Bọu pẹ̌bawasang ini i kau seng něngěndung lawọ prinsip u Binohẹ Susi gunang mẹ̌tu-l᷊ung si kau dingangu keluarganu. Yehuwa mapulu i kamene mal᷊uasẹ̌. I Sie nẹ̌diandi mạeng měněmba si Sie kahumotongange su pěbawiahẹ̌, ”tangu kěbị e sarung ionggọu Ruata si kamene.” (Matius 6:33) I Sie mapulu i kamene makoạ hapị’E. Pakẹko tempo pakapia gunang měnoghasẹ̌ pẹ̌dal᷊ahapịu dingangu Mawu. Mědal᷊ahapị dingangu Mawu kapaelange su pěbawiahẹ̌.—Matius 22:37, 38.

APA NIUL᷊Ị U BINOHẸ SUSI: ”Yehuwa naul᷊ị, ’Iạ e sarung makoạ i Amang i kamene ringangu i kamene sarungbe mariadi manga anạ-Ku.’” (2 Korintus 6:18) Mawu mapulu i kau makoạ hapị’E mapia. Doa sěmbaụ cara gunang mědal᷊ahapị dingangu Mawu. Yehuwa měgẹ̌gausẹ̌ si kau tadeạu ”pěmpẹ̌kal᷊iomaneng sidutu” si Sie. (1 Tesalonika 5:17) I Sie mapulu makasingkạ apa tẹ̌tiněnang dingangu apa makaghěnggang si kamene. (Filipi 4:6) Su tempong i kau mědoa sěngkasio dingangu keluarganu, i sire sarung makasingkạ kerea pẹ̌dal᷊ahapịu dingangu Mawu.

Abe kětạeng mẹ̌bisara su Mawu, i kau lai harusẹ̌ dumaringihẹ̌ si Sie. Carane mẹ̌basa hengetangE dingangu pẹ̌bawasang bọu Binohẹ Susi. (Mazmurẹ̌ 1:1, 2) Pẹ̌tiněnako apa seng bọu niěndungang. (Mazmurẹ̌ 77:11, 12) Cara bal᷊inẹ lai, duměnta su pěngangibadang tau Sahani.—Mazmurẹ̌ 122:1-4.

Gunang makatoghasẹ̌ pẹ̌dal᷊ahapịu dingangi Yehuwa, i kau lai harusẹ̌ mẹ̌běke kerea i Sie su taumata wal᷊inẹ. Mạeng turusẹ̌ měkoạ ene i kau sarung kakạdanine dingangi Sie.—Matius 28:19, 20.

APA HARUSẸ̌ KOATENG:

• Sadia tempo gunang mědoa dingangu mẹ̌basa Binohẹ Susi

• Su sěntahanakeng, hal᷊ẹ̌ rohani harusẹ̌ koạ kahumotongange bọu hal᷊ẹ̌ bal᷊inẹ, kere měnalang dingangu mẹ̌pasiarẹ̌

APA NIUL᷊Ị U BINOHẸ SUSI: ”Lẹ̌haungko su Mawu Ruatakụ Duata e mal᷊aing sarung humaung si kamene.” (Yakobus 4:8) I kau harusẹ̌ měkoạ jadwal gunang ibadah keluarga. (Pěndariadi 18:19) Katewe, bal᷊inẹbe kětạeng ene harusẹ̌ koateng. Mawu harusẹ̌ ene su pěbawiahu sěntahanakeng. Pakatoghasẹ̌ pẹ̌dal᷊ahapị sěntahanakengu dingangu Mawu, kụ ”pahumbisarangkong ene i kamene su ral᷊ungu wal᷊e, arau su l᷊ikude, su tempong měngẹ̌ngirul᷊e ringangu su tempong kapělẹ̌hal᷊ẹ̌ e.” (Pangangonggọ u Toratẹ̌ Kapia 6:6, 7) Pẹ̌těnoko si Yosua, i sie nẹ̌bera: ”Arawe i kami–iạ dingangu walagẹ̌ku e sarung měmunara samatang baugu Mawu.”—Yosua 24:15.

APA HARUSẸ̌ KOATENG:

• Su ibadah keluarga bisarai lai apa harusẹ̌ koateng gunang mẹ̌tul᷊ung pẹ̌sěngkatau tuma-těngo sungkal᷊e nikaěbạ i sire