ̌tobatẹ̌.

 BANGKA PAKARAL᷊UNG

3. Měngaku dosa ene makatul᷊ung si kitẹ saụ mědal᷊ahapị mapia dingangi Yehuwa

Su tempong někoạ dosa, i kitẹ nakatědụ naung i Yehuwa. Hakị u ene, i kitẹ harusẹ̌ měngaku dosa si Sie. Basa Mazmur 32:​1-5, bọu ene bisarai kakiwal᷊o ini:

• Kawe nụe mapaelẹ̌ mạeng i kitẹ měngaku dosang i kitẹ si Yehuwa sul᷊ungu měmuni ene?

 4. Měněbang bọu sidang ene makatul᷊ung

Mạeng tau někoạ dosa serius madiri tumol᷊e atorang i Yehuwa, i sie seng tawe wotonge makoạ bageang bọu sidang. I sie harusẹ̌ sěbangeng bọu sidang kụ i kitẹ tawe wotonge mědal᷊ahapị arau mẹ̌bawěke dingange. Basa 1 Korintus 5:​6, 11 dingangu 2 Yohanes 9-​11, bọu ene bisarai kakiwal᷊o ini:

• Kere ragi makapěngaruh tapong lẹ̌ojong, kerea pẹ̌dal᷊ahapị dingangu taumata madiri mẹ̌tobatẹ̌ ene piạ pěngarune su sidang?

 RINGKASAN

Mạeng i kitẹ někoạ dosa serius katewe i kitẹ kahěngang-hěngang nẹ̌sasěsilẹ̌ dingangu nẹ̌tawakal᷊i měngědo měkoạ barang dal᷊akị, Yehuwa sarung měgělị ampung si kitẹ.

Apa seng nikaěndungangu?

• Kawe nụe mapaelẹ̌ měngaku pẹ̌sasal᷊ang i kitẹ si Yehuwa?

• Apa harusẹ̌ koateng i kitẹ tadeạu ampungang i Yehuwa?

• Mạeng i kitẹ někoạ dosa serius, kawe nụe i kitẹ harusẹ̌ makitul᷊ung su manga penatua?