Kěnang pandai anạ su gambarẹ̌ ini. I sie kětạeng sẹ̌sane, kụ i sie matakụ. Kahěngang ene? Apa i kau lai bọu natakụ?— Kěbị taumata bọu natakụ. Alkitapẹ̌ nẹ̌běke, piạ manga hapị i Yehuwa lai bọu natakụ. Contone, i Elia. Mahi i kitẹ mẹ̌basa běkene.

Elia nẹ̌tanạ su Israel, su tempong i Yesus bědang tawe nalahirẹ̌. Su tempo ene, i Ahab nakoạ datu su Israel. I sie tawe měngẹ̌ngibadah si Yehuwa. I Ahab dingangu kawinge, Izebel, měngibadah su Baal. Hakị u ene, lawọ tau Israel lai měngibadah su Baal. Ratu Izebel dal᷊aị sipate, kụ i sie mapulu měmate kěbị apang měngẹ̌ngibadah si Yehuwa. I sie lai mapulu měmate si Elia! I kau masingkạ apa nikoạ i Elia?—

I Elia timal᷊ang sarang padang gurun, kụ i sie nẹ̌kěmbuni su goa. I kau masingkạ, kawe i sie nẹ̌kěmbuni?— Iya, i sie natakụ. Sěběnarẹ̌e, i Elia tawe harusẹ̌ matakụ, ual᷊ingu i Yehuwa botonge mẹ̌tul᷊ung si sie.  I Yehuwa seng bọu něnodẹ si Elia, kerea katoghase i Sie. Contone, i Yehuwa bọu dimaringihẹ̌ doang i Elia, kụ něgělị putung bọu langị. Tempo ene lai tantu i Yehuwa botonge mẹ̌tul᷊ung si Elia!

Su tempong i Elia su ral᷊ungu goa, i Yehuwa nẹ̌kiwal᷊o si Elia: ’Apa kẹ̌koatengu sini?’ I Elia simimbahẹ̌: ’Kětạeng iạ nal᷊ěmbe měngibadah si kau. Iạ kětạeng sẹ̌saku, kụ iạ matakụ iạ kai pateng.’ I Elia nẹ̌pikirẹ̌, kěbị taumata měngibadah si Yehuwa seng nipate. Katewe, i Yehuwa nẹ̌bera si Elia: ’Tala, bědang piạ 7.000 taumata měngibadah si siạ. Abe katakụ. Bědang piạ lawọ hal᷊ẹ̌ harusẹ̌ koatengu!’ Mạeng si kau kerea, apa i Elia mal᷊uasẹ̌ nakaringihẹ̌ ene?—

Bọu nẹ̌basa běke ini, apa botonge koatengu?— I kau tawe harusẹ̌ matakụ dingangu mẹ̌pikirẹ̌ i kau kětạeng sẹ̌sanu. I kaụ piạ manga hapị u masayang si Yehuwa, kụ masayang lai si kau. I Yehuwa lai matoghasẹ̌, kụ i Sie mapulu mẹ̌tul᷊ung si kau! Hakị u ene, i kau tawe kětạeng sẹ̌sanu. Apa i kau mal᷊uasẹ̌?—