Su tempong Yehuwa něndiadi keluarga, i Sie nẹ̌parenta matatimadẹ̌ pěněntiro anạ i sire. (Kolose 3:20) Matatimadẹ̌ harusẹ̌ měněntiro mangarariọ, tadeạu i sire kuměn-dagẹ̌ si Yehuwa dingangu makoạ taumata matahuěna su tempo mahi. (2 Timotius 1:5; 3:15) I kau lai harusẹ̌ masingkạ apa su ral᷊ungu naung u anạu. Kakanoạ i kamene makoạ tatěnoěng si sire. Tadeạu makapěněntiro mapaelẹ̌ parentang Yehuwa su mangarariọ, parenta ene kahumotongange harusẹ̌ su ral᷊ungu naungu.—Mazmurẹ̌ 40:9.

APA NIUL᷊Ị U BINOHẸ SUSI: ”Pakasasahawụ dumaringihẹ̌, kaiso pakatěmudẹ̌ mẹ̌bera.” (Yakobus 1:19) I kamene tantu mapulu mangarariọ makapěndang i sire gampang mẹ̌bisara dingang i kamene. Hakị u ene i sire harusẹ̌ masingkạ, i kamene mapulu dumaringihẹ̌ su tempong i sire mẹ̌bisara. Tadeạu i sire gampang mẹ̌bisara, i kamene harusẹ̌ pakararame. (Yakobus 3:18) Mạeng i kamene makasarẹ̌ arau mal᷊ighạ mẹ̌pědu, i sire mạdiri mẹ̌běke si kamene. Pakasabarẹ̌, kụ todẹko su mangarariọ i kamene kahěngang-hěngang kụkěndagẹ̌ si sire.—Matius 3:17; 1 Korintus 8:1.

APA HARUSẸ̌ KOATENG:

• Daringihẹ̌ bue su tempong anạu mapulu mẹ̌bisara

• Pakasau mẹ̌bisara dingangu anạ i kamene, abe kětạeng su tempong piạ sungkal᷊e

APA NIUL᷊Ị U BINOHẸ SUSI: ”Bawerang taumata . . . maral᷊ung kere laudẹ̌ mal᷊oang.” (Baweran Salomo 18:4) Matatimadẹ̌ harusẹ̌ makaěna apa mangal᷊ene bawerang mangarariọ, tadeạu makasingkạ kerea pěndang i sire. Bawerang mangarariọ biasane nẹ̌tatěntang dingangu apa su ral᷊ungu naunge. ”Sumimbahẹ̌ kụ deng tawe nakạdingihẹ̌ e kai kakanoạ u wodo ringangu makạmea.” (Baweran Salomo 18:13) Abe kasasahawu mẹ̌pědu.—Baweran Salomo 19:11.

APA HARUSẸ̌ KOATENG:

• Maning apa niwerang anạu, abe potọ bisarane arau měhěkadẹ̌

• Kěnang pẹ̌tahěndung kerea pěndang i kamene tempong bědang mangudạ, apa nikoạ i kamene

APA NIUL᷊Ị U BINOHẸ SUSI: ”Tatingangke apang niwerang inang i amang si kau e anạku.” (Baweran Salomo 1:8) Yehuwa seng něgělị tanggung jawab su matimadẹ̌ gunang měněntiro mangarariọ. I kamene harusẹ̌ měněntiro si sire tadeạu měngadatẹ̌ dingangu matuhụ si kamene. (Efesus 6:1-3) Mangarariọ makapěndang mạeng matimade tawe ”mẹ̌sěngkanaung.” (1 Korintus 1:10) Mạeng bisarang i rua tawe nẹ̌tatahino sěmbaụ su wal᷊inẹ, abe todẹ su těngong mangarariọ. Ene makakoạ i sire tawe měngadatẹ̌ si kamene.

APA HARUSẸ̌ KOATENG:

• Pẹ̌bisara dingangu kawingu soal u měněntiro anạ, kụ koạko putusang ene

• Mạeng nẹ̌tatěntang tiněnang i rua soal u měněntiro mangarariọ, kěnang pẹ̌tiněna bọu pěndang u kawingu

APA NIUL᷊Ị U BINOHẸ SUSI: ”Paněntiro su anạ . . . kakakoạ u pẹ̌bawiahẹ̌ tuhụ dal᷊enge.” (Baweran Salomo 22:6) Měněntiro anạ tadeạu makoạ taumata matahuěna ene tawe gampang. Bisarai apa sarung koateng gunang měněntiro anạ. (Mazmurẹ̌ 127:4; Baweran Salomo 29:17) Měněntiro anạ bal᷊inẹbe kětạeng měhukung, ene mangal᷊ene lai maul᷊ị su anạ kawe nụe těntiro ene nighělị. Těntiroi lai i sire tadeạu kuměndagẹ̌ hengetang dingangu prinsip u Binohẹ Susi. (Mazmurẹ̌ 1:2) Ndaị ini makatul᷊ung mangarariọ makahěngang barang mapia dingangu dal᷊akị.—Ibrani 5:14.

APA HARUSẸ̌ KOATENG:

• Mangarariọ harusẹ̌ makasingkạ Mawu kahěngang-hěngang ene, kụ i Sie botonge kapěngimangeng i sire

• Pẹ̌tul᷊ung si sire tadeạu makasingkạ barang makasilakạ su internet arau jejaring sosial. Těntiroi i sire tadeạu mẹ̌těngkarau bọu pemangsa seksual arau taumata mětẹ̌tingkaị mangarariọ